ސްވިމިންގ ޕޫލް
ސްވިމިންގ ޕޫލް ބަލަހައްޓާ މީހާ ކުޑަ ފިރިހެން ކުއްޖަކާ ދިމާއަށް އެއްޗެހި ގޮވަނީއެވެ. އެ ކުއްޖާގެ މަންމައަށް މި މަންޒަރު ފެނިގެން އައިސް އަހައިފިއެވެ.
[އަހަރެންގެ ދަރިފުޅާ ދިމާއަށް ތިޔަވަރަށް ބަވަނީ ކީއްވެގެން ހެއްޔެވެ؟]
ޕޫލް ބަލަހައްޓާ މީހާ ބުންޏެވެ. [ބަވަނީއެއް ނޫނެވެ. މީނާ ސްވިމިންގ ޕޫލަށް ހީސް ލާތީ އެކަން ނުކުރާށޭ ބުނީއެވެ.]
މަންމަ ބުންޏެވެ. [އެއީ އެހައި ވަރުގެ ކަމެއް ހެއްޔެވެ؟ ކުޑަކުދިން ސްވިމިންގ ޕޫލަށް ހީސް ލުމަކީ އާދައިގެ ކަމެކެވެ. ހުރިހައި ކުދިންވެސް ކޮށް އުޅޭ ކަމެކެވެ.]
ޕޫލް ބަލަހައްޓާ މީހާ ބުންޏެވެ. [ތިޔައީ ތެދެކެވެ. އެކަމަކު މީނާ ހީސްލަނީ ޕޫލުން ބޭރުގައި ހުރެގެންނެވެ.]
އަމިއްލަ ކޮޓަރި
ދެމަފިރިއަކާއި ތިން ދަރިން އާ ގެއަކަށް ބަދަލުވެއްޖެއެވެ. ބަދަލުވީތާ ހަފުތާއެއްހައި ދުވަސް ފަހުން ކުދިންގެ މާމަ އެ ގެއަށް އަތުވެއްޖެއެވެ. މެދަށް ހުރި ކުއްޖާޔާ މާމަ ސުވާލު ކޮށްލިއެވެ.
[އާ ގެ ރީތި ހެއްޔެވެ؟ ރަނގަޅު ހެއްޔެވެ؟]
އެ ކުއްޖާ ބުންޏެވެ. [ވަރަށް ރީއްޗެވެ. ވަރަށް ރަނގަޅެވެ. އަޅުގަނޑަށް ވަކި ކޮޓަރިއެއް ހުރެއެވެ. ބޭބެއަށް ކޮޓަރިއެއް ހުރެއެވެ. ކޮއްކޮއަށް ކޮޓަރިއެއް ހުރެއެވެ. އެކަމަކު މަންމަ ފަކީރު އަދިވެސް ނިދަނީ ބައްޕަޔާ އެކީގައެވެ.]
ހާލު ރަނގަޅުތަ؟
އަނބިމީހާ ހެނދުނު ހޭލައިގެން ބަލައިލީއިރު ފިރިމީހާ އޮތީ ހޭލައެވެ. ފަންގިފިލައާ ދިމާއަށް ބަލަހައްޓައިގެން ދެ ލޯ ބޮޑުކޮށްގެންނެވެ.
އަނބިމީހާ ކަންބޮޑުވެފައި އަހައިލިއެވެ. [ކިހިނެއްވީ ހެއްޔެވެ؟ ހާލު ރަނގަޅު ހެއްޔެވެ؟ ބަލީ ހެއްޔެވެ؟]
ފިރިމީހާ ބުންޏެވެ. [އަހަރެންގެ ހާލު ރަނގަޅެވެ. ބައްޔެއް ނޫނެވެ.]
އަނބިމީހާ ބުންޏެވެ. [އަހަރެން މިހެން އެހީ ރޭ ނިދީގައި އަހަންނާ ދިމާއަށް ވަރަށް ހުތުރު އެއްޗެހި ކީމައެވެ.]
ފިރިމީހާ ބުންޏެވެ. [އަހަރެން އޮތީ ނިދާފައޭ ބުނީ ކާކު ހެއްޔެވެ؟]
