(23 މާޗް 2023 ގައި ޝާއިއުކުރި ބަޔާ ގުޅޭ)
ކީރިތި ޤުރުއާނުގެ ޞޯދު ސޫރަތުގައްޔާއި ބަޤަރާ ސޫރަތުގައި ، މިވާހަކަތައް ބަޔާންކުރައްވައި އަންގަވައިފާ އެބައޮތެވެ. ޞޯދު ސޫރަތުގެ 71 ވަނަ އާޔަތުން ފެށިގެން އެކަންހިނގައިދިޔަގޮތް ތަފްޞީލުކޮށް ބަޔާންކޮށްދެއްވާފައި އެބައޮތެވެ.
މަށިން ، އިންސާނަކު އުފައްދަވާހުށިކަމުގައި ﷲ ، މަލާއިކަތްބޭކަލުންނަށް ވަޙީކުރެއްވިއެވެ. އަދި އެއިންސާނާ އެބަހީ އާދަމުގެފާނު އުފައްދަވައި ފުރިހަމަކުރެއްވުމަށްފަހު ، އެކަލާނގެ ރޫޙުފުޅުން ، އެއިންސާނާއަށް ފުމެލައްވާހިނދު ، މަލާއިކަތްބޭކަލުން އޭނާއަށްޓަކައި ސަޖިދަޔަށް ތިރިވާށޭ ވަހީކުރައްވައި އަމުރުކުރެއްވިއެވެ. އެހިނދު ، އިބިލީސް ފިޔަވައި އެހެން ހުރިހައި މަލާއިކަތުން އެކުގައި ސަޖިދަ ކުރެއްވިއެވެ. އިބިލީސް ، ސަޖިދައެއް ނުކުރިއެވެ. އެހެންކަމުން ، އެކަލޭގެވެގެންދިޔައީ ، ﷲ ގެ އަމުރުފުޅަށް އުރެދި ، ނުކިޔަމަންތެރިވި ކާފަރުންގެ ތެރެއިންނެވެ. އެކަމާގުޅިގެން އިބިލީހަށް ، ﷲ ވަޙީކުރެއްވިއެވެ. " ތިމަން ރަސްކަލާނގެ ޔަދުޤުދުރަތްފުޅުން ، (އެއްވެސް ވާސިތަކާނުލައި) ހެއްދެވި މީހަކަށް ސަޖިދަކުރުން ކަލޭގެޔަށް މަނާކުރީ ކޮންކަމެއް ހެއްޔެވެ ؟ ކަލޭގެ (ސަޖިދަކުރުމަށް) ބޮޑާވެގަތީ ހެއްޔެވެ ؟ ނުވަތަ ކިބުރުވެރިގަތްމީހުންގެތެރެއިން ކަލޭވީ ހެއްޔެވެ ؟ "
" އެކަލޭގެފާނަށްވުރެ ތިމަން ، މާމޮޅެވެ. އިބަރަސްކަލާނގެ ތިމަން އުފެއްދެވީ އަލިފާނުންނެވެ. އަދި ، އިބަރަސްކަލާނގެ އެކަލޭގެފާނު ހެއްދެވީ މަށިންނެވެ. " އިބިލީސް ދެންނެވިއެވެ. އެވަގުތު ، ﷲ ކޯފާވެވޮޑިގެން ، ސުވަރުގެއިން ނުކުތުމަށް ، އިބިލީހަށް އަންގަވައި ، އެތަނުން ނެރެލެއްވިއެވެ. އަދި އިބިލީހަކީ ، އެކަލާނގެ ރަޙުމަތްފުޅުން ބޭރުކުރެވިފައިވާ މީހެއްކަމުގައިވެސް އެންގެވިއެވެ. އަދި ، ޤިޔާމަތްދުވަހަށް ދާނދެން އިބިލީހުގެ މައްޗަށް ، އެކަލާނގެ ލަޢުނަތް ލެއްވިގެންވާކަން ބަޔާންކުރެއްވިއެވެ. އެވަގުތު އިބިލީސް ދެންނެވިއެވެ.
" އަޅުގެ ވެރި ރަސްކަލާކޯއެވެ ! ފަހެ ، އެއުރެން ، ( އަލުން ދިރުއްވައި ) މަޙުޝަރަށް ފޮނުއްވާނޭ ދުވަހަށް ދާނދެން ، ތިމަންއަޅާއަށް މުހުލަތު ދެއްވާދޭނވެ ! " އިބިލީހުގެ މިދެންނެވުމާގުޅިގެން ، ﷲ އެކަލޭގެޔަށް އެމުހުލަތު ދެއްވިއެވެ. އެއީ ، ވަގުތު ކަނޑައެޅި އެނގިގެންވާ ދުވަހަށް ދާނދެނެވެ. އިބިލީސް އަނެއްކާވެސް ، ﷲ ގެ ޢިއްޒަތްތެރިވަންތަކަން ގަންދީ ﷲ އަށް ދެންނެވިއެވެ. އެއުރެންކުރެ އިބަރަސްކަލާނގެ ޚިޔާރުކުރެއްވި އަޅަކުފިޔަވައި ، އެއުރެންގެ އެންމެން ، މަގުފުރައްދާ ހުށީމެވެ. އެއީ ކަށަވަރުކަމެކެވެ. ﷲ ސުބްޙަނަހޫ ވަތަޢާލާ ވަޙީ ކުރެއްވިއެވެ.
" ތިމަން ރަސްކަލާނގެއީ ޙައްޤުވަންތަ ރަސްކަލާނގެއެވެ. އަދި ތިމަން ރަސްކަލާނގެ ވަޙީ ކުރައްވަނީ ޙައްޤު ތެދެވެ. ކަލޭގެޔާއި އޭގެތެރެއިން ކަލޭގެޔަށް ތަބާވީ ބަޔަކާ އެންމެން ނަރަކަޔަށް އަޅުއްވައި ނަރަކަ ފުރުއްވާ ހުށީމެވެ ! "
އާދަމުގެފާނު އުފައްދަވައި ، ހުރިހައިތަކެތީގެ ނަންތައް އެކަލޭގެފާނަށް ﷲ އުނގަންނަވައި ދެއްވިއެވެ. އެއީ ނަންކިޔުނު އެންމެހައި ތަކެއްޗާއި އެތަކެތީގެ ޙަޤީޤަތާއި ތަފްޞީލެވެ. އެއަށްފަހު ، ޙައްވާގެފާނު އުފައްދަވައި ، އެދެކަނަބަލުން ، ސުވަރުގޭގައި ވަޒަންވެރިވެ އުޅުއްވުމުގެ އަމުރު ދެއްވިއެވެ. އަދި ބޭނުންފުޅުވާ ގޮތަކަށް ، އެންމެ ގަހަކުން ފިޔަވައި ، ފަރީއްކުޅުއްވައި އުޅުއްވުމަށް ހުއްދަ ދެއްވިއެވެ. އަދި އެގަހަކާ ކައިރިނުވުމަށް ވަކި ގަހެއް ނިންމަވައި ، އެގަހާ ކައިރިވެވަޑައިގެންފިނަމަ ، އެދެކަނބަލުން ވާހުށީ އަނިޔާވެރިމީހުންގެ ތެރޭގައިކަންވެސް އެންގެވިއެވެ. އެހެންނަމަވެސް ، އިބިލީސް ވަސްވާސްދީ ، އޭނާގެ ބަހަށް ހެއްލިވަޑައިގެން ، ﷲ މަނާކުރެއްވިގަހުން ފަރީއްކުޅުއްވުމާގުޅިގެން ، ސުވަރުގޭގައި އެދެކަނަބަލުން އުޅުއްވި ނިޢުމަތުން މަޙުރޫމް ކުރެވިގެން ދިޔައެވެ. އެއީ އިބިލީސް ނުވަތަ ޝައިޠާނާގެ ވަސްވާހުގައި އިންސާނަކު ޖެހި ، ﷲ މަނާކުރައްވާފައިވާ ކަމަކަށް އަދަބުލިބިގެންދިޔަ ފުރަތަމަ ހާދިސާއެވެ. މިކަމާބެހޭގޮތުން ، ކީރިތި ޤުރުއާނުގައި ﷲ ވަޙީ ކުރައްވާފައި ވެއެވެ.
" ތިޔަބައިމީހުންގެ އެއްބަޔަކު އަނެއްބަޔަކާ ޢަދާވާތްތެރިންކަމުގައިވާ ޙާލު ، ތިޔަބައިމީހުން ބިމަށް ފައިބާށެވެ ! އަދި ، ބިމުގައި ތިޔަބައިމީހުންނަށްޓަކައި ، ޤަރާރުވެ ތިބެނިވިތަނަކާއި ދުނިޔޭގެ އުފައު ، ހިނދުކޮޅަކަށް ލިބިގެންވެއެވެ. " (ބަޤަރާ ސޫރަތުގެ 36 ވަނަ އާޔަތް)
ސުވަރުގޭގައި އުޅުއްވުމުގައި ، ކައިރިވުން ﷲ މަނާކުރައްވާފައިވާ ގަހުން ފަރީއްކުޅުއްވައި ކުށްވެރިވެވަޑައިގަތުމާގުޅިގެން ، އާދަމުގެފާނު ، ﷲ ގެ ޙަޟުރަތުން ކަލިމަފުޅުތަކެއް ދަސްކުރައްވައި ، އެކަލާނގެޔަށް ތައުބާވެވަޑައިގަތެވެ. އަދި މާތް ﷲ އެކަލޭގެފާނަށް ތައުބާ ލެއްވިއެވެ. ހަމަކަށަވަރުން ، ﷲ އީ ގިނަގިނައިން ތައުބާ ޤަބޫލުކުރައްވައި ، ރަޙީމުވަންތަ ރަސްކަލާނގެއެވެ.
އާދަމުގެފާނުގެ ދެކަނބަލުންނާއި އިބިލީސް ދުނިޔޭގެ ބިމަށްފޮނުއްވީ އެކުއެކީގައެވެ. ބަޤަރާ ސޫރަތުގެ 38 ވަނަ އާޔަތުގައި ﷲ ވަޙީކުރައްވާފަދައިންނެވެ.
" ތިމަންރަސްކަލާނގެ ، ( އާދަމުގެފާނުގެ ދެކަނބަލުންނާއި އިބިލީހަށް ) ވަޙީކުރެއްވީމެވެ. ތިޔަބއިމީހުން އެންމެން ، އެސުވަރުގެއިން ( ބިމަށް ) ފައިބާށެވެ ! ފަހެ ، ތިޔަބައިމީހުންގެ ގާތަށް ، ތިމަންރަސްކަލާނގެ ޙަޟުރަތުން ތެދުމަގު އަތުވެއްޖެ ހިނދަކު ، ތިމަންރަސްކަލާނގެ ( އަންގަވާ ) ތެދުމަގާ ތަބާވެއްޖެބަޔަކަށް ، އެއްވެސް ބިރުވެރިކަމެއްނެތެވެ. އަދި އެއުރެންނީ ހިތާމަކުރާނެބަޔަކުކަމުގައިވެސް ނުމެވޭމެއެވެ. "
ﷲ ގެ ޙަޟުރަތުން ، ހައްދެއްނެތް މިންވަރަށް ، އާދަމުގެފާނަށް ރަޙުމަތާއި ނިޢުމަތް ތަނަވަސް ކޮށްދެއްވިއެވެ. އެކަލާނގެ މަތިވެރިވެގެންވާ ރޫޙުފުޅުން ، އާދަމުގެފާނުގެ ފުރާނަނެތް ހަށިކޮޅަށް ފުމެލައްވައި ފުރާނައަޅުއްވައި ދިރުން ދެއްވިއެވެ.
(ނުނިމޭ)
