މަސްތުވާތަކެތީގެ ބޮޑު މައްސަލައެއްގެ އިސް މީހާ ކަމަށް ފުލުހުން ތުހުމަތުކުރާ ގދ. ހޯޑެއްދޫ އަލޯރާ، އަރުޝަދު ޚާލިދު ބަންދުން ދޫކޮށްލި މައްސަލައިގައި ފުލުހުން ގޯސްތަކެއް ހަދައިފި ކަމަް ޕްރޮސިކިއުޓަރ ޖެނެރަލް (ޕީޖީ) އޮފީހުން ބުނެފި އެވެ.
އެ އޮފީހުން ބުނީ އެ މައްސަލަަ ބެލުމަށް ނޭޝަނަލް އިންޓެގްރިޓީ ކޮމިޝަނަށް އަންގައިފައިވާ ކަމަށާއި އަރުޝަދު ހާލިދު ހައްޔަރުކޮށް، ބަންދުކޮށްގެން ކޯޓަށް ހާޒިރު ކުރުމަށް ދިވެހިރާއްޖޭގެ ހައިކޯޓުން ދިވެހި ފުލުހުންގެ ހިދުމަތުގެ މައްޗަށް އަމުރުކޮށްފައި ވަނިކޮށް، ރޭ 7:45 އަށް އަރުޝަދު ހާލިދު އެ ކޯޓަށް ހާޒިރުކޮށްފައި ވަނީ ހައްޔަރުން ދޫކޮށްލައި، އެކަމާ ގުޅޭ ލިޔުމެއް އޭނާއަށް ރައްދު ކުރުމަށްފަހުގައި ކަމަށެވެ.
މި ކަމުގައި ދިވެހި ފުލުހުންގެ ހިދުމަތުން އަމަލުކޮށްފައިވާ ގޮތް ދިވެހިރާއްޖޭގެ ހައިކޯޓުގެ އަމުރާ ހިލާފު ކަމަށާއި އަރުޝަދު ހާލިދު ހައްޔަރު ކުރުމަށް ދިވެހިރާއްޖޭގެ ހައިކޯޓުން އަމުރު ނެރުމާއެކު، މި ކަމުގައި އަމަލު ކުރަންވީ ގޮތުގެ އިރުޝާދު ދިވެހި ފުލުހުންގެ ހިދުމަތަށް ދެމުންދިޔަ ކަމަށް ޕީޖީ އޮފީހުން ވަނީ ބުނެފަ އެވެ. އަދި އަރުޝަދު ހާލިދު ފުލުހުންގެ ބެލުމުގެ ދަށަށް ގެންދިއުމަށް ފަހު، އޭނާ ބަންދުން ދޫކޮށްލުމަށް އެއްވެސް އިރުޝާދެއް ދީފައި ނުވާނެ ކަމަށާއި އޭނާ ބަންދުން ދޫކޮށްލުމާ ގުޅޭގޮތުން ފުލުހުން ޕީޖީގެ ލަފަޔަކަށް އެދިފައި ވެސް ނުވާ ކަމަށް ބުނެފައި ވެއެވެ.
މިކަން ހިނގާފައި ވަނީ މައްސަލަ ތަހުގީގު ކުރާ ފަރާތާއި ތަހުގީގު ކުރި ޑިޕާޓްމަންޓަށް އެނގުމެއް ނެތި ކަމަށް މައުލޫމާތު ލިބިފައިވާ ކަމަށް ވެސް ޕީޖީ އޮފީހުން ވަނީ ބުނެފަ އެވެ.
އެހެންކަމުން، ދިވެހިރާއްޖޭގެ ހައިކޯޓުގެ އަމުރާ ހިލާފަށް އަރުޝަދު ހާލިދު ހައްޔަރުން ދޫކުރުމަށް ނިންމި، އަދި ހައްޔަރުން ދޫކޮށްލި ލިޔުން ތައްޔާރު ކުރި ފުލުސް އޮފިސަރުންގެ މައްސަލަ ބެލުމަށް ނޭޝަނަލް އިންޓެގްރިޓީ ކޮމިޝަނަށް އަންގައި، މިކަން ޕޮލިސް ބޯޑުގެ ސަމާލު ކަމަށް ވެސް ގެނެސްފައިވާ ކަމަށް ޕީޖީން ބުނެއެވެ.
މީގެ އިތުރުން މި މައްސަލައިގައި ދިވެހި ފުލުހުންގެ ހިދުމަތުގެ މުވައްޒަފުންތަކެއް ގޯސްތަކެއް ހަދާފައިވީ ނަމަވެސް، މި މައްސަލަ ދިވެހިރާއްޖޭގެ ސުޕްރީމް ކޯޓުގައި އިސްތިއުނާފު ކުރާނެ ކަމަށް ޕީޖީން ބުނެއެވެ.
