ވޭތުވެދިޔަ އަހަރާ އަޅާބަލާއިރު، މިއަހަރު މިހާތަނަށް އަރިދަފުސް ރޯގާ ޖެހިގެން ރިޕޯޓު ކޮށްފައިވާ އަދަދު އިތުރުވެއްޖެ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭ އިން ބުނީ ޑެންގޫ ހުމަށް ބަލާއިރު މިދިޔަ ފެބްރުއަރީ މަހު 24 ކޭސް ރިޕޯޓް ކޮށްފައިވާއިރު، މިދިޔަ މާރޗު މަހު ރިޕޯޓުކޮށްފައިވަނީ 26 ކޭސް ކަމަށެވެ. އަދި ވޭތުވެދިޔަ އަހަރާ އަޅާބަލާއިރު، މިއަހަރު މިހާތަނަށް ޑެންގޫ ހުން ޖެހިގެން ރިޕޯޓު ކޮށްފައިވާ އަދަދު އެއްވަރެއްގައި ހުރިކަން އެޗްޕީއޭ އިން ވަނީ ފާހަގަކޮށްފައެވެ.
މީގެ އިތުރުން ބޭރަށް ހިނގުމާއި ހޮޑުލުމުގެ 2730 ކޭސް މިދިޔަ ފެބްރުއަރީ މަހު ރިޕޯޓް ކޮށްފައިވާ ކަމަށާއި މިދިޔަ މާރޗު މަހު ރިޕޯޓްކޮށްފައިވަނީ 2063 ކޭސް ކަމަށް ވެސް އެޗްޕީއޭ އިން ބުނެއެވެ.
މި އަހަރުގެ ފެބްރުއަރީ މަހު އަރިދަފުސް ރޯގާ ޖެހިގެން 16125 މީހުން ދައްކާފައިވާ ކަމަށާއި މާރޗު މަހުގެ ތެރޭގައި ދައްކާފައިވަނީ 14399 މީހުން ކަމަށް ވެސް އެޗްޕީއޭ އިން ބުނެފައިވެއެވެ.
ޞިއްހީ ގޮތުން ރައްކާތެރިވުމަށް ހުރިހާ ފަރާތްތަކުން ފިޔަވަޅު އެޅުމަށް އެޗްޕީއޭ އިން ވަނީ އިލްތިމާސް ކޮށްފައެވެ.
