އިސްރާއީލުގެ ޓެލްއަވީވް (ތައްލުއަބީބް) ގައި ޔުނައިޓެޑް އަރަބް އެމިރޭޓްސް (ޔޫއޭއީ) ގެ އެމްބަސީއެއް ހުޅުވުމަށް ޔޫއޭއީގެ ވަޒީރުންގެ މަޖިލީހުން ނިންމައިފިއެެވެ.
ޔޫއޭއީއާ އިސްރާއީލު ފުރިހަމަ ސިޔާސީ ގުޅުން ގާއިމުކުރަން އެއްބަސްވީ ފާއިތުވި އޮގަސްޓު މަހުގެ ތެރޭގައެވެ. އެމެރިކާގެ އޭރުގެ ރައީސު ޑޮނާލްޑް ޓްރަމްޕް ކުރެއްވި މަސައްކަތްުޕުޅާއެކު ދެ ގައުމުން ސިޔާސީ ގުޅުން ގާއިމުކުރި އިރު، ދެ ގައުމަކީވެސް ސަަރަހައްދުގައި އީރާނު ނުފޫޒު ގަދަވިޔަ ނުދިނުމަށް މަސައްކަތްކުރާ ދެ ގައުމެވެ. އެެހެންކަމުން، ގުޅުން ބަދަހިކުރަން ދެ ގައުމުން ނިންމި މައިގަނޑު ސަބަބަކީ އެއީ ކަމަށް ބުނެވެއެވެ.
ރައީސު ޓްރަމްޕް ކުރެއްވި މަސައްކަތްޕުޅުން ޔޫއޭއީގެ އިތުރަށް ބަހްރޭން، ސޫދާން އަދި މޮރޮކޯ (މަޣްރިބު) އިން ވަނީ އިސްރާއީލާއެކު ސިޔާސީ ގުޅުން ގާއިމުކޮށްފައެވެ.
ފާއިތުވި އޮކްޓޯބަރުގެ ތެރޭގައި އިސްރާއީލުގެ ފޮރިން މިނިސްްޓްރީން ބުނެފައިވާ ގޮތުގައި ޓެލްއަވީވްގައި އެމްބަސީއެއް ހުޅުވަން އެދި ޔޫއޭއީގެ ފޮރިން މިނިސްޓްރީގެ ހުށަހެޅުމެއް އޭރު އިސްރާއީލު ސަރުކާރަށް އޮތީ ލިބިފައެވެ.
އޮގަސްޓް މަހުގެ ތެރޭގައި ދެ ގައުމުން ސިޔާސީ ގުޅުން ގާއިމުކުރި ފަހުން ދެ ގައުމުގެ ދެމެދުގައި ޝެޑިއުލް ވައިގެ ދަތުރުތައް ވަނީ ފެށިފައެވެ. އަދި ދެ ގައުމުގެ ދެމެދުގައި ތަފާތު ދާއިރާތަަކުން އެއްބަސްވުން ވަނީ ގާއިމުކޮށްފައެވެ.
މިިސްރުން 1979 ވަނަ އަހަރު އަދި ޖޯޑަނުން (އުރްދުނުން) 1994 ވަނަ އަހަރު އިސްރާއީލާއެކު ސިޔާސީ ގުޅުން ގާއިމުކުރިފަހުން ދުވަސްތަކެއް ވޭތުވެދިޔަ ފަހުން އަރަބި ގައުމުތަކަކުން އިސްރާއީލާއެކު ސުލްހަވެ ގުޅުން ގާއިމުކުރަން ނިންމީ ފާއިތުވި 2020 ވަނަ އަހަރުއެވެ.
އިސްރާއީލުން އެގައުގެ "އަބަދީ" "ބައިނުކުރެވޭނޭ" ވެރިރަށެއް ކަމުގައި ބަލަނީ ޤުދްސު (ޖެރޫސަލަމް) އެެވެ. ނަމަވެސް ބައިނަލްއަގުވާމީ މުޖުތަމައުން އިސްރާއީލުގެ މި ނިންމުން ގަބޫލެއް ނުކުރެއެވެ. އެއީ ފަލަސްޠީނުގެ ވެރިރަށެއް ކަމުގައި ބަލަނީ އިރުމަތީ ޤުދްސުކަމަށް ވާތީއެވެ. އެހެންކަމުން، ގިނަ ގައުމުތަކުން އިސްރާއީލުގައި ހުންނަ އެ ގައުމުތަކުގެ އެމްބަސީ ހުޅުވަނީ ޓެލްއަވީވްގައެވެ.
