އިސްރާއީލުން ފަލަސްޠީނުގެ ޣައްޒާއާ ދެކޮޅަށް ކުރިއަށް ގެންދާ އަނިޔާވެރި އުދުވާނުގައި ޣައްޒާގެ އެކި ތަންތަނަށް ރޭ ދަންވަރުއްސުރެ 80 ހަމަލާ ދީފައި ވާއިރު، މިއަދު ފަތިހު ބައިގަޑިއިރުގެ ތެރޭގައި 60 ވައިގެ ހަމަލާ ދީފިއެވެ.
މެދުނުކެނޑި ޣައްޒާއަށް ހަމަލާދެމުންދާ އަށްވަނަ ދުވަހުގައި އާއްމުން ދިރިއުޅޭ އިމާރާތްކާއި، މައި މަގުތަކާއި، ސަރުކާރު އިދާރާތަކަށް ވެސް ހަމަލާދީފައި ވާއިރު، މި ހަމަލާތައް އަމާޒުކޮށްފައި ވަނީ ޣައްޒާގެ މެދުގައި އޮންނަ ދޭރަލް ބަލަޙްއަށާއި، ޣައްޒާގެ ސިޓީގެ ދެކުނުގައި އޮންނަ ޒައިތޫން އަވަށާއި، އިރުމަތީގައި އޮންނަ ޝުޖާޢިއްޔާ އަވަަށަށެވެ.
ހަމަލާ އަމާޒުވި ސަރަހައްދުތަކުގައި މީހުން ދިރިއުޅޭ ތަންތަނަށް ބޮޑެތި ގެއްލުން ވެފައިވާ އިރު، މަގުތައްވެސް ވަނީ ހަލާކުވެފައެވެ. އަދި އެ ހިސާބުތަކުން ކަރަންޓުވެސް ވަނީ ކަނޑައިގެން ގޮސްފައެވެ.
މެދުނުކެނޑި ދެމުންދާ ހަަމަލާތަކުގައި މިހާތަނަށް 90 އިމާރާތެއް ހަލާކުކޮށްލާފައި ވެއެވެ. އޭގެ ތެރޭގައި 6 ޓަވަރު ހިމެނޭއިރު، 3 ޓަވަރެއް ވަނީ މުޅިން ބިމާ ހަމަވެފައެވެ.
ބޭރުގެ ބައެެއް ނޫސް އެޖެންސީތަކުން ބުނާ ގޮތުގައި، އިސްރާއީލުގެ އަސްކަރީ މަތިންދާބޯޓުތަކުން ޣައްޒާގެ ދެކުނުގައި އޮންނަ ޚާންޔޫނުސް އަވަށުގެ ވަށައިގެެންވާ ދަނޑުބިންތަކަށް ވެސް ހަމަލާދީފައި ވެއެވެ.
ދުނިޔޭގެ ބާރުތަކަށް ހުއްޓުވަން ނުކުޅެދިފައިވާ، ނުވަތަ ހުއްޓުވަން ބޭނުންނުވާ މި ލާއިންސާނީ އުދުވާނުގައި އާދީއްތަ ދުުވަހުގެ ނިޔަލަށް ފަލަސްޠީނުގެ 197 މީހެއްގެ ފުރާނަ ގެއްލިފައި ވެއެވެ. އޭގެ ތެެރޭގައި 58 ކުޑަކުދިންނާއި، 43 އަންހެނުން ހިމެނެއެވެ. އަދި 1200 އަށްވުރެ ގިނަ މީހުން ޒަޚަމްވެފައި ވެއެވެ.
އިސްރާއީލުގެ އުދުވާނު ވަރުގަދަކުރި ނަަަމަވެެސް، ފަލަސްޠީނު ޖަމާއަތްތަކުންވެސް ދޫ ދީފައި ނުވެއެވެ. ރޭގައިވެސް އަލްޤައްސާމު ބްރިގޭޑުންނާއި، ޤުދްސް ބްރިގޭޑްސްއިން ވަނީ އިސްރާއީލުގެ ހަތަރު ރަށަކަށް އެތައް ސަތޭކަ ރޮކެޓް އަމާޒުކޮށްފައެެވެ. ފަަލަސްޠީނު ޖަމާއަތްތަކުން ދޭ ހަމަލާތަކުގައި އިސްްރާއީލުގެ 10 މީހުން މިހާތަނަށް މަރުވެފައި ވާއިރު، އިސްރާއީލުގެ އިގުތިސާދަށްް ލިބޭ ގެެއްލުން އެތައް ސަތޭކަ މިލިއަން ޑޮލަރަކަށް އަރައެވެ.
އަބަދުވެސް އިސްރާއީލުގެ ހިމާޔަތުގައި އޮންނަ އެމެރިކާއިން މިފަހަރުވެސް ދަނީ އެކަން ދައްކަމުންނެވެ. އިސްރާއީލުގެ އުދުވާނީ ހަމަލާ ހުއްޓާލުމަށް ގޮވާލައި އދ. ގެ ސަލާމަތީ މަޖިލީހުން ބަޔާނެއް ނެރެން މަސައްކަތްކުރި ތިން ވަނަ ފަަހަރުވެސް އެކަން ވަނީ ނާކާމިޔާބުވެފައެވެ. ކޮންމެ ފަހަރަކުވެސް އެކަން ނާކާމިޔާބުކޮށްލަނީ އެމެރިކާއެވެ. އާދީއްތަ ދުުވަހު ކުރިއަށް ދިޔަ 3 ގަޑިއިރާ ބައިގެ މަޝްްވަރާތަކަށް ފަހު މަޖިލީހުގެ މިމަހުގެ ރައީސު ޗައިނާއާއި، މި ދައުރުގައި އެ މަޖިލީހުގައި ހިމެނޭ ހަމައެކަނި މެންބަރު ޓިއުނީޝިޔާ (ތޫނިސް) އާއި، ނޯވޭ އިން ވަނީ، ޣައްޒާއަށް ދެމުންދާ އުދުވާނީ ހަމަލާ ހުއްޓާލުމަށް ގޮވާލައި ގުޅިފައިވާ ބަޔާނެއް ނެރެފައެވެ.
