ކުރީގެ ޕްރޮސެކިއުޓަރޖެނެރަލަކު ނިންމާފައިވާ ނިންމުމަކަށް ބަދަލު ގެންނަވާނީ އެކަމެއްގައި ވަރަށްބޮޑު ބޭއިންސާފެއް ހިމެނޭ ނަމަ ކަމަށް ޕްރޮސެކިއުޓަރ ޖެނެރަލް ޙުސައިން ޝަމީމް ވިދާޅުވެއްޖެއެވެ.
ޕީޖީ ޝަމީމް ވިދާޅުވީ ޕީޖީ އަކު ކޮށްފައި ހުންނަ ކަންކަން ފަހުން އަންނަ ޕީޖީ އަކު ބަދަލު ކުރަން ވެއްޖިއްޔާ އެއީ ނިމުމެއް އޮންނާނެކަމެއް ނޫންކަމަށެވެ. އޭނާ މަގާމުން ދިއުމުން ދެން އެމަގާމަށް ވަޑައިގަންނަވާ ޕީޖީއަކު އޭނާ ނިންމާފައިވާ ނިންމުންތައް ވެސް ބަދަލު ކުރާނެކަމަށެވެ. އެހެންކަމުން ވަރަށް ބޮޑު ބޭ އިންސާފެއް ހިމެނޭ ކަމެއް ނޫނީ، ޕީޖީއަކު ނިންމާފައިވާ ނިންމުންތައް ދެމެހެއްޓުމަކީ މުހިންމު ކަމެއްކަމަށް ވިދާޅުވިއެވެ.
ކުރީގެ ޕީޖީ ބިޝާމް ގަވާއިދާ ޚިލާފަށް ކަމެއް ކުރެއްވި ކަމަށްވެސް އަދި ނުކުރައްވާ ކަމަށްވެސް އޭނާ ވިދާޅުވެފައި ނުވާނެކަމަށް ޕީޖީ ޝަމީމް ވިދާޅުވިއެވެ. ގަވާއިދާ ޚިލާފަށް ކަމެއް ކޮށްފައިވާކަމަށް ފުލުހުންނަށް ފާހަގަ ކުރެވިގެން އެމައްސަލައެއް ތަހުގީގުކޮށްފައި ފޮނުވައިފިއްޔާ އެމައްސަލައިގައި އަޅަން ޖެހޭ ފިޔަވަޅެއް އަޅުއްވާނެކަމަށް ޕީޖީ ޝަމީމް ވިދާޅުވިއެވެ.
"އަޅުގަނޑަށް ފެނުނު ތަނުގައި އަޅުގަނޑުމެން މި ހިނދުން މިހިނދަށް ފިޔަވަޅު އަޅަންޖެހޭފަދަ ކަމެއް ފާހަގަ ވެފައެއް ނެތް. އަޅުގަނޑު އަބަދުވެސް މި ދަންނަވަނީ ކުރީގެ ޕީޖީއަކު މަގާމުގައި ހުންނެވި ދުވަސްވަރު އަމަލުކުރައްވައިފައިވާ ގޮތެއް އަޅުގަނޑު ބަދަލުކުރާނީ އެކަމަކީ އާދަޔާ ޚިލާފު ބޮޑު ބޭއިންސާފެއް މީހަކަށް ވާކަމެއް ކަމަށް ވާނަމައޭ. އެހެން ނޫނިއްޔާ އަޅުގަނޑުމެން އެކަންކަމުގެ ތެރެއަށްވަދެ ނިއުޅުވައި ހެދުމަކީ އިންސާފުވެރި ގޮތެއް ވެސް ނޫން. މީހުންނަށް ނިޒާމާ ދޭތެރޭގައި އޮންނަ ޔަގީންކަންވެސް ގެއްލިގެންދާނެ ކަމެއް. އެއީ ކުރާވަރުކަމެއް ނޫން." ޕީޖީ ޝަމީމް ވިދާޅުވިއެވެ
ޕީޖީ ޝަމީމް ވިދާޅުވީ އެމްއެމްޕީއާރުސީ މައްސަލައިގައި އޭނާ އެންމެ ފުރަތަ ކުރެއްވި ކަމަކީ ޕީޖީ އޮފީހުގެ ތެރެއިން އެމައްސަލައިގެ ކަންކަން ގޮސްފައިވާ ގޮތް ދެނެގަނެ އެއްވެސް މީހެއްގެ އިހުމާލެއް އުޅޭތޯ ބެއްލެވުންކަމަށެވެ. އެގޮތުން އެކަންކަން ބެއްލެވި ކޮމެޓީން 44 ހަތަރު ރެކޮމެންޑޭޝަނެއް ޕީޖީއަށް އެރުވިކަމަށެވެ. އޭގެތެރެއިން ދެބައިކުޅަ އެއްބައި ރެކޮމެންޑެންޝަނަށް މިހާރު އަމަލު ކުރެވިއްޖެކަމަށް ވިދާޅުވިއެވެ. ބާކީ ހުރި ކަންކަން ވެސް ޕީޖީ ކަމުގެ މަގާމާ ހަވާލުވެ ވަޑައިގެންނެވިތާ އަހަރެއް ފުރެންވާ އިރަށް އަމަލުކުރައްވަން ފެށްޓެވުމަށް މަސައްކަތް ކުރައްވަމުން ދާކަމަށް ވިދާޅުވީ. ޕީޖީ ޝަމީމް މަގާމާ ހަވާލުވެ ވަޑައިގެންނެވީ މިދިޔަ އަހަރުގެ ޑިސެމްބަރު މަހުގެ އަށްވަނަ ދުވަހުއެވެ.
ޕީޖީ ޝަމީމް ވިދާޅުވީ އެސެސްމެންޓް ހާމަވި ކަންކަމުގެ ތެރެއިން އެއްކަމަކީ ރަސްމީ ރެކޯޑަށް ނާރާގޮތަށް ތަރުތީބު ކަމެއް ނެތި މައްސަލަތަކުގައި ފުލުހުން ހުށަހަޅާ ލިޔެކިޔުންތައް ބަލައިގަނެފައި ވާކަމަށެވެ. މަގާމާ ހަވާލުވެވަޑައި އެކަންކަން އިސްލާހުކޮށްފައވާކަމަށް ވިދާޅުވިއެވެ.
"މިހާރު އެއްވެސް ލިޔެކިޔުމެއް ނުގެނެވޭނެ އެކަމަށް ޝެޑިއުލްކޮށްފައި އޮންނަ މީޓިންއެއްގައި ނޫން ގޮތަކަށް، އަދި އޮންލައިންކޮށް އެކަމަށް ކަނޑައެޅިފައިވާ ޕޯޓަލެއް މެދުވެރިކޮށް ނޫން ގޮތަކަށް. ރަސްމީ ރެކޯޑަށް ނާރާ ގޮތަށް ޑޮކިއުމަންޓްތައް ގެނައުމުގެ ފުރުސަތެއް ނޯންނާނެ. އެގޮތަށް ހުރި ވަރަށް ގިނަ އިދާރީ ކަންކަން ވާނީ ރަނގަޅުކޮށްފައި." ޕީޖީ ވިދާޅުވިއެވެ.
ބައެއް މުވައްޒަފުންގެ ސްލޫކީ މައްސަލައެއް އޮތިއްޔާ އެކަންކަންވެސް ބެލުމުގެ މަސައްކަތް ކުރެވަމުން ދާކަމަށް ޕީޖީ ވިދާޅުވިއެވެ. އެމްއެމްޕީއާރުސީ މައްސަލައިގައި ދޯދިޔާކޮށް ކުރެވިފައިވާ ހުރިހާ ކަމެއް، ދެވަނަ ފަހަރަށް ތަކުރާރުނުވާނެ މިންވަރަށް ހައްލުކުރައްވާނެ ކަމުގެ ޔަގީން ކަންވެސް ޕީޖީ ދެއްވިއެވެ.
