މިޔަންމާގައި ފާއިތުވި ފެބުރުވަރީ މަހު ގެނައި އަސްކަރީ އިންގިލާބަށް ފަހު ފާއިތުވި 5 މަސްދުވަހުގެ ތެރޭގައި އެގައުމުގައި 75 ކުޑަކުދިން މަރާލާފައިވާ ކަމަށް އެކުވެރި ދައުލަތްތަކުގެ ޖަމްއިއްޔާ (އދ.) ގެ އިންސާނީ ހަައްގުތަކާ ބެހޭ ތަޖުރިބާކާރު މިކިކޯ އޮޓާނީ ވިދާޅުވެއްޖެއެވެ.
އދ، ގެ ކުޑަކުދިންގެ ހައްގުތަކާ ބެހޭ ކޮމިޓީން ނެރުނު ރިޕޯޓެއްގައި އޭނާ ވިދާޅުވެފައިވާ ގޮތުގައި އިތުބާރުހުރި މައުލޫމާތުގެ މައްޗަށް ބިނާކޮށް ޔަގީންކުރެވެނީ ފެބްރުވަރީ މަހުގެ ފުރަތަމަ ދުވަހުން ފެށިގެން މިޔަންމާގައި 75 ކުޑަކުދިން މަރާލައި، ގާނޫނީ ސަބަބެއް ދެއްކުމަކާއި ނުލައި 1000 އަށްވުރެ ގިނަ މީހުން ހައްޔަރުކޮށްފައިވާ ކަމުގައެވެ.
"މިޔަންމާގައި ކުޑަކުދިން ތިބާ ހިސާރުވެފައި. އަދި އަސްކަރީ އިންގިލާބުގެ ސަބަބުން އެކުދިންގެ ފުރާނަގެއްލުން ވަނީ ކަރިސާއަކަށްވާ ދަރަޖައަށް އިތުރުވެފައި." އޮޓާނީ ވިދާޅުވެފައި ވެއެވެ.
ސިފައިން ގެނައި އިންގިލާބެއްގައި އާންގް ސަންގް ސޫ ޗީ ވެރިކަމުން ދުރުކުރުމާއެކު މިޔަންމާގެ ރައްޔިތުން މަގުމައްޗަށް ނުކުމެ ކުރަންފެށި އިހުތިޖާުޖުތައް ހުއްޓުވުމަށް އަސްކަރިއްޔާއިން ވަނީ އަނިޔާވެރި ގޮތުގައި ބާރުގެ ބޭނުންކޮށް ގިނަ ބަޔަކު މަރާލާފައެވެ.
"ކުޑަކުދިންނަށް ވަނީ ތަނެއް ދޮރެއް ނުބަލައި ބާރުގެ ބޭނުންކުރުމާއި، ވަކި މީހަކު ބެލުމެއް ނެތި ބަޑިޖެހުމާއި، ގާނޫނީ ސަބަބެއް ނެތި ހައްޔަރުކުރުމުގެ ބިރާއި ކޮންމެ ދުވަހަކު ކުރިމަތިލަމުން." އޮޓާނީ ވިދާޅުވެފައި ވެއެވެ.
"އެކުދިންނާ ދިމާއަށް ބަޑި ދިއްކުރެވޭއިރު، އެކުދިންގެ މައިންބަފައިންނާއި، އެއްބަނޑު މީހުންނަށް ވެސް ދަނީ މިހާލަތު ކުރިމަތިވަމުން." އޭނާ އިތުރަށް ވިދާޅުވެފައި ވެއެވެ.
އދ. ގެ ކޮމިޓީގެ ރިޕޯޓުގައި ވަނީ ސިފައިންނާއި ފުލުހުން ކުޑަކުދިން މަރަމުން ދިއުމާއި، ހަރުކަށި އިބާރާތުން ކުށްވެރިކުރަމުން، ބައެއް ހާލަތްތަކުގައި ކުޑަކުދިން މަރާފައި ވަނީ އެމީހުން ގޭގައި ތިއްބައިކަން ފާހަގަކޮށްފައެވެ.
ކުޑަކުދިންގެ ހައްގުތަކާ ބެހޭ ކޮމިޓީ އދ. ގެ 'ކޮންވެންޝަން އޮން ދަ ރައިޓްސް އޮފް ދަ ޗައިލްޑް' އަށް އަމަލުކުރާ މިންވަރު ބެލުމަށް އެކުލަވާލާފައިވާ މިނިވަން 18 ތަޖުރިބާކާރުންގެ މައްޗަށް އެކުލެވޭ ކޮމިޓީއެކެވެ. މިޔަންމާ ވަނީ މި ކޮންވެންޝަން ގައި 1991 ވަނަ އަހަރު ބައިވެރިވެފައެވެ.
ފެބުރުވަރީ މަހުގެ ފުރަތަމަ ދުވަހު މިޔަންމާގައި ގެނައި އަސްކަރީ އިންގިލާބަށް ފަހު އެ ގައުމުގައި ދަނީ އާދަޔާ ޚިލާފަށް އަނިޔާވެރި އަސްކަރީ ވެރިކަމެއް ހިންގަމުންނެވެ. ބާރުގެ ބޭނުން އަނިޔާވެރި ގޮތުގައި ބޭނުންކުރަމުން ދާއިރު އާއްމުންގެ ގިނަ ބަޔަކު ދަނީ މަގުމައްޗަށް ނުކުމެ އަސްކަރީ ވެރިކަމާ ދެކޮޅަށް އަޑުއުފުލަމުންނެވެ.
