ބްލޫ ރިބަން: ތިންމުގޯލި

ދޮންބެއްޔާހުރީ ، އޮއްސެންދާއިރަށް ބަލަހައްޓައިގެންނެވެ. ކަނޑިންމަ މައްޗަށް އައި ލޯންޗަކުން މީހަކު ފުންމައިލިތަން ފެނުމާއެކު ދޮންބެއްޔާ ކަންބޮޑުވިއެވެ. އަދި އެމީހާއަށްވާގޮތެއް ބަލަން ކައިރީގައިހުރި މީހަކަށް އެންގިއެވެ. ނަސީބަކުން ލޯންޗުން ފުންމައިލިމީހާ ފަތައިގަތީ ރަށާ ދިމާލަށެވެ. ކަނޑިންމަމަތީ ނަގާފައިހުރި ގޮށްރާޅުތައް އޭނާއަށް ނުފެންނަނީކަންނޭނގެއެވެ. ވަރަށް މަސައްކަތުން ، މަރަށް ފުރާނަޔަށް ފަތާފައި އައިސް އެމީހާ ގޮނޑުދޮށަށް ބީއްސައިލިއެވެ. އިރުއޮއްސި އަނދިރިވެލާފައި އޮތީމަ އެއީ ކާކުކަން ، ދޮންބެއްޔާއަކަށް ވަތްކެއް ނުކުރެވުނެވެ.

އެއީ ކާކުތޯ ، ކައިރީހުރި މީހެއްގާތު ، ދޮންބެއްޔާ އަހައިލިއެވެ. އޭނާއަށް ފެންފުޅިއެއް ދިއްކޮށްލަންވެސް ބުންޏެވެ. ފަތާފަތާ ވަރުބަލިވެގެންގޮސް އެމީހާހުރީ ގުނބުހިލިފައެވެ. އެއްފިޔަވަޅު ކުރިޔަށް އެޅިއްޔާ ދެފިޔަވަޅު އެޅެނީ ފަހަތަށެވެ. އެންމެފަހުން ކުރިޔަށް ނުކަނޑައިގެން ، ވަރުބަލި ފިލުވައިލަން ، ރާޅުފަށުގައި އޭނާ އިށީނދެލިއެވެ. ގޮލާކަނަށްތިންރާޅު އެރިފަދައެވެ. ތުންގަނޑު ބިމަށްހަރައިގެން އެތައް އިރަކު އިންއިރުވެސް ، އެއީ ކާކުކަމެއް ، އެތާތިބި އެއްވެސް މީހަކަށް ނޭނގުނެވެ.

އެއީ އެއްކަލަ މައިބަދަބިންދާލި މީހާއެވެ ! އެތަނުން މީހަކު ބުންޏެވެ. އެވަރަކުންވެސް އެތާތިބި މީހުންނަކަށް އެއީ ކާކުކަމެއް ނޭނގުނެވެ. އެމީހަކު ޅަދުވަހު ، ތިންމުގޯލިކުޅެން އުޅެފަ ޖެހިބޯޅައެއް ހިފައި ނުބައިކޮށްލި ކުއްޖާގެ މައިބަދައިގާ ، ފިލާގަނޑުން ޖެހީއެވެ. އެކުއްޖާފަކީރުގެ މައިބަދަ ބިންދައިގެންގޮސް ، ރުއްގަލުބޭސްކޮށްވެސް ރަނގަޅު ނުވެގެން ، ކިރިޔާ ބުރަކަށި ތެދުކޮށްލެވޭވަރުވީ ވިލާތަށް ފޮނުވައިގެން ބޭސްކުރި ފަހުންނެވެ.

ގޮނޑުދޮށުގައި އިންމީހާ ކުޑަކޮށް ހިންދެމިލާފައި ތެދުވެ ރަށަށް އެރިއެވެ. އެއީ ކޮންމެވެސް މީހެއްގެ ބޯކައިލައިގެން ހޮވި ، ރަށެއްގެ ކައުންސިލްކަންވެސް ކުރި މީހެކެވެ. އެކަމެއްވެސް ނުކުރެވުނެވެ. ކޮންމެ އިންތިޚާބެއްގައި މިގޮތަށް ފެނިލާނެއެވެ. ރަށުގެ ދެފަސްބެދޭހިސާބަށް އަރައި ބުމަރެއްހެން ، އެމީހާ އެނބުރިލިއެވެ. ދާނެ މިސްރާބެއް ނޭނގިގެންނެވެ. ރަށަށް އެރީ ، މިދަނީ އާމިސްރާބަކަށޭ ކިޔާފައެވެ. އެކަމަކު އެ މިސްރާބެއް އޭނާއަކަށް ނުފެނުނެވެ. އެމީހަކު އެތާހުރެ ތެޅީ ހުސް އަނގައެވެ. ކެނޑީ ހުސް ފޮންޏެވެ. ޢަމަލާއިބަހާ ދިމާވެދާނެކަމުގެ ޔަޤީންކަން ސާބިތުކޮށެއް ނުދެވުނެވެ. އެމީހަކު ތިންމުގޯލި ކުޅެންއަރާ ، ބޯޅަޖަހާތަނުން ، ދުވަންއޮންނަ ތަނުގެ ދޮޅުޕަސެންޓަށްވެސް ނުދުވެވެނިސް އިދިކޮޅުން ބޯޅަހިފާ ބައިއެއްކޮށް ، ނުބައިކޮށްލައެވެ. ނުބައިވެގެން ބާތިލްވެފަތިބިމީހުން ދުވިހިސާބަށްވެސް ނުދުވެވެއެވެ.

މިފަހަރުވެސް ، މޮޅުކަމެއް ކޮށްލާނަމޭ ހިތައި ލޯންޗުން ފުންމާލައި ، ތެމިފޯވެގެން ރަށަށް އެ އެރީ ، ކައުންސިލް އިންތިޚާބާ ދިމާކޮށް ، ބައިކޮޅަށް މީހުން ހޯދާށެވެ. ނަސީބަކުން، އުސްތަނަކަށް އަރަން ނެތީމަ ، ހަރުގަނޑެއް ނުގެނެއެވެ. އެމީހަކު ދަންނަމީހަކު އެރަށުގައި އުޅޭނަމަ ، ގައިމު ގޮނޑުދޮށަށް  އައިސް އޭނާއާ ބައްދަލު ކުރާނެތާއެވެ. ގައިގަ ޖެހޭ ހިސާބުންލާފަ ދިޔައިރުވެސް ، ދޮންބެއްޔާވެސް އެމީހަކަށް ނޭނގުނެވެ. އަދި ، ދޮންބެއްޔާއަށްވެސް އެއީ ކާކުކަމެއް ނުމެ އެނގުނު މެއެވެ. އެމީހާއަށް ދާނެ މިސްރާބު އޮޅި ، ރަށުން އެއްވެސްމީހަކާ ބައްދަލުވެސް ނުކޮށް ، ރަށަށް އެރިގޮތަށް ތެތްނުބާލައި ، ޗޮކެއް ކަނޑާފައި ރަށުންފައިބައިގެން ހިނގައްޖެއެވެ. ދެނަމާދު ދޭތެރެ ވީމަ ، އޭނާ ހޯދަން އެއައި މީހަކާ ދިމާނުވީ ތޯއްޗެކެވެ. މިކަހަލަ މޫސުން އައިމަ ، ނުމެޢީދަކު ނުމެރޯދަޔަކު ރަށަށް އަރައި ފައިބައި ، ތިންމުގޯލި އަޅާމީހުންވެސް އުޅޭނެއެވެ.