ފާއިތުވި ފެބުރުވަރީ މަހުގެ ފުރަތަމަ ދުވަހު މިޔަންމާގައި ގެނައި އަސްކަރީ އިންގިލާބާ ދެކޮޅަށް މެދުކެނޑުމެެއް ނެތި ކުރިއަށްދާ ވަރުގަދަ އިހުތިޖާޖުތަކުގައި އިއްޔެއަކީ ލޭ އޮހޮރުވުން އެންމެ ބޮޑު ދުވަހެވެ.
މަދަނީ ޖަމްއިއްޔާއެއް ކަމުގައިވާ އެެސިސްޓެންސް އެސޯސިއޭޝަން ފޯ ޕޮލިޓިކަލް ޕްރިޒަނާސް (އޭއޭޕީޕީ) އާ ހަވާލާދީ ބޭރުގެ ޚަބަރު ފަތުރާ ވަސީލަތްތަކުން ބުނެފައިވާ ގޮތުގައި މިޔަންމާގެ ސަލާމަތީ ބާރުތަކުން އިހުތިޖާޖުކުރާ މީހުންގެ ގަޔަށް ބަޑި ޖެހުމުގެ ސަބަބުން އިއްޔެ ވަނީ 39 މީހުން މަރުވެފައެެވެ. މިއީ މި އިހުތިޖާޖުތަކުގެ ތެރޭަގައި އެއް ދުވަހެއްގައި އެންމެ ގިނައިން މަރުވި އަދަދެވެ. މިއަދަދާ ގާތްކުރާ އަދަދަކަށް މީހުން މަރުވެފައި ވަނީ މި މާރިޗު މަހުގެ 3 ވަނަ ދުވަހުއެވެ. އެ ދުވަހު 38 މީހުން މަރުވެފައި ވެއެެވެ.
އޭއޭޕީޕީން ބުނާ ގޮތުގައި އިހުތިޖާޖުތައް އަނިޔާވެރި ގޮތުގައި ގަދަބާރުން ހުއްޓުވުމަށް އަސްކަރިއްޔާއިން ކުރާ މަސައްކަތުގައި މިހާތަނަށް 126 މީހުން ވަނީ މަރުވެފައެެވެ.
އދ.ން މިޔަންމާއަށް ކަނޑައަޅާފައި ހުންނަވާ މަންދޫބާ ކްރިސްޓީން ޝްރާނާ ބާގަނާ ވަނީ އިއްޔެގެ ލޭއޮރުވުން ވަރަށް ބޮޑަށް ކުށްވެރިކުރައްވާފައެވެ.
"މީހުން މެރުމާ، އިހުތިޖާޖުކުރާ މީހުންނާ މެދު އަނިޔާވެރިކޮށް އަމަލުކުރުމާ، ގައިދީންނަށް އަނިޔާވެރި އަދަބުދިނުމާ ބެހޭ ގޮތުން ހިތްހަލާކުވާފަދަ ތަފްސީލުތައް ދަނީ ލިބެމުން." ޝްރާނާ ބާގަނާގެ ބަޔާނުގައި ވެއެވެ.
އިހުތިޖާޖުތައް ވަރުގަދަވުމާ ގުޅިގެން އަސްކަރީ ވެރިން ވަނީ މިޔަންމާގެ އެންމެ ބޮޑު ރަަށް ޔަންގޯން (ރެންގޫން) އާއި އެެހެން ދެ ރަށެއްގައި މާޝަލްލޯ ހިންގާފައެވެ.
އިހުތިޖާޖުކުރާ މީހުންގެ ރުޅި އިއްޔެ އެންމެ ބޮޑަށް އަމާޒުކުރީ ޗައިނާއަށެވެ. އިންގިލާބަކުން ވެރިކަމަށް އަސްކަރީ ސަރުކާރަށް ޗައިނާ އެހީތެރިވާކަމަށް ބުނެއެވެ. އިހުތިޖާޖުކުރާ މީހުން ވަނީ ޗައިނާގެ ކުންފުނިތަކާ ގުޅިގެން ހިންގާ ހެދުން އުފައްދާ ހަތަރު ފެކްޓަރީއަކާއި، ގަސް ކާނާ އުފައްދާ ފެކްޓަރީއެއްގައި ރޯކޮށްލާފައެވެ.
ޔަންގޯންގެ ސިނާއީ އަވަށް ހްލައިންގްތިޔާގައި ހުރި މި ފެކްޓަރީތައް ކައިރީގައި ކުރިއަށް ދިޔަ އިހުތިޖާޖު ރޫޅާލަން ސަލާމަތީ ބާރުތަކުން ބާރުގެ ބޭނުންކުރުމުގެ ސަބަބުން 22 މީހުން މަރުވެފައި ވެއެވެ.
އިހުތިޖާޖުތައް ކުރިއަށް ދަނީ 1 ފެބުރުވަރީގެ އިންގިލާބުގައި ވެރިކަމުން ދުރުކުރި އާންގް ސަންގް ސޫ ޗީ ގެ ވެރިކަން އިއާދަކޮށް އަސްކަރިއްޔާއިން ވެރިކަން ދޫކޮށްލުމަށް އެދިއެވެ.
