ބޭ އޮފް ބެންގޯލްގައި އުފެދި އުތުރަށް ދަތުރުކުރަމުންދާ ބާރުގަދަ ޠޫފާން 'އަމްޕަން' ވެސްޓް ބެންގޯލް ސްޓޭޓްގެ ސުންދަރްބަންސްއާއި ދިމާއިން އިންޑިޔާއަށް އަރައިފިއެވެ. އިންޑިޔާ ގަޑިން މިއަދު މެންދުރު ފަހު 2:30 (ރާއްޖޭ ގަޑިން މެންދުރު ފަހު 2:00) ހާއިރު ޠޫފާން އެ ސަރަހައްދަށް އެރިއިރު ވައި ހުރީ ގަޑިއަކު 165 ކިލޯމީޓަރާ 185 ކިލޯމީޓަރާ ދެމެދުގައެވެ.
އިންޑިޔާގެ މޫސުމާ ބެހޭ އިދާރާ، އިންޑިޔާ މީޓިއޮރޮލޮޖިކަލް ޑިޕާޓްމަންޓް (އައިއެމްޑީ) އިން ލަފާކުރާ ގޮތުގައި ޠޫފާން އަމްޕަން ދަތުރުކުރާނެ ކަމަށް ބެލެވެނީ ވެސްޓް ބެންގޯލް ސްޓޭޓްގެ މިދްނާޕޫރު ޑިސްޓްރިކްޓާއި، ބަންްގްލާދޭޝްގެ ހަޓިޔާ ޖަޒީރާތަކާ ދެމެދުންނެވެ.
ބޭ އޮފް ބެންގޯލްގައި 'ސުޕަރ ސައިކްްްލޯން' އެއްގެ ދަރަޖައިގައި ހުރި ޠޫފާން އަމްޕަން އިންޑިޔާއާއި ހަަމައަށް އައި އިރު ވަނީ ބާރު ދެރަވެ 'އެކްސްޓްރީމްލީ ސިވިޔަރ ސައިކްލޯން' ގެ ދަރަޖައިގެ ޠޫފާނަކަށް ވެފައެވެ. މޫސުމާ ބެހޭ އިދާރާތަކުން ގިންތިކުރާ ގޮތުގައި 'އެކްސްޓްރީމްލީ ސިވިޔަރ ސައިކްލޯން' އަކީ ގަޑިއަކު 167 ކިލޯމީޓަރާ 221 ކިލޯމީޓަރާ ދެެެމެދު ވައި ހުންނަ ޠޫފާނެެވެ. ގަޑިއަކު 222 ކިލޯމީޓަރަށްވުރެ ބާރަށް ވައި ޖެހެންޏާ އެއީ 'ސުޕަރ ސްއިކްލޯން' އެކެވެ.
ވެސްޓް ބެންގޯލްއަށް ޠޫފާން އަަރާފައި ވާއިރު، އެ ސްޓޭޓުގެ ވެރިރަށް ކޮލްކަތާ މަތިން ދަތުރުކުރާ ހުރިހާ މަތިންދާބޯޓެއްގެ ދަތުރުތައް ވަނީ ކެންސަލްކޮށްފައެެެވެ. އަދި ކޮލްކަތާ އެއާޕޯޓު ވަނީ މާދަމާ ފަތިހު 5:00 އާ ހަމައަށް ބަންދުކޮށްފައެެވެ.
ބޯ ވާރެޔާ ބާރުގަދަ ވަޔާ އެކު ދަތުރުކާ ޠޫފާންގެ ސަބަބުން އިމާރާތްތަކަށާއި، ދަނޑު ބިންތަކަށް ބޮޑެތި ގެެއްލުންތަކެއް ލިބޭނެކަމަށް ލަފާކުރެވޭއިރު، ޠޫފާން ދަތުރުކުރާނެ ކަމަށް ބެލެވޭ ހިސާބުތަކުން މީހުން ބާލައި ރައްކާތެރި ހިސާބުތަކަށް ވަނީ ގެންދެވިފައެވެ. މިގޮތުން ވެސްޓް ބެންގޯލް ސްޓޭޓުގައި 5 ލައްކަ މީހުން އަދި އޮޑީޝާ ސްޓޭޓުގައި 1 ލައްކަ 50 ހާސް މީހުން ވަނީ ރައްކާތެރި ހިސާބުތަކަށް ގެންދެވިއެވެ.
ޠޫފާން އިންޑިޔާއަށް އެރުމުގެ ކުރިން އޮޑީޝާ ސްޓޭޓަށް ވަނީ އެ ޠޫފާންގެ އަސަރު ފޯރަން ފަށާފައެެވެ. އެ ސްޓޭޓަށް އިއްޔެެއިން ފެށިގެން ބޯކޮަށް ވާރޭވެހި ގަޑިއަކު 106 ކިލޯމީޓާރަށް ވައިޖެހުމުގެ ސަބަބުން ގިނަ ސަރަހައްދުތަކެއްގައި ފެންބޮޑުވެ ގިނަ ގަސްތަކެއް ވެއްޓިފައެވެ.
އަވަށްޓެރި ބަންގްލާދޭޝް ވެސް ވަނީ ޠޫފާން 'އަމްޕަން' އައުމުގެ ކުރިން ރައްކާތެރިކަމުގެ ފިޔަވަޅުތައް އަޅާފައެވެ. ބަންގްލާެދޭޝް ސިފައިން ވަނީ، ޠޫފާން އަރާނެ ކަމަށް ބެލޭވޭ ސަރަހައްދުތަކުގައި ދިިރިއުޅޭ 2 މިލިއަން މީހުން ރައްކާތެރި ތަންތަނަށް ބަދަލުކޮށްފައެވެ. ޠޫފާން ބަންގްލާދޭޝްއަށް އަރާނެ ކަމަށް ބެެލެވެނީ މިރޭ އިރާކޮޅުގެ ވަގުތެއްގައެވެ.
