ފަލަސްޠީނުގެ ބިމަށް ގަދަކަމުން ވެރިވެގަނެގެން ގާއިމުކޮށްފައިވާ ޔަހޫދީ ދައުލަތް، އިސްރާއީލުގެ ބޮޑުވަޒީރު ނަފްތާލީ ބެނެޓް ރަސްްމީ ދަތުރެއްގައި ޔުނައިޓެޑް އަރަބް އެމިރޭޓްސް (ޔޫއޭއީ) އަށް ހިނގައްޖެއެވެ. މިއީ އިސްރާއީލުގެ ބޮޑުވަޒީރަކު ޔޫއޭއީއަށް ދިޔަ ފުރަތަމަ ފަހަރެވެ.
ބެނެޓް ޔޫއޭއީއަށް ކުރާ ދަތުރު ފަށާފައި މިވަނީ ދުނިޔޭގެ ބާރުތަކާ އީރާނާ ދެމެދު ވިއެނާގައި ކުރިއަށް ދާ ނިއުކުލިޔާ މަޝްވަރާތަކާ ދެކޮޅަށް އިސްރާއީލުން މަސައްކަތްތަކެއް ފަށާފައިވާ ދަނޑިވަޅެއްގައެވެ. އެމެރިކާގެ ކުރީގެ ރައީސު ޑޮނާލްޑް ޓްރަމްޕްގެ ދައުރުގައި ނިއުކުލިޔާ އެއްބަސްވުމުން އެމެރިކާ ވަކިވެފައިވާ އިރު، އެމެރިކާ އަލުން އެ އެއްބަސްވުމާ ގުޅުމަކީ އިސްރާއީލު އެދޭ ގޮތެއް ނޫނެވެ. ނިއުކުލިޔާ ހަކަތައިގެ މައްސަލައިގައި އިސްރާއީލުން ދަނީ އީރާނަށް ހަމަލާދޭނެ ކަމުގެ އިންޒާރުވެސް ދެމުންނެވެ.
ޔަހޫދީ ދައުލަތުގެ ބޮޑުވަޒީރު ބެނެޓް މިއަދުގެ ވަގުތެއްގައި އަބޫދާބީގެ ވަލީއަހުދު މުޙައްމަދު ބިން ޒާޔިދް އާލްނަހްޔާންއާ ބައްދަލުކުރާނެއެވެ. ޔޫއޭއީގެ ރައީސު ޚަލީފާ ބިން ޒާޔިދުއަށް 2014 ވަނަ އަހަރު ޖެހިވަޑައިގަތް ސްޓްރޯކަކަށް ފަހު، އެގައުމުގެ ވެރިކަން އަމަލީގޮތުން ހިންގަވަނީ އަބޫދާބީގެ ވަލީއަހުދެވެ. ބެނެޓްގެ އޮފީހުން ބުނެފައިވާ ގޮތުގައި އޭނާ ޔޫއޭއީއަށް ޒިޔާރަތްކުރަނީ އަބޫދާބީގެ ވަލީއަހުދުގެ ދައުވަަތަކަށެވެ.
"ތާރީޚީ ވަގުތުކޮޅެއް. އިސްރާއީލުގެ ވެރިއަކު ޔޫއޭއީއަށް ކުރާ ފުރަތަމަ ދަތުރުގައި ބޮޑުވަޒީރު ބެނެޓް ރަސްމީ ދަތުރެއްގައި ޔޫއޭއީގެ ވެރިރަށް އަބޫދާބީއަށް ހިނގައްޖެ." އިސްރާއީލުގެ ބޮޑުވަޒީރުގެ އޮފީހުން ބުނެފައިވެއެވެ.
"ތިޔަބޭފުޅުން ތިޔަ ކިއުއްވި ހޫނު މަރުހަބާގެ އަގުވަޒަންކުރަން. އަހަރެން މިތަނަށް އައުމުން ކުރި އަސަރު ބޮޑު. ދެގައުމުގެ ދެމެދުގައި ގުޅުންތައް ވަރުގަދަކުރުމުގެ އުއްމީދުގައި މިތިބީ." އަބޫދާބީއަށް ދިއުމަށްފަހު ބެނެޓް ބުނިކަމަށް އޭނާގެ އޮފީހުން ބުނެފައި ވެއެވެ. ބެނެޓް އަބޫދާބީއަށް ފޭބުމާއެކު އޮނާ ގާޑަކާއެކު އޭނާއަށް މަރުހަބާ ވިދާޅުވީ ޔޫއޭއީގެ ޚާރިޖީ ވަޒީރު ޢަބްދުﷲ ބިން ޒާޔިދް އާލްނަހްޔާންއެވެ.
މިސްރާއި ޖޯޑަން (އުރްދުން) އަށް ފަހު ޔަހޫދީ ދައުލަތާއެކު ޑިޕްލޮމެޓިކް ގުުޅުން ގާއިމުކުރާ އަރަބި ތިންވަނަ ގައުމުގެ ގޮތުގައި ޔޫއޭއީން އިސްރާއީލާއެކު ގާއިމުކޮށްފައި ވަނީ 2020 ވަނަ އަހަރުގެ އޮގަސްޓު މަހުގައެވެ. އޭގެ ފަހުން ދެގައުމުން ވަނީ ވިޔަފާރީގެ ގުޅުން ވަރުގަދަކޮށް އެކަމާ ބެހޭ އެތައް އެއްބަސްވުމެއްގައި ސޮއިކޮށްފައެވެ. ދެ ގައުމުގެ އެއާލައިންތަކުން ވަނީ ދެ ގައުމުގެ ދެމެދު ވައިގެ ދަތުރުތައް ވެސް ފަށާފައެވެ.
ޔޫއޭއީއަށް ފަހު ބަހްރޭންއާއި މޮރޮކޯ (މަޣްރިބް) އިންވެސް ވަނީ އިސްރާއީލާއެކު ގުޅުން ގާއިމުކޮށްފައެވެ.
ފަލަސްޠީނުން ވަނީ އިސްރާއީލާއެކު ގުޅުން ގާއިމުކުރުމަށް އަރަބި ގައުމުތަކުން ކުރާ މަސައްކަތާމެދު ނުރުހުން ފާޅުކޮށްފައެވެ. އަދި ޔޫއޭއީ ސަރުކާރުން އިސްރާއިލާއެކު ގުޅުން ގާއިމުކުރި ނަމަވެސް، އެ ގައުުުމުގެ ރައްޔިތުންގެ ގިނަ ބަޔަކީ ފަލަސްޠީނަށް ތާއީދުކުރާ މީހުންނެވެ.
