އިންޑިއާއިން ޗައިނާގެމައްޗަށް ކުރިހޯދަފާނެ

ދުނިޔެއަށް އަންނަމުންދާ ހުރިހާ ބަދަލަކަށް ކުރިމަތިލައި ، އިންޑިއާއިން އަންނަނީ ، އެޤައުމަށް ތަނަވަސްވަމުންދާ ފުރުޞަތުތަކުގެ ބޭނުން ފުރިހަމަޔަށް ހިފަމުންނެވެ. އެހެންނަމަވެސް ، އިންޑިއާގެ ޒުވާން މަސައްކަތްތެރި ޖީލަށް ބޭނުންވާ ވަޒީފާގެ ފުރުޞަތު ، އިންޑިއާއިން ކަށަވަރުކޮށްދޭން އެބަޖެހެއެވެ. 2023 ވަނައަހަރު ނިމޭއިރު ، ޗައިނާގެމައްޗަށް ކުރިހޯދައި އިންޑިއާއަކީ ދުނިޔޭގެ އާބާދީ އެންމެ ގިނަ ޤައުމަށްވާނެކަމަށް  އދ އިން ލަފާކުރެއެވެ. މިހާރުވެސް ، އިންޑިއާއަކީ ، އެންމެބޮޑު އާބާދީއެއް އޮތް ޤައުމުކަމުގައި ބެލުމަކީ ، ޙައިރާންވާންވީ ކަމެއްނޫނެވެ. އެއީ ، މިހާރުވެސް އެކަން އެހެންވެފައި އޮވެދާނެކަމަށްޓަކައެވެ. ރަސްމީގޮތުން އެކަން ކަށަވަރުކުރުމަށްޓަކައި ދުވަސްކޮޅެއް ވެދާނެއެވެ. އިންޑިއާގައި 2021 ގައި ނަގަން ހަމަޖެހިފައިއޮތް ބޯހިމެނުންވަނީ ،  ކޯވިޑް – 19 އާ ގުޅިގެން ލަސްކޮށްލެވިފައެވެ. 2022 ނިމުނުއިރު ، އިންޑިއާގެ އާބާދީ ލަފާކޮށްފައިވަނީ 1.417 ބިލިއަނުގައެވެ. އެއީ އދ ގެ ދުނިޔޭގެ އާބާދީއާ ބެހޭ ރިޕޯޓުން ދައްކާ ގޮތެވެ.

ހަމައެއާއެކު ، ހަދިހައެއްގެ އަހަރުތަކުގައި ، އެޤައުމުގެ އާބާދީ ދަށަށްދާކަމުގައި ، މިދިޔަ ޖެނުއަރީމަހު ، ޗައިނާއިންވަނީ ފުރަތަމަ ފަހަރަށް ހާމަކޮށްފައެވެ. ޖެނުއަރީމަހު ، ޗައިނާގެ އާބާދީ ލަފާކޮށްފައިވަނީ ، 1.412 ބިލިއަނުގައެވެ. މިއީ އިންޑިއާގެ އާބާދީއަށްވުރެ ކުޑަ ޢަދަދެކެވެ.

އެހެންނަމަވެސް ، އިންޑިއާގެ އާބާދީވެސް ދަށަށްދާކަމުގެ ނިޝާންތައް އަންނަނީ ފެންނަމުންނެވެ. އިންޑިއާގެ އާބާދީ އިތުރުވެގެންދާނެކަމަށް ލަފާކޮށްފައިވަނީ ކުރިޔަށް އޮތް 30 އަހަރުދުވަހުގެ ތެރޭގައެވެ. 2050 ވަނައަހަރު އަންނައިރު ، އިންޑިއާގެ އާބާދީ ލަފާކުރެވެނީ 1.668 ބިލިއަނުގައެވެ. ކުރިޔަށް އޮތް 30 އަހަރަކީ ،  ދުނިޔޭގެ އާބާދީ އެންމެ ބޮޑު އަނެއް ދެޤައުމުކަމުގައިވާ ޗައިނާއާއި އެމެރިކާގެ އާބާދީ ދަށަށްދާނެކަމަށް ، ނުވަތަ އާބާދީ އިތުރުވުމުގެ ނިސްބަތް މަދުވާނެކަމަށް ބެލެވޭ މުއްދަތެކެވެ.

އިންޑިއާގެ އާބާދީ އިތުރުވިޔަސް ، ވިސްނަންޖެހޭ އެހެން ކަންތައްތަކެއް އެބަހުއްޓެވެ. އެއީ އިތުރުވަމުންދާ އާބާދީ ބެހިގެންދާ ގޮތެވެ. އިންޑިއާގެ އާބާދީގެ 43 އިންސައްތަޔަކީ 25 އަހަރުންދަށުގެ ޒުވާނުންނެވެ. ދުވަސްވީމީހުންގެ އާބާދީ އިތުރުވަމުންދާ ، ޗައިނާއާއި އެމެރިކާއަށް ބަލާއިރު ، އިންޑިއާއަކީ ، އާބާދީގެ ބޮޑުބައެއް ، ނިސްބަތުން ޒުވާން ޤައުމެކެވެ. އދ ގެ ތަފާސް ހިސާބުތަކަށްބަލާއިރު ، އިންޑިއާގެ އާބާދީގައި 65 އަހަރުންމަތީގެ ނިސްބަތަކީ 7 އިންސައްތައެވެ. އެއާޚިލާފަށް ، ޗައިނާގެ 65 އަހަރުންމަތީގެ އާބާދީގެ ނިސްބަތަކީ 14 އެވެ. އެމެރިކާގެ އާބާދީގައި 65 އަހަރުންމަތީގެ އާބާދީގެ ނިސްބަތަކީ 18 އިންސައްތައެވެ. އާބާދީގެ ރޮނގުން އިންޑިއާއަށް އުއްމީދު ކުރެވޭ ކުރިއެރުމަކީ މިޢަދަދުތަކެވެ.

މަސައްކަތްކުރާ ޢުމުރުގެ ޢާންމު ފަރުދުން އިތުރުވަމުންދާއިރު ، އިންޑިއާގެ އިޤްތިޞާދު ކުރިއަރައި ދިއުމުގައި ، އެމީހުންގެ ދައުރަކީ ވަރަށް މުހިންމު ބަހާއެކެވެ. އޭގޭ އަސަރު މުޅިދުނިޔެއަށްވެސް ފޯރާނެއެވެ. މިޙާލަތުގައި ޗައިނާވެސް އިންޑިއާއާ އެއްފަދައެވެ. ދުނިޔޭގެ އުފެއްދުންތަކުގެ ހަބަކަށް ޗައިނާ ހެދުމުގައި ، ދުނިޔޭގެ ތެރެޔަށް އުފެއްދުންތައް ބެހިގެންގޮސް ޗައިނާގެ މައްޗަށް ބަރޯސާވާ އިޤްތިޞާދުތައް ، ދުނިޔޭގެ އެކިކަންކޮޅުގައި ފެށިގެންދިއުމަކީ ހެޔޮ ފާލެކެވެ. 1978 ގައި ، ޗައިނާގެ އިޤްތިޞާދީ އިޞްލާޙީ ބަދަލުތައް ގެނެވުނުއިރު ، އެޤައުމުގެ އާބާދީގެ 60 އިންސައްތަޔަކީ ، 14 އަހަރާއި 54 އަހަރާ ދެމެދެވެ. އޭގެފަހުން ، އާބާދީ އިތުރުކުރުމުގެ ފިޔަވަޅުތަކުގެ ހެޔޮ ނަތީޖާފެނި ، އާބާދީ އިތުރުވަމުން ގޮސްފައި ވެއެވެ.

އެހެންނަމަވެސް ، ހަމައެކަނި ، މަސައްކަތްތެރި ޒުވާން އާބާދީއެއް އޮތުމަކުން ، ޤައުމެއްގެ އިޤްތިޞާދަށް އޭގެ ފައިދާއެއް ނުކުރާނެއެވެ. ޗައިނާއިންވަނީ ، ޢުމްރާނީ ތަރައްޤީއާއި ، ރަސްމީ ތަޢުލީމާއި ފަންނީ ތަޢުލީމަށް ބޮޑުހޭދައެއް ކޮށްފައެވެ. ހަމައެއާއެކު ، ބޭރުގެ ވިޔަފާރިތަކަށް ފައިސާވެރިންގެ ޝަޢުޤު އުފެދޭފަދަ ސިޔާސަތުތަކެއް ތަޢާރުފްކޮށް ، އިޤްތިޞާދީ ނިޒާމްވަނީ ހަރުދަނާ ކޮށްފައެވެ.

އިންޑިއާއިންވެސް ، އިތުރުވަމުންދާ ޒުވާނުންގެ އާބާދީއަށް ބޭނުންވާ ވަޒީފާގެ ފުރުޞަތު ކަށަވަރުކޮށްދޭން ޖެހެއެވެ. އެކަމަށް ބޮޑެތި ހޭދަތަކެއް ކުރަން އެބަޖެހެއެވެ. ބައެއް ދިރާސާގެ މައްޗަށް ބިނާކޮށް ،  މާހިރުން ލަފާކުރާގޮތުގައި 2030 އާ ހަމަޔަށް ، އިންޑިއާއިން 140 މިލިއަން ، ވަޒީފާ އަލަށް އުފައްދަން ޖެހެއެވެ. މިއަހަރުގެ ތެރޭގައި އެކަމަށް 122.3 މިލިއަން ޑޮލަރު ޚާރަދުކުރާނެކަމަށް ، ޕްރައިމް މިނިސްޓަރ ނަރެންދުރަ މޯދީގެ ސަރުކާރުންވަނީ ހާމަކޮށްފައެވެ. މިއީ ، މަގުހެދުމާއި ސްކޫލްތައް ބިނާކުރުން އަދި އުފެއްދުންތެރިކަން ކުރިއެރުވުމަށް އަމާޒުކޮށް ، އިތުރު ވަޒީފާ އުފެއްދުމަށް ފުރުޞަތު ހުޅުވައިދޭނެ ކަމެކެވެ. މީގެއިތުރަށް ، މުދާ އުފެއްދުމުގެ ދާއިރާ ހަރުދަނާކުރުމަށްވެސް ، މޯދީގެ ސަރުކާރުންވަނީ މަސައްކަތްތަކެއް އިތުރަށް ފަށާފައެވެ. އެތެރޭގެ އުފެއްދުންތަކުގެ މިހާރުގެ ޖީޑީޕީއަކީ 14 އިންސައްތައެވެ. މިނިސްބަތް އިތުރުކުރުމަކީ ، ވަރަށް މުހިންމު ކަމެކެވެ. އެތެރޭގެ އުފެއްދުން އިތުރުކުރުމަށް ހިފާފައިވާ އަމާޒުގެ ތެރެއިން ، އިންޑިއާގައި ޤާއިމްކުރެވިފައިވާ ބޭރުގެ ވިޔަފާރިތަކަށް ، މާލީ ލުއިތައް ތަނަވަސްކޮށްދެމުން އެބަގެންދެއެވެ. މިކަމާގުޅިގެން ، އެތެރޭގެ އުފެއްދުންތައް އިތުރުވެގެންދާނެއެވެ.

ޗައިނާގެ އާބާދީއަށް ބޭނުންވާ ހުނަރާއި ފަންނު އަދި ވަޒީފާގެ ދާއިރާއިން ،  ޗައިނާގެ ހުޅުވިފައިވާ އިޤްތިޞާދީ ، އިޞްލާޙީ ދަތުރު އިންޑިއާއާ ތަފާތެވެ. އާދައިގެ ވަޒީފާއާއި މަސައްކަތުމީހުން އުފެއްދުމަށްވުރެ ، ފަންނީ އަދި ހުނަރުވެރި މަސައްކަތަށް ބިނާވާ ވަޒީފާގެ ބާޒާރެއް އިންޑިއާއިން އުފެއްދުމުގެ މުހިންމުކަން ބޮޑުވަނީ މިސަބަބަށްޓަކައެވެ. ޗައިނާގެ ތާރީޚާއި އެތާރީޚުން ނެރެފައިވާ ނަތީޖާއިން ، އިންޑިއާ ފިލާވަޅު ލިބިގަންނަން ޖެހެއެވެ. އެހެންނޫނީ ، އިންޑިއާގެ ވަޒީފާގެ ބާޒާރަށް ބޮޑުލޮޅުމެއް އަންނާނެއެވެ. އަދި އެލޮޅުން އަންނާނީވެސް އެއްވެސް އެނގުމަކާ ނުލައެވެ. އިންޑިއާގައިވެސް ، އުފެއްދުންތެރިކަމުގެ ދާއިރާގެ މިސްރާބުހުރީ ޒަމާނީ އާ ވަޞީލަތްތަކާއި ޑިޖިޓަލް ޓެކްނޮލޮޖީއަށް އަމާޒު ހިފާފައެވެ. ޑިޖިޓަލް ޓެކްނޮލޮޖީއާއި އާރޓިފިޝަލް އިންޓެލިޖެންސް ، އަދި ރޮބޮޓްގެ ވަޞީލަތްތައް ފުރިހަމަވެފައި އޮތުމަކީ ، އަލަށް އުފެދެމުންދާ މަސައްކަތްތެރި ޖީލަށް ކޮންމެހެން ބޭނުން ކަމެކެވެ. އިންޑިއާ ސަރުކާރާއި އަމިއްލަ ފަރާތްތަކުން ، ބޮޑުހޭދައެއްކޮށް ، މަސައްކަތެރި އާޖީލަށް އެފުރުޞަތު ހޯދައިދީ ، އެޖީލު ވަޒީފާއަށް އަހުލުވެރިކުރުމަކީ ކޮންމެހެން ކުރަންޖެހިފައި އޮތް ކަމެކެވެ. މިކަމަށް ދެބަސްވާނެ މީހަކު ނުހުންނާނެއެވެ.

އިންޑިއާއިން މިހާރުވެސް ވަނީ ، ޑިޖިޓަލް އަފި ފައިނޭންޝަލް ޓެކްނޮލޮޖީއަށް ބޮޑެތި ހޭދަތަކެއް ކޮށްފައެވެ. އެކަމަކު ، ކޮލެޖާއި ޔުނިވަރސިޓީން ކިޔަވައިގެން ނުކުންނަ ޒުވާން ޖީލުގެ ކިބައިގާ ، ޤައުމު ކުރިއަށް ނެރުމަށް ބޭނުންވާ ފަންނާއި ހުނަރު އެބަހުރިކަން ކަށަވަރުކުރުމަކީ ، އިންޑިއާގެ މުސްތަޤްބަލްގެ އިކޮނޮމީއަށް ކޮންމެހެންވެސް މުހިންމު ކަމެކެވެ. މިސާލަކަށް ، އިންފޮމޭޝަން ޓެކްނޮލޮޖީގެ ދާއިރާގައި ދުނިޔޭގެ އިސްސަފަށް ނުކުމެ ، ބަސްކިއުމަށްޓަކައި ، " އިންޑަސްޓްރީ 4.0 " ގައި ފައިތިލަ ސާބިތުކޮށް ، އިސްދައުރެއް އަދާކޮށް ، އިންޑިއާއަށް ޙައްޤު މަޤާމު ހޯދުމަކީ މުހިންމު ކަމެކެވެ.

ދުނިޔޭގެ އެންމެ މީހުންގިނަ ޤައުމުގެ ގޮތުގައި އިންޑިއާ ވެގެންދާއިރު ، ދުނިޔެއަށް ބަސްކިޔައި ، ދުނިޔޭޣެ އިޤްތިޞާދުގައި އިންޑިއާ އަދާކުރަންޖެހޭ ދައުރަކީ ތަފާތު ދައުރެކެވެ. އެމެރިކާއާއި ޗައިނާއާ ދެމެދު އެކިދާއިރާގައި އުފެދެމުންދާ ހަމަނުޖެހުމާއި ކޯޅުންތަކުގައި ، މުދާ އުފައްދާ ކުންފުނިތަކުން ، " ޗައިނާ ޕްލަސވަން " އާމެދު ވިސްނަމުން އެބަގެންދެއެވެ. އެބައިމީހުން ޗައިނާދޫކޮށްލުމުގައި ހަމައެކަނި ވިސްނަނީ ، މުދާ ބޭނުންކުރާނެ ބޮޑު އާބާދީއެއް އޮތުމަށް އެކަންޏެއްނޫނެވެ. އަދި ޗައިނާގައި ޤާއިމްކުރެވިފައިވާ ޢުމްރާނީ ވަޞީލަތްތަކަށް އެކަންޏެއްވެސް ނޫނެވެ. އުފެއްދުންތައް ބަދަލުކޮށް ، އެހެން ޤައުމުތަކުގައި އެބައިމީހުންގެ ކާރުޚާނާތައް ޤާއިމްކުރުމަށްވެސް އެމީހުން ވިސްނައެވެ.

ލިބިފައިވާ ބޮޑުއާބާދީގެ ޙިމާޔަތުގައި އެފުރުޞަތު ބޭނުންކޮށް ، އިންޑިއާއަކީ މުދާ އުފެއްދުމާއި ޓެކްނޮލޮޖީގެ މައިމަރުކަޒަކަށް ހެދުމަށް އޮތް ފުރުޞަތު ތަނަވަސްކުރުމަކީ ، މުހިންމު ކަމެކެވެ. މިސާލަކަށް ، އިންޑިއާގައި އެޕަލްގެ އުފެއްދުންތައް މަރުކަޒުކުރުމަށް އެޕަލްއިންވަނީ ދާދި މިދާކަށްދުވަހު ނިންމާފައެވެ. ކުރިން ، އިންޑިއާގައި އެޕަލްއިން އުފައްދަމުން ގެންދިޔައީ ، ހަމައެކަނި ، އެޕަލްގެ އަގުހެޔޮ ފޯނެވެ. އެޕަލް ފޯނުގެ ހުރިހާ ބައިތަކެއް އުފައްދަމުން ގެންދިޔައީ ޗައިނާއިންނެވެ. އެހެންނަމަވެސް އެކުންފުނީގެ އަގޮބޮޑު ފޯނާއި އެހެނިހެން އުފެއްދުންތައް ، މިހާރުދަނީ އިންޑިއާގައި އުފައްދަމުންނެވެ. ސަމްސުން އާއި ޗައިނާގެ ހޭއަރ ފަދަ މަރުކާތައް ނިސްބަތްވާ ބޮޑެތި ކުންފުނިތަކުންވެސް ، އިންޑިއާގައި އެބައިމީހުންގެ އުފެއްދުންތައް މިހާރުގެންދަނީ މަރުކަޒު ކުރަމުންނެވެ.

އިންޑިއާއިން ، ދުނިޔޭގެ އެންމެ ބޮޑުއާބާދީއަށްވެ ، ދުނިޔެއިން ހުޅުވޭ ފުރުޞަތުގެ ނަފާ ޙާޞިލް ކުރުމާއި ، އެހުރިހާ މަންފާއަކުން އެކަހެރިވެ ، އިޤްތިޞާދީ މަންފާއެއްނެތް ކާރިސާއަކާ ކުރިމަތިލުން ބިނާވެފައި އޮތީ ، އިންޑިއާގެ އާބާދީއާއި ޢުމްރާނީ ތަރައްޤީއަށް ކުރާ ހޭދައާއި ރާވާ ، މުހިންމު ރޭވުންތަކެއްގެ މައްޗަށެވެ.

( މަޢުލޫމާތު :  އިންސްޓިޓިއުޓް އޮފް ސައުތު އޭޝިއަން ސްޓަޑީޒް / ނެޝަނަލް ޔުނިވަރސިޓީ އޮފް ސިންގަޕޯރ)