ފާއިތުވި މާރިޗު މަހު ދައުލަތަށް ލިބުނު އާމްދަނީ 2021 ވަނަ އަހަރުގެ މާރިޗު މަހާ އަޅާބަލާއިރު 21 އިންސައްތަ އިތުރުވެފައިވާ ކަމަށް މޯލްޑިވްސް ކަސްޓަމްސް ސަރވިސްގެ ތަފާސް ހިސާބުން ދައްކައިފިއެވެ.
ކަސްޓަމްސްގެ ތަފާސް ހިސާބުން ދައްކާގޮތުގައި 2021 ވަނަ އަހަރުގެ މާރިޗު މަހު ދައުލަތަށް ލިބިފައިވަނީ 264 މިލިއަން ރުފިޔާއެވެ. މި އަހަރުގެ މާރިޗު މަހު މި ޢަދަދުވަނީ 319 މިލިއަން ރުފިޔާއަށް އިތުރުވެފައެވެ.
މީގެ އިތުރުން ފާއިތުވި މާރިޗު މަހު ރާއްޖެއަށް އިމްޕޯޓް ކުރެވުނު މުދަލުގެ ސީ.އައި.އެފް އަގު 2021 ވަނަ އަހަރުގެ މާރިޗު މަހާ އަޅާބަލާއިރު 15 އިންސައްތަ ވަނީ އިތުރުވެފައިވާ ކަމަށް ވެސް ދައްކައެވެ.
ކަސްޓަމްސްގެ ތަފާސް ހިސާބުން ދައްކާ ގޮތުގައި މިދިޔަ 2021 ވަނަ އަހަރުގެ މާރިޗު މަހު ދިވެހިރާއްޖެއަށް އިމްޕޯޓް ކޮށްފައިވަނީ 3.4 ބިލިއަން ރުފިޔާގެ މުދަލެވެ. މި އަހަރުގެ މާރިޗު މަހު މި ޢަދަދުވަނީ 3.9 ބިލިއަން ރުފިޔާ އަށް އިތުރުވެފައެވެ.
ފާއިތުވި މަހު ދިވެހިރާއްޖެއަށް އެންމެ ގިނައިން މުދާ އެތެރެކޮށްފައިވާ ގައުމުތަކަކީ އޮމާން، ޔޫ.އޭ.އީ އަދި އިންޑިއާ އެވެ.
އޮމާނުން 637 މިލިއަން ރުފިޔާގެ މުދާ އެތެރެކޮށްފައިވާއިރު، ޔޫ.އޭ.އީ އިން 628 މިލިއަން ރުފިޔާގެ މުދާ ވަނީ އެތެރެކޮށްފައެވެ. އަދި އިންޑިއާ އިން 543 މިލިއަން ރުފިޔާގެ މުދާ ފާއިތުވި މަހު ވަނީ އެތެރެކޮށްފައެވެ.
