އެކެއް
އިންދަރްޖީތު ދިރިއުޅުމުގައި ލޯބިވީ ހަމަ އެންމެ އަންހެން ކުއްޖެއް ދެކެއެވެ. އެކުއްޖާގެ ކުރީން އޭނާގެ ޙަޔާތަށް ކިތަންމެ އަންހެން ކުދިންނެއް އައިސްފައވީނަމަވެސް އެއިން ކުއްޖަކު އައީ ކޮންއިރަކުކަން ނުވަތަ ދިޔައީ ކޮންއިރަކުކަންވެސް އޭނާ ހަނދާނެއް ނުހުރެއެވެ. އަދި އެއީ ކިތައް ކުދިން ކަމެއްވެސް އޭނާ ނުބަލައެވެ. އަދި ކީއްތޯއެވެ؟ އެއީ އޭނާގެ ޙަޔާތަށް އައި ބައެއް ކަމެއްވެސް އޭނާގެ ހަނދާނަކު ނެތެވެ. ނަމަވެސް މިހާރުވެސް އޭނާ އަތުގައި، ވަރަށް ގިނަ ސިޓީތައް އެބަހުއްޓެވެ. އެއީ ކޮލެޖުގެ ދުވަސްވަރުން ފެށިގެން މިހާތަނަށް އޭނާއަށް ލިބެމުންދާ ސިޓީތަކެވެ. އެހުރިހާ ލޯބީގެ ސިޓީތައް އޭނާ ގެންގުޅެނީ ސޫޓުކޭހެއްގައި ބަންދުކޮށްގެން ވަރަށް ފަރުވާތެރިކަމާއެކު ރައްކައުތެރި ކޮށްގެންނެވެ. ނަމަވެސް އެއީ އޭނާގެ މާޒީގެ ލޯބިވެރިންގެ ސިޓީތައް ކިޔަކިޔާފައި ހިތާމަކޮށް ރުއިމަށްޓަކައެއް ނޫނެވެ. ނުވަތަ އެލޯބިވެރިން މަތިން ހަނދާން ކުރާކަށްވެސް ނޫނެވެ. އެހެންނަމަވެސް އޭނާ އެ ސިޓީތައް ބަލަހައްޓަނީ ވަރަށް ރަނގަޅަށެވެ. އަޞްލުގައި ކޮންމެ އަހަރަކުވެސް އޭނާ އެ ހުރިހާ ސިޓީތައް އަތްވަށް ނެރެހަދައެވެ. އެއީ އޭގައި ފިނި ހިފިޔަ ނުދިނުމަށްޓަކައެވެ. ކޮންމެ ސިޓީއެއް ވަކިވަކިން ނިއުޅާ ބަލާފައި އަލުން ފަތް ޖަހާފައި ރައްކާކުރެއެވެ.
އެއްފަހަރަކު ދިމާވި ކަމެއްގެ ވާހަކަ ދަންނަވާލާނަމެވެ. އިންދަރްޖީތު އެއްދުވަސްވަރެއްގައި ރައްޓެހި ވެގެންއުޅުނު އަންހެން ކުއްޖަކު އޭނާގެ ކިބައިން އެދުނީ އެމީހުން ރައްޓެހިވެގެން އުޅުނު ދުވަސްވަރު އެކުއްޖާ އިންދަރްޖީތަށް ފޮނުވާފައިވާ ހުރިހާ ސިޓީތަކާއި ފޮޓޯތައް އަނބުރާ ފޮނުވާ ދިނުމަށެވެ. އެކަމަށް އެދި އެކުއްޖާ ފޮނުވި ސިޓީގައި ވަރަށް ބޮޑަށް ރޮއި އާދޭސްކޮށްފައި ވެސް ވެއެވެ. އޭރު އެ އަންހެން ކުއްޖާ އެހެން މީހަކާ އިނދެގެން އުޅޭތާ ލައްކަ ދުވަސްވެސް ވެއްޖެއެވެ.
އެކުއްޖާ އޭނާގެ ސިޓީތަކާއި ފޮޓޯތައް އަނބުރާ ފޮނުވާ ދިނުމަށް މި އެދުނީ، ފަހަރެއްގައިވެސް އިންދަރްޖީތު އެއެއްޗެތި ބޭނުންކޮށްގެން އެކުއްޖާ ބްލެކްމެއިލް ކޮށްފާނެކަމުގެ ބިރަކުން ނޫނެވެ. އަދި ކީއްތޯއެވެ؟ އޭނާ އަތުން ލިޔެފައިވާ ލޯބީގެ ސިޓީތައް އޭނާ ބޭނުންމިވީ އެ ސިޓީތައް އޭނާގެ ފިރިމީހާއަށް ދައްކައިގެން އޭނާ ގާތުން ވަރިވުމަށްޓަކައެވެ. އޭނާ އެމީހާއާ އިނުމުގެ ކުރީން އެހެން މީހެއްދެކެ ލޯބިވެގެން އުޅުނުކަމަށް އެތައް ފަހަރަކު އޭނާގެ ފިރިމީހާ ގާތުގައި ބުނުމުންވެސް އޭނާ އެކަން ޤަބޫލު ނުކޮށްގެން، އެ ސިޓީތައް ދައްކައިގެން އެކަން އޭނާއަށް ޔަޤީންކޮށްދޭން ވެގެންނެވެ. ކޮންމެ އަކަސް އެ އަންހެންކުއްޖާ އެދުނު ގޮތުގެ މަތީން އިންދަރްޖީތު އޭނާގެ ސިޓީތަކާއި ފޮޓޯތައް އަނބުރާ ފޮނުވާދިނެވެ.
އެއްފަހަރަކު އެހެން އަންހެން ކުއްޖަކު އިންދަރްޖީތަށް ދިން އޭނާގެ ފޮޓޯއެއް އަނބުރާ ފޮނުވާދޭން އެދުމުން، އިންދަރްޖީތު ހެދިގޮތަކީ އެތައް އަންހެން ކުދިންނެއްގެ ފޮޓޯތަކެއް އެކުއްޖާއަށް ފޮނުވީއެވެ. އަދި އެއާއެކު ފޮނުވި ސިޓީއެއްގައި ލިޔެފައިވަނީ "ހަނދާން ބަލިވުމުގެ ސަބަބުން، ކަލާ ހުންނަ ސިފަ މިހާރު ހިތަށް ނުގެނެވޭތީ ކަލާގެ ފޮޓޯ ވަކިކުރަން ނޭނގުނީއެވެ. އެއްޗެކޭ ހީނުކުރައްވާ މިފޮޓޯތަކުން ކަލާގެ ފޮޓޯ ނަންގަވާފައި ދެން ހުރި ފޮޓޯތައް އަޅުގަނޑަށް އަނބުރާ ފޮނުއްވާ ދެއްވުން އެދެމެވެ." މިހެންނެވެ. އޭނާގެ މި ލާނެތްކަން ކާމިޔާބުވިއެވެ. އެ އަންހެންކުއްޖާ އެ ފޮޓޯތައް އަނބުރާ ފޮނުވާދިނެވެ. ނަމަވެސް އޭގެފަހުން ދުވަހަކުވެސް ދެން އޭނާގެ ސިޓީއެއް އިންދދަރްޖީތަކަށް ނުލިބެއެވެ.
ނަމަވެސް ސީމާގެ ސިޓީތަކާއި ސީމާގެ ފޮޓޯތައް އަދި އެނޫނަސް ސީމާ ދީފައިވާ ހުރިހާ ހަދިޔާއަކީ އިންދަރްޖީތު ވަރަށް ޚާއްޞަ ސަމާލުކަމެއް ދީގެން ރައްކައު ކޮށްގެން ގެންގުޅޭ އެއްޗެއްސެވެ. އެ އެއްޗެތި ހުންނަނީވެސް އޭނާގެ އަލަމާރީގައެވެ. ... އޭނާގެ ޚާއްޞަ އަލަމާރީގައެވެ. އެ އަލަމާރީގައި އޭނާގެ ދިރިއުޅުމުގެ ވަރަށް މުހިއްމު ކިތަންމެ އެހެން އެއްޗެއްސަކާ އެކުގައެވެ. އޭގެތެރޭގައި އޭނާގެ ރިވޮލްވަރު، ތިރީ ޒީރޯ ތިރީގެ ފިސްތޯލައެއް، ޑަބަލް ބެރެލް ލީ މެގްނަމް ރައިފަލެއް ތަފާތު ސައިޒްގެ ހަތަރުފަސްވަޅި، ކުޑަކުޑަ ގަޑިއެއްކަހަލަ ޓްރާންސިސްޓަރު ރޭޑިއޯއެއް (އެއީ ދާދިފަހުން އެއްދުވަހަކު ޑިޕާރޓްމަންޓުން އޭނާއަށް ދީފައިވާ އެއްޗެކެވެ.) ހިމެނެއެވެ. އަދި އޭގެ އިތުރަށް ފަސް ސޫޓު، އަށްޑިހަ ގަމީސް، ފަންސަތިރީސް ފަޓްލޫނު، ބާރަ ޖެކެޓް އަދި ހަތަރު ކޯޓް އަދި ތަފާތު ކުލަކުލައިގެ ފަންސާހަކަށް ކުރުތާއާއި ވިއްސަކަށް ފަންސަވީހަކަށް މުންޑުވެސް އެ އަލަމާރީގައި ހުރެއެވެ. އޭނާއަކީ ވަރަށް ބޮޑަށް މުންޑު އަންނަ ހިތްވާ މީހެކެވެ. ގޭތެރޭގައި އަބަދުވެސް އުޅެނީ މުންޑުގައެވެ.
އޭނާގެ މިޚާއްޞަ އަލަމާރީގައި ވައިން ކެބިނެޓެއްވެސް ހަދާފައި ހުރެއެވެ. އޭގައި އަބަދުވެސް ގިނދުވަސްވީ ސްކޮޗް އާއި އަދި ވެސް ތަފާތު ވައްތަރުގެ ރާ ހުރެއެވެ. އޭނާއަކީ ގިނައިން ރާބޯ މީހެއް ނޫނެވެ. ނަމަވެސް އެހެން މީހުންނަށް ރާ ބޯންދިނުމާއި، ކާން ދިނުމަކީ އޭނާ ވަރަށް ކުރާ ހިތްވާ ކަމެކެވެ.
މިދެންނެވުނީ އިންދަރްޖީތުގެ އަލަމާރީގެ ވާހަކައެވެ. އަދި މިއީ އޭނާގެ ދިރިއުޅުމުގައި ބޭނުންކުރާ ހުރިހާ އެއްޗެތީގެ ވާހަކަވެސް މެއެވެ. އެހުރިހާ އޭނާ ގެންގުޅެނީ އޭނާގެ އަލަމާރީގައެވެ. އެ އަލަމާރިއަކީ ގާތްގަނޑަކަށް ކޮޓަރިއެއްގެ ދެބައިކުޅަ އެއްބައިހާ ތަނެވެ. އަލަމާރީގެ އެންމެ މަތީބައި ޚާއްޞަކޮށްފައިވަނީ ސީމާ އޭނާއަށް ދީފައިވާ ހަދިޔާތަކަށެވެ. އަދި ސީމާ އޭނާއަށް ފޮނުވާފައިވާ ސިޓީތަކަށެވެ.
އިންދަރްޖީތު ސެންޓްރަލް އިންޓެލިޖެންސް ޑިޕާޓްމަންޓް (ސީ.އައި.ޑީ) ގައި މަސައްކަތް ކުރާތާ މިހާރު އެތައް ދުވަހެއް ވެއްޖެއެވެ. އެދުވަސްތަކުގެ ތެރޭގައި އޭނާއަށް ވަރަށް ގިނަ ތަންތާނގައި މަސައްކަތް ކުރަންޖެހި، ވަރަށް ގިނަ މީހުންނާ ބައްދަލުވެ، އަދި އެހާމެ ގިނަ ކަންތައްތަކާ ދިމާވެފައިވެއެވެ. ކިތަންމެ ފަހަރަކު އޭނާ މަރުގެ ތުންފަތް މަތިން އެނބުރި އަންނަން ދިމާވެފައިވެސް އެބަހުއްޓެވެ. އޭނާގެ މިވަރުގަދަ ތަޖުރިބާތަކުގެ ސަބަބުން މިހާރު އޭނާ ވެފައިވަނީ އިންޑިއާގެ ވަރަށް މަތީ ފެންވަރުގެ އިންސްޕެކްޓަރަކަށެވެ. ކޮލެޖުގެ ދުވަސްވަރު އޭނާއަކީ ވަރަށް ހިތްހެޔޮ، އަދި ހުޅުވިފައިވާ ހިތެއްގެ ވެރި، ހުރިހާ ސްޓިއުޑެންޓުންނާ ގުޅޭ އެކުވެރިއެކެވެ. ނަމަވެސް މިއަދު އޭނާ ވެފައިވަނީ ވާހަކަ މަދު، ރަޙްމަތްތެރިންވެސް މަދު، ސީރިއަސް މީހަކަށެވެ. މިހާރު އޭނާގެ ޢުމުރުން 32 އަހަރު ވެއްޖެއެވެ. އެހެންކަމާއެކު ވެސް، އޭނާގެ އެކަނިވެރިކަމާއި އޭނާގެ ޙަޔާތުގެ ހުސްކަން ފިލުވާލުމަށްޓަކައި، އޭނާގެ ހިތުގައި ކޮންމެވެސް ކަހަލަ ޝުޢޫރެއް އުފެދޭއިރަށް އޭނާއަށް ތަޞައްވަރު ވެގެންދަނީ ސީމާގެ ހަނދާންތަކެވެ. އެ ހަނދާންތަކުން އެކުލެވޭ ސީމާގެ ރީތި ތަޞްވީރެވެ. އޭނާގެ އެންމެ ފުރަތަމަ އަދި ހަމަ އެހެންމެ އެންމެ ފަހު ލޯބީގެ އުއްމީދުތައް އެކުލެވިފައިވަނީ އެ ތަޞްވީރުގައެވެ.
(ނުނިމޭ)
