ޕަޕުއާ ނިއުގިނީއަކީ ، ދެކުނު ހުޅަނގު ޕެސިފިކްގައި އޮންނަ އޯޝަނިއާގެ ޤައުމެކެވެ. ހުޅަނގުން އޮންނަނީ އިންޑޮނީޝިއާއެވެ. ދެކުނުން އޮސްޓްރޭލިއާއެވެ. ދެކުނު އިރުމަތިން ސޮލޮމޮން އައިލޭންޑްސްއެވެ. ޖެނުއަރީ 2023 ގައި ޕަޕުއާ ނިއުގިނީގެ އާބާދީއަކީ ، 10.24 މިލިއަނެވެ. އާބާދީގެ 48 އިންސައްތައަކީ އަންހެނުންނެވެ.
ޕަޕުއާ ނިއުގިނީއަކީ 1884 އިން ފެށިގެން 1914 އަށް ޖަރުމަނުގެ އިސްތިޢުމާރީ އަޅުވެތިކަމުގެ ދަށުގައި އޮތް ޤައުމެކެވެ. އޭރު ބޭނުން ކުރެވުނީ ޖަރުމަން ނިއުގިނީގެ ގޮތުގައެވެ. ރަސްމީ އެއްބަސްކަމުގައިވާ ޓޮކް ޕިސިން ގެ އަޞްލަކީ ޖަރުމަން ބަހެވެ.
ޕަޕުއާ ނިއުގިނީއަކީ ކުށުގެ ރިކޯޑް ގިނަ ޤައުމެކެވެ. ވެރިކަމުގެ ނިޒާމުގެ ދޯހަޅިކަމާހުރެ ، ކަރަޕްޝަން އޮންނަނީ މުޅި ޤައުމަށް ފެތުރިފައެވެ. ކުށްކުރާ މީހުންނަށް އެކަށީގެންވާ އަދަބެއް ނުދެވެއެވެ. ސިޔާސީ ޙިމާޔަތެއްގެ ދަށުން ގިނަބަޔަކު ތިބެނީ ދޫކޮށްލެވިފައެވެ. ގޭންގް މާރާމާރީއާއި ގޭންގްތައް ގުޅިގެން ހިންގާ ބޮޑެތި ޖަރީމާތައް ، އަދި ރޭޕްކުރުމާއި ޖިންސީ އަނިޔާއަކީ ޤައުމުގައި ޢާންމުވެފައިވާ ކުށްތަކެވެ.
ދުނިޔޭގެ ޤައުމެއްގައި އެންމެ ގިނަބަހުން ވާހަކަދައްކާ އާބާދީއެއް އޮތީ ޕަޕުއާ ނިއުގިނީގައެވެ. އެޤައުމުގެ ރައްޔިތުން 850 ބަހުން ވާހަކަ ދައްކައެވެ. އެއީ ވަކިވަކި 850 ބަހެވެ. އެއްބަހެއްގައި ވާހަކަ ދައްކާގޮތް ބަދަލުވެފައެއް ނޫނެވެ. އެކަމަކު ، ގިނަބަސްބަހުން ވާހަކަ ދައްކާ މީހުންގެ ޢަދަދު ހާހަކަށްވެސް ނާރައެވެ. ނިސްބަތަށް ބަލާއިރު ، ކޮންމެ ބާރަހާސް މީހަކަށް ބަހެކެވެ. އެއީ ވަނުއާޓޫ ނަގާފައި ދުނިޔެއިން އެންމެ ބޮޑު ޢަދަދެވެ. ވަނުއާޓޫގައި ކޮންމެ ދެހާސްމީހަކަށް ބަހެއް އޮވެއެވެ. އެކަމަކު އެޤައުމުގައި އޮންނަނީ 115 ވަރަކަށް ބަހެވެ. ޕަޕުއާ ނިއުގިނީއަށްވުރެ ބަހުގެ ޢަދަދު އެތައްގުނައެއް މަދެވެ.
ޕަޕުއާ ނިއުގިނީގެ އާބާދީގެ އެންމެ ގިނަބަޔަކު ވާހަކަ ދައްކަނީ އެންގާ ބަހުންނެވެ. އެބަހުން ވާހަކަދައްކާ ދެލައްކަ މީހުން އުޅެއެވެ. ޤައުމުގެ މާދަރީބަސް ބެހިގެންވަނީ މައިގަނޑު ދެބަޔަކަށެވެ. އޭގެ ތެރޭގައި އެންމެ ކުރީގައި އޮންނަނީ އޮސްޓްރޮނީޝިއަން ބަހެވެ. މިބަހަކީ މީގެ 3،500 އަހަރުކުރިން އެޤައުމަށް ހިޖުރަކުރި ބަޔެއްގެ ފަރާތުން އައި ބަހެކެވެ.
ޕަޕުއާ ނިއުގިނީގެ ރަސްމީ 4 ބަހެއް އޮވެއެވެ. އެއީ އިނގިރޭސި ބަހާއި ، ޓޮކް ޕިސިން ، ހިރިމޮޓޫ އަދި ޢިޝާރާތުގެ ބަހެވެ. ޢިޝާރާތުގެ ބަހަކީ ، މަންމަނުން ވާހަކަ ދައްކާ ބަހެވެ. މިބަސް ރަސްމީ ބަހަކަށް ހަމަޖެހުނީ 2015 ގައެވެ. އޮފީސްތަކާއި ކޯޓުތައް އަދި ތަޢުލީމީ ނިޒާމުގައި ރަސްމީ ބަހަކަށް ބޭނުންކުރަނީ އިނގިރޭސި ބަހެވެ. އެހެންނަމަވެސް އެއީ ޢާންމުކޮށް މީހުން ވާހަކަދައްކައިއުޅޭ ބަހެއްނޫނެވެ. ދުނިޔޭގެ މަޝްހޫރު ބަނދަރު ، ޕޯޓް މޮރެސްބީއަކީ ، ޕަޕުއާ ނިއުގިނީގެ ބަނދަރެކެވެ. ޕަޕުއާ މިއުގިނީގެ ބިދޭސީ މަސައްކަތުމީހުންގެ އާބާދީއަކީ އެންމެ ވިހިހާހެވެ. އެ އެންމެން ދިރިއުޅެނީ ޕޯޓް މޮރެސްބީގައެވެ.
