ބްރޯޑްކާސްޓިންގ ދާއިރާގެ ލައިފްޓައިމް އެޗީވްމެންޓް އެވޯޑު ސަމަރްބުލޫ އިބްރާހިމް މަނިކު އަދި މަރްހޫމް ޒާހިދާ އިބްރާހިމް (ޒާހިދައްތަ) އަށް އަރުވައިފިއެވެ.
މި ބޭފުޅުންނަށް މި އެވޯޑު އަރުވާފައިވަނީ މިރޭ ބޭއްވި ބްރޯޑުކާސްޓިންގ އެވޯޑު ހަފުލާގައެވެ.
ސަމަރްބުލޫ އިބްރާހިމް މަނިކު، ރާއްޖޭގެ ބްރޯޑްކާސްޓިންގ ދާއިރާގައި 32 އަހަރުގެ ޚިދުމަތް ކުރައްވާފައިވާއިރު، އެންމެ ގިނަދުވަހު ޚިދުމަތްކުރައްވާފައިވަނީ ރޭޑިއޯ ދާއިރާގައެވެ. އަދި އޭނާ ވަނީ ބްރޯޑްކާސްޓިންގ ދާއިރާއަށް މީހުން ބިނާ ކުރެއްވުމުގައި ވެސް ގިނަ ޚިދުމަތްތަކެއް ކުރައްވާފައެވެ.
ދިވެހިރާއްޖޭގެ އަޑުން މިހައިތަނަށް މެދުނުކެނޑި ރޭޑިއޯއިން ފޮނުވަމުން އަންނަ ހަމައެކަނި ޕްރޮގްރާމް ކަމަށްވާ "ބާއްޖަވެރި ހެނދުނެއް" ސަމަރޭގެ މޭސްތިރިކަމުގައި ފަށައި، އަދި އެ ޕްރޮގްރާމް ހުށަހެޅުމުގައި ވެސް އިސްދައުރެއް އަދާ ކުރައްވާފައިވެއެވެ.
މީގެ އިތުރުން 2001 ވަނަ އަހަރު ސަރުކާރުން ދެއްވާ ޚާއްސަ އިނާމު ވެސް ހާސިލް ކުރައްވާފައިވާ ސަމަރްބުލޫ އިބްރާހިމް މަނިކު ވަނީ ބްރޯޑްކާސްޓިންގ ދާއިރާއަށް ޕްރޮގްރާމްތައް އުފެއްދެވުމާއި މީހުން ބިނާ ކުރެއްވުމާއި ފޮތް ލިއުންވުމުގެ ދާއިރާގައި ފާހަގަކޮށްލެވޭ ފަރާތެކެވެ.
އަލްމަރްހޫމާ ޒާހިދާ އިބްރާހިމް (ޒާހިދައްތަ) އެންމެބޮޑަށް ފާހަގަކުރެވިފައިވަނީ ހަފްތާ ބަނދުގައި ގެނެސްދޭ ކުޑަކުދިންގެ ވާހަކަ 'އެބައުޅޭ އެބައުޅޭ' ޕްރޮގްރާމުންނެވެ. ޢުމުރުގެ ބޮޑުބައި ބްރޯޑްކާސްޓިންގ ދާއިރާގައި ހޭދަކުރެއްވި ޒާހިދައްތަގެ އަޑަކީ އެންމެންނަށް ވެސް އަޑުއަހާލަން ފަސޭހަ އަދި މިހާރު ވެސް އެ އަޑެއް އަހާލަން ބޭނުން އަޑެއްގެ ވެރިފަރާތެކެވެ.
މަރްހޫމާ ޒާހިދައްގެ ފަރާތުން މި އެވޯޑާއި ހަވާލުވެލެއްވީ ޒާހިދާއައްތަގެ ދަރިކަނބަލުން އައިޝަތު ޝިޔާރާ އެވެ.
ރާއްޖޭގައި ބްރޯޑްކާސްޓިންގ ގެ ދާއިރާ އުފަންވިތާ 60 އަހަރު ފަހުން މި އެވޯޑު ބާއްވާފައިވާއިރު، މިއަހަރުން ފެށިގެން ކުރިޔަށް އޮތްތަނުގައި ބްރޯޑްކާސްޓިންގ ދާއިރާގެ އެވޯޑް ދިނުމަށް ބްރޯޑްކާސްޓިންގ ކޮމިޝަނުން ވަނީ ނިންމާފައެވެ.
