ބްރޯޑްކާސްޓިން ކޮމިޝަނުން ހުސްވެފައިވާ ދެ މަޤާމަށް ކުރިމަތިލި 36 މީހެއްގެ ނަން އިސްކަންދެއްވާ ތަރުތީބު ބަޔާކޮށް ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހް މަޖިލީހަށް ފޮނުއްވައިފި އެވެ. މިމައްސަލަ މަޖިލީހުގެ މިރޭގެ ޖަލްސާގެ ތަޅުމަށް ހުށަހެޅުމަށްފަހު ދިރާސާކުރަން ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީ އަށް ވަނީ ފޮނުއްވައިފއެވެ. ރައީސުލް ޖުމްހޫރިއްޔާ އިސްކަން ދެއްވި ތަރުތީބުގައިވާ ގޮތުން އެންމެ ކުރީގައި އުޅެނީ ސަންގު ޓިވީގެ ޕްރެޒެންޓަރު ޝިފްލާ އިބްރާހިމާއި ގ. ޑޭޒީފަހި، މުހައްމަދު ހިލްމީއެވެ. މި ދެބޭފުޅުންގެ އިތުރުން ރާއްޖޭގެ މަޝްހޫރު ނޫސްވެރިންނާއި ޕްރެޒެންޓަރުން ވަނީ މި ދެމަޤާމަށް ކުރިމަތި ލައްވައިފައެވެ.
ބްރޯޑްކާސްޓިން ކޮމިޝަނުން ހުސްވެފައިވަނީ އެކޮމިޝަނުން އިސްތިއުފާ ދެއްވީ ކުރީގެ ނައިބު ރައީސް އިސްމާޢީލް ސޮފްވާނާއި މެމްބަރ ޙަސަން ނަބާހުގެ މަޤާމެވެ. އެ ކޮމިޝަންގެ ރައީސް މުހައްމަދު ޝަހީބާއި ނައިބު ރައީސް ފާތުމަތު ޒައިނާ މަޤާމުން ވަކިކުރެއްވުމަށް ވަނީ ނިންމައިފަ އެވެ.
މިއީ، މަޤާމަކަށް އައްޔަންކުރެއްވުމަށް އެހާ ގިނަ ޢަދަދެއްގެ ބޭފުޅުންގެ ނަން ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވި ފުރަތަމަ ފަހަރެވެ.
