ކޮވިޑް-19 އިން ރައްޔިތުން ސަލާމަތް ކުރުމަށް ޑޮކްޓަރުން ރެއާއި ދުވާލު ކުރައްވަމުން ގެންދަވާ މަސައްކަތްތަކާއި އެ ބޭފުޅުންގެ ޒާތާބެހި ވާހަކަތައް ފަތުރުފެތުރުން ތަހައްމަލް ނުކުރެވޭނެ ކަމަށް ރައީސް އޮފީހުގެ އަންޑަރ ސެކްރެޓަރީ މުޙައްމަދު މަބްރޫކް ޢަބްދުލްޢަޒީޒު ވިދާޅުވެއްޖެއެވެ.
އެންއީއޯސީ އިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަބްރޫކް ވިދާޅުވީ އެ ބަޔަކަށް ދަތިވެ އުދަގޫވާކަން ކަމުގެ ވާހަކަ ކިތަންމެ ވަރަކަށް ދެއްކެވިޔަސް މައްސަލައެއްނެތް ކަމަށެވެ. އަދި އެބޭފުޅުންގެ އަތްދަށުން ދޫވެގެންދާ ކަންކަމާ ބެހޭގޮތުން ކިތަންމެ ވަރަކަށް ވާހަކަ ދެއްކެވިޔަސް މައްސަލައެއްނެތް ކަމަށް އޭނާ ވިދާޅުވިއެވެ.
މަބްރޫކް ވިދާޅުވީ 24 ގައިރު ޑޮކްޓަރުން ޚިދުމަތުގައި ތިއްބަވާއިރު އެބޭފުޅުންގެ މަސައްކަތްތަކަށް ފާޑުކިޔައި އެބޭފުޅުންގެ ޒާތާ ބެހި ހަދަމުންދާކަން ފާޙަގަ ކުރެވިފައިވާ ކަމަށެވެ. އެހެންނަމަވެސް އެކަންކަމަކީ ތަހައްމަލް (ޓޮލަރޭޓް) ނުކުރެވޭނެ ކަންކަން ކަމަށް ވިދާޅުވިއެވެ. ޑޮކްޓަރުންނަށް ފާޑުވިދާޅުވެ ހެއްދެވުމަކީ ވަރަށް ކަންބޮޑުވާކަމެއް ކަމަށް ވެސް މަބްރޫކް ވިދާޅުވިއެވެ. " ސައުވީސްގަޑިއިރު ޑޮކްޓަރުން ކޮށްދެއްވާ މަސައްކަތުގެ އަގުވަޒަން ނުކޮށް އެބޭފުޅުންގެ ހިތްވަރު ގެއްލޭ ގޮތަށް ވާހަކަ ދެއްކުމަކީ ޤަބޫލު ކުރެވޭނެ ކަމެއްނޫން،" މަބްރޫކް ވިދާޅުވިއެވެ.
