ބައިނަލްއަގްވާމީ ގޮތުން ގަބޫލުކުރާ ލީބިޔާގެ ސަރުކާރު، ގަވަރމެންޓް އޮފް ނޭޝަނަލް އެކޯޑް (ޖީއެންއޭ) ގެ ސިފައިން، ހަނގުރާމަވެރިޔާ ޚަލީފާ ޙަފްތަރުގެ ހަނގުރާމަވެރިން ބަލިކޮށް، ލީބިޔާގެ ހުޅަނގުގެ ބޮޑު ބައެއް ހިފައިފިއެވެ.
އަރަބި ބައެއް ގައުމުތަކުގެ، ޚާއްސަކޮށް މިސްރާއި، ސައޫދީ އަރަބިއްޔާއާއި، ޔޫއޭއީގެ އެހީގައި ލީބިޔާގެ ގާނޫނީ ސަރުކާރު ވައްޓާލައި، ވެރިރަށް ޓްރިޕޮލީ (ޠަރާބުލުސް) ހިފަން ހަނގުރާމަކުރާ ޚަލީފާ ޙަފްތަރުގެ ލަޝްކަރު އެރަށް ހިސާރުކޮށްގެން އޮންނަތާ އަހަރަކަށްވުރެ ގިނަ ދުވަސް ވެފައި ވާއިރު، އޭނާގެ ލަޝްކަރު މިހާތަނަށް ފެނުނީ ވަރަށް ވަރުގަދަކޮށެވެ.
އެހެންނަމަވެސް، ހައިރާންކުރަނިވި ގޮތަކަށް ޙަފްތަރުގެ ލީބިޔަން ނޭޝަނަލް އާމީ (އެލްއެންއޭ) ގެ ހަނގުރާމަވެރިން ވަނީ ފަހަތަަށް ޖެހިފައެެވެ. ސަރުކާރުން ފަށާފައިވާ 'ވޮލްކެނޯ އޮފް އެންގަރ' ހަމަލާގައި ސަރުކާރު ސިފައިން ވަނީ ވެރިރަށް ޓްރިޕޮލީން ފެށިގެން ހުޅަނގަށް، ޓިއުނީޝިޔާ (ތޫނިސް) ގެ ސަރަަހައްދީ ރޮނގާ ހަަމައަށް ހުރި ގިނަ ރަށްތަކެއް ހިފާފައެވެ.
24 ގަޑިއިރު ތެރޭގައި ހަފުތަރުގެ ހަނގުރާމަވެރިން ގާތްގަނޑަކަށް 3250 އަކަ ކިލޯމީޓަރުގެ ސަރަހައްދެއް ދޫކޮށް ފަހަތަށް ޖެހިފައި ވާއިރު، ސަރުކާރު ސިފައިން ވަނީ އަށް ރަށެއް ހިފާފައެވެ. އޭގެ ތެރޭގައި ޞިރްމާން، ޞަބްރާތާ، ޢުޖައިލާތު، ރަޤްދާލީން، ޒަލްޠަން، އަލްޖަމީލު ގެ އިތުރަށް މަލީތާެއާއި ޢައްސާވެސް ހިމެނެއެވެ.
މި ހަމަލާގައި ސަރުކާރު ސިފައިންގެ 9 މީހުން މަރުވެފައި ވާއިރު، ޙަފްތަރުގެ ހަނގުރާމަވެރިންްގެ ތެރެއިން 30 މީހުން މަރުވެފައި ވެއެވެ.
ލީބިޔާގެ ދާޚިލީ ހަނގުރާމައިގެ ޚަބަރުތައް ދިރާސާކުރާ އަބަރި ބައެއް ނޫސްވެރިން ބުނެފައިވާ ގޮތުގައި، ލީބިޔާގެ ސަރުކާރު (ޖީއެންއޭ) ސިފައިން މި ވަރުގެ ހަލުވި ކުރިއެރުމެއް ހޯދީ ތުރުކީ ވައިގެ ބާރުގެ އެހީގައެވެ. ތުރުކީގެ ތާއީދު އޮތް ޖީއެންއޭގެ ހަމަލާތަކުގައި ސިފައިން ވަނީ ތުރުކީގެ ޑްރޯންތައް ބޭނުންކޮށްފައެވެ. ތުރުކީގެ ޑްރޯންތަކަކީ ޔޫރަޕްގައި ބޭނުންކުރެވޭ އެންމެ ޒަމާނީ ޑްރޯންތަކެވެ.
ލީބިޔާގެ ދާޚިލީ ހަނގުރާމައިގެ ތެރެއަށް ބޭރު ގައުމުތަކުން ވަދެ ދެ ފަރާތަށް ހަތިޔާރާއި، ފައިސާގެ އެހީ ދެމުން ދިއުން ވަނީ ހަނގުރާމަ ނުހުއްޓި ކުރިއަށް ދިއުމުގެ މައިގަނޑު ސަބަބެވެ.
އދ.ން ލަފާކުރާ ގޮތުގައި ޓްރިޕޮލީ ހިސާރުކޮށްގެން ޙަފްތަރު ދެމުންދާ ހަމަލާތަކުގެ ސަބަބުން އާއްމުންގެ އެތައް ސަތޭކަ ބަޔަކު މަރުވެފައި ވާއިރު، 2 ލައްކައެއްހާ މީހުން ވަނީ ގެދޮރު ދޫކޮށް ގޮސްފައެވެ.
2011 ވަނަ އަަހަރު މުޢައްމަރުލް ޤައްޒާފީގެ ވެރިކަން ވައްޓާލި ފަހުން ލީބިޔާއަށް ހަމަޖެހުން އައިސްފައި ނުވެއެވެ. ޓްރިޕޮލީގައި އޮތް ނޭޝަލަން އެކޯޑް ސަރުކާރުން ހުޅަނގު ކޮންޓުރޯލު ކުރާއިރު، އިރުމަތީގެ ސަރަހައްދުތައް، ޙަފްތަަރުގެ ތާއީދާއެކު، ކޮންޓުރޯލު ކުރަނީ ވާދަވެރި ސަރުކާރަކުންނެވެ.
