ރާއްޖޭގެ އެންމެބޮޑު އަމިއްލަ ހޮސްޕިޓަލް ކަމުގައިވާ އޭޑީކޭ ހޮސްޕިޓަލުން ދެމުންދާ ހިދުމަތުގެ އަގު ބޮޑުކުރަން ނިންމައިފި އެވެ.
އެ ހޮސްޕިޓަލުން ކުރައްވާފައިވާ އިއުލާނެއްގައި ވަނީ 2020 ވަނަ އަހަރުން ފެށިގެން އިގްތިސޯދަށް ކުރިމަތިވި ހީނަރުކަމާއި ގުޅިގެން އިންފްލޭޝަން ރޭޓް މަތިވެ، މުދަލާއި ހިދުމަތުގެ އަގުތައް ރާއްޖެ އާއި ރާއްޖެއިން ބޭރުން ބޮޑުވެފައިވާ ކަމަށެވެ.
އެގޮތުން އެ ހޮސްޕިޓަލް ހިންގުމުގެ ހަރަދުތައް ވެސް އެތައް ގުނައަކަށް ބޮޑުވެގެން ގޮސްފައިވާ ކަމަށާއި އެހެންވެ، ހިދުމަތުގެ އަގު ބޮޑުކުރަން ނިންމީ އެ ހޮސްޕިޓަލުން ދެމުންފާ ހިދުމަތް މެހެއްޓެނިވި ގޮތެއްގައި ރައްޔިތުންނަށް ފޯރުކޮށްދިނުމަށް ކަމަށް ވެސް އިއުލާނުގައި ވެއެވެ.
އެ ހޮސްޕިޓަލުން ވިދާޅުވީ އަގުތަކަށް ބަދަލު އަންނާނީ މި މަހުގެ 15 ދުވަހުން ފެށިގެން ކަމަށާއި ހިދުމަތްތަކުގެ އަގުތަކަށް ބަދަލު ގެނައުމަށް ނިންމާފައި ވަނީ މަރުހަލާތަކަކަށް ބަހާލައިގެން ކަމަށެވެ. އެއީ ވީހާވެސް ލުއި ގޮތަކަށް މި ބަދަލު ގެނައުމަށް ކަމަށް ވެސް ވިދާޅުވި އެވެ.
އަގުތަކަށް އައި ބަދަލުތައް އެ ހޮސްޕިޓަލުގެ ކައުންޓަރުތަކުން ލިބެން ހުންނާނެ ކަމަށް ވެސް ވިދާޅުވި އެވެ.
އެ ހޮސްޕިޓަލުން ދޭ ހިދުމަތުގެ އަގަށް ގެންނަން ނިންމާފައިވާ ބަދަލުތަކުގެ ތެރޭގައި އާންމު ބަލިތަކުގެ ޑޮކްޓަރަކަށް މީގެކުރިން 200 ރުފިޔާ ދައްކާއިރު، މި މަހުގެ 15 އިން ފެށިގެން 400 ރުފިޔާ ނެގުމަށް ނިންމާފައިވާ ކަމަށް ވަނީ މައުލޫމާތު ލިބިފަ އެވެ.
