ރާއްޖޭގެ އުތުރަށް މިހާރު ޖެހެން މި ފެށީ ބޮޑު ބަދަލުގެ ހެޔޮ ރޯޅި ރާއްޖޭގެ އުތުރަށް މިހާރު ޖެހެން މި ފެށީ މި ދެންނެވި ބޮޑު ބަދަލުގެ ހެޔޮ ރޯޅި ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެ އެވެ.
ރައީސް މިހެން ވިދާޅުވީ އާރުޓީއެލް ގެ ޒޯން 1 ގެ ޚިދުމަތް "ބޮޑުތިލަދުންމަތި ގުޅާލުން" ރަސްމީކޮށް ރޭ އިފްތިތާޙް ކޮށްދެއްވާ ވާހަކަ ދައްކަވަމުން ނެވެ.
ރައީސް ވިދާޅުވީ މި ފެންނަނީ މި އަހަރުގެ މޭ މަހުގެ 29 ވަނަ ދުވަހު އަރިއަތޮޅު އުކުޅަހުގައި އެމަނިކުފާނު ހާމަކުރި ބަސްތަކުގެ ޢަމަލީ ތަރުޖަމާ ކަމަށާއި އުކުޅަހުގެ އެ ދުވަހާއި ދިއްދޫގެ މި ދުވަހާ ދެމެދު އަދިކިރިޔާ މިވީ 4 މަސްދުވަސް ކަމަށެވެ.
"އެ ދުވަހު އަޅުގަނޑު ދެންނެވިން، ސަރުކާރުގެ ހުރިހާ ސިޔާސަތުތަކަކާއި އަމާޒު ގޮސް ނިމޭ ވަކި ޚާއްޞަ ދިމާއެއް އޮންނަ ވާހަކަ. މާނަވީ ޖަޒީރާ ރާއްޖޭގެ އަމާން ބަނދަރު ހިފުމަށްޓަކައި ދާންޖެހޭ މަގަކާއި، ވާންޖެހޭ ކަންތައްތަކެއް ހުރި ވާހަކަ." ރައީސް ވިދާޅުވި އެވެ.
ބޮޑުތިލަދުންމަތީގެ މި ބޮޑު ބަދަލާ އެއްގޮތަށް، މުޅި ރާއްޖޭގެ ހުރިހާ ރަށެއް ގުޅައިލުމަށް ބޭނުންވާ މިފަދަ ޒަމާނީ އިތުރު 65 އުޅަނދު ބަނުމުގެ ކޮންޓްރެކްޓް ހަވާލުކުރެވި، އެ މަސައްކަތް ހިނގަމުންދާ ކަމަށް ވެސް ރައީސް ވިދާޅުވި އެވެ.
ރަށްތައް ގިނަޔަސް، އުޅަނދުތަކުގެ ޢަދަދު މައްޗަށް، މިކަމުގައި ފަސްޖެހި ލަސްކުރެވޭކަށް ނެތް ކަމަށާއި ސަބަބަކީ ބޮޑުތިލަދުންމައްޗަށް ގެނެވުނު މި ބޮޑު ބަދަލު، ހަމަހަމަކަމާއެކު މުޅި ރާއްޖެއަށް ނުގެނެސް، މާނަވީ ބަދަލެއް ރާއްޖެއަށް އަންނާނެތޯ؟ ވެސް ރައީސް ވަނީ ސުވާލު ކުރައްވާފަ އެވެ.
ރައީސް ސާލިހު ވިދާޅުވީ ރައްޔިތުން ފުދުންތެރިވެވޭނީ ހެލިފެލިވެ ފުރާ ދުއްވިގެން ކަމަށާއި ގޮސް އައިސް ވެވިގެން ކަމަށެވެ. އަދި އާރު.ޓީ.އެލް.ގެ ޖީބަށް ލުއި، އަރާމު ބާރު ދުވެއްޔަކީ، އިޤްތިޞާދީ ޙަރަކާތް އެތައް ގުނައެއް އިތުރުވާނެ ކަމެއް ކަމަށް ވެސް ވިދާޅުވި އެވެ.
