ވިލާތަށާއީ މެދުއިރުމައްޗަށް ދަތުރު ކޮށްފައިވާ ދިވެއްސެއްގެ ގައިން ކޮވިޑް-19 އަށް ޝައްކު ކުރެވޭ އަލާމާތްތަކެއް ހުރެގެން އޭނާގެ ސާމްޕަލް ނަގައި ޓެސްޓް ކުރުމުގެ މަސައްކަތް ފަށައިފިއެވެ.
އެޗުޕީއޭއިން ވިދާޅުވީ އޭނާ އައިސޮލޭޝަން ފެސިލިޓީއަށް ގެންގޮސް އެކަހެރި ކުރުމުގެ މަސައްކަތް ދަނީ ކުރަމުން ކަމަށެވެ. "ރައްކާތެރިކަމުގެ ގޮތުން ޢަމަލު ކުރަމުންދާ އުޞޫލުގެ ދަށުން، #ކޯވިޑް19 އަށް ޝައްކުކުރެވޭ އަލާމާތްތައް ހުރެގެން، ވިލާތާއި މެދުއިރުމައްޗަށް ދަތުރުކޮށްފައި އައި ދިވެއްސެއްގެ ސާމްޕަލް ނަގާ ޓެސްޓްކުރުމުގެ މަސައްކަތް ކުރިއަށް ގެންދެވޭނެ،" އެޗުޕީއޭގެ ޓުވީޓުގައި ވިދާޅުވެފައިވެއެވެ.
ރާއްޖެއިން މިހާތަނަށް ވަނީ މިބަލި ޖެހިފައިވާ 13 މީހުން ފެނިފައެވެ. އޭގެތެރެއިން 3 މީހަކު ވަނީ ރަނގަޅުވެފައެވެ. އައިސޮލޭޝަން ފެސިކިޓީތަކުގައި މިވަގުތު 17 މީހުން އެބަތިއްބެވެ. ކަރަންޓީން ފެސިލިޓީތަކުގައި 442 މީހުން އެބަތިއްބެވެ.
މުޅި ދުނިޔެއަށް ބަލާއިރު 335،955 މީހުންނަށް މިބަލި ޖެހުނެވެ. އޭގެ ތެރެއިން ރަނގަޅުވެފައިވަނީ 97،704 މީހުންނަށެވެ. މަރުވެފައިވަނީ 14،632 މީހުންނެވެ.
