އެންމެ 24 ގަޑިއިރުގެތެރޭގައި އިންޑިއާގެ 86432 މީހުންނަށް ކޮވިޑް-19 ޖެހި އަދި އެބަލީގައި 1089 މީހުން މަރުވެފައިވާކަމުގައި ޔުނިއަން ހެލްތު މިނިސްޓްރީން މިއަދު ހެނދުނު ބުނެފިއެވެ.
މުޅި ދުނިޔޭގެ ރެކޯޑުތަކަށްބަލާއިރު ކޮވިޑް-19 އެންމެ ގިނަ މީހުންނަށް ޖެހި އަދި އެންމެ ގިނަ މީހުން ބަލީގައި މަރުވެފައިވަނީ އެމެރިކާއިންނެވެ. ދެން ބުރެޒިލްއެވެ. އިންޑިއާ އުޅެނީ ތިންވަނައިގައެވެ.
މިއަދު ހަވީރު 5.30ގެ ޚަބަރުތަކަށްބަލާއިރު އިންޑިއާއިން މިހާތަނަށް 4023179 މީހުންނަށް ކޮވިޑް-19 ޖެހި އެބަލީގައި 69561 މީހުން މަރުވެފައިވެއެވެ.
އިންޑިއާގެ އެކި ސަރަހައްދުތަކަށް ބަލާއިރު ކޮވިޑް-19 އެންމެ ގަދަފަދައަށް ފެތުރެމުންދަނީ މަހާރާޝްޓްރާ، ޓަމިލް ނާޑޫ، ކަރުނާޓަކާ، ދިއްލީ އަދި އަންދުރަ ޕްރަދޭޝްގައެވެ. ހެލްތު މިނިސްޓްރީން ބުނިގޮތުގައި އިންޑިއާއިން މަރުވި މީހުންގެ 70 ޕަސެންޓް ނިސްބަތްވަނީ މިދެންނެވި ސަރަހައްދުތަކަށެވެ.
ބުރާސްފަތި ދުވަހާއި ހުކުރުދުވަހު ހެނދުނު އިންޑިއާގެ ހެލްތު މިނިސްޓްރީން ހާމަކުރި ރިޕޯޓުތަކަށް ބަލާއިރު އެ ދެދުވަހުންކުރެ ކޮންމެ ދުވަހަކު ވެސް 83 ހާހަށްވުރެ ގިނަ މީހުންނަށް ވައިރަސް ޖެހިފައިވެއެވެ. ދުނިޔޭގައި މިހާރު އެންމެ ފުޅާދާއިރާއެއްގައި އަދި އެންމެ ނުރައްކާތެރި ދަރަޖައަކަށް ކޮވިޑް-19 ފެތުރެމުން ދަނީ އިންޑިއާގައެވެ.
ފަހަކަށް އައިސް އިންޑިއާގެ ރަށްފުށުގެ ސަރަހައްދުތަކަށް ކޮވިޑް-19 ފެތުރެން ފެށުމުން ވައިރަސް ފެތުރުން ކޮންޓްރޯލް ކުރުމަށް ސަރުކާރުން ކުރަމުންދާ މަސައްކަތްތަކަށް ވަރަށް ބޮޑު ގޮންޖެހުމެއްވަނީ ކުރިމަތިވެފައެވެ.
