ފާއިތުވި ފެބުރުވަރީ މަހުގެ ފަހު ހަފުތާގައި އިންޑިޔާގެ ވެރިރަށް ނިއުދިއްލީގައި ހަރުކަށި ހިންދޫން ނުކުމެ އެ ރަށުގައި ދިރިއުޅޭ މުސްލިމުންނަށް ދިން ހަަމަލާތަކަކީ އިންޑިޔާގެ ފަހުގެ ތާރީޚުގައި ފެނިފައި ނުވާފަދަ އަނިޔާވެރި ހަމަލާތަކެކެވެ. ރަސްމީ އަދަދުތަކުން ދައްކާ ގޮތުގައި، ހަފުތާއެއްހާ ދުވަހުގެ ތެރޭގައި، މުސްލިމުންގެ 36 މީހުން މަރާލައި، 200 އެއްހާ މީހުން ޒަޚަމްކޮށްލާފައި ވެއެވެ. ނުރަސްމީ އަދަދުތައް ހުރީ މިއަށްވުރެ މަތީގައެވެ.
ނިއުދިއްލީ ހަމަނުޖެހުންތައް ފެށުނުތާ މިއަދަށް މަހެއް ވީއިރު، މިކަމުގެ މާއްދީ ގެއްލުންތައް އަދިވެސް ފުރިހަމަައަށް އަންދާޒާކުރެވިފައި ނުވެއެވެ. ހަމަނުޖެހުން އެންެމެ ބޮޑުވި އަވަށްތަކުން ގިނަ އަދަދެއްގެ މުސްލިމުން އެމީހުންގެ ގެދޮރު ދޫކޮށް ގޮސްފައިވާއިރު، އަދިވެސް އެނބުރިދާނެ ހިތްވަރެއް ނެތެވެ.
މި ހަމަނުޖެހުންތަކުގައި މުސްލިމުންނަށް ލިބުނު ގެއްލުން އިންޑިޔާއިން މިހާތަނަށް ހާމަކޮށްފައި ނުވިޔަސް، ބޭރުގެ ޚަބަރުފަތުރާ ބައެއް ވަސީލަތްތަކުން ކުރި ދިރާސާތަކުން ދައްކާ ގޮތުގައި ހަރުކަށި ހިންދޫންގެ ބަޔަކު ބަޑިއާއި، ލަޓިބުރިއާއި، ގަލާއި، އެހެނިހެން ހަތިޔާރާއެކު ނުކުމެ ހިންގި އަނިޔާވެރި އަމަލުތަކުގައި 200 ގެއާއި، 100 ފިހާރައާއި، 500 އުޅަނދު އަންދާލާފައި، ނުވަތަ ބޭނުން ނުކުރެވޭ ވަރަށް ހަލާކުކޮށްލާފައި ވެއެވެ. މީގެ އިތުރަށް 8 މިސްކިތަކާއި، މުސްލިމް މަދަރުސާއަކާއި، ކާބޯތަކެތި ރައްކާކުރާ އެތައް ގުދަނެއް ސުންނާފަތިކޮށްލާފައި ވެއެވެ.
އެ ފަރާތްތަކުން އަންދާޒާކުރާ ގޮތުގައި މި ހަމަލާތަކުގައި މުސްލިމުންނަށް ލިބުނު ގެއްލުން 30 މިލިއަން އެމެރިކާ ޑޮލަރަށް (2.26 ބިލިއަން އިންޑިއަން ރުޕީސް) ވުރެ ބޮޑެވެ. އާދައިގެ ހާލެއްގައި ދިރިއުޅެމުން އައި ބަޔަކަށް ހަފުތާއެއްހާ ދުވަހުގެ ތެރޭގައި ލިބުނު ގެއްލުމަށް ބަލާއިރު، މިއީ ފޫނުބެއްދޭ ވަރުގެ ބޮޑު ގެއްލުމެކެވެ.
މި ގެއްލުން ބޮޑު ހަމަނުޖެހުންތަކަށް ފަހު އިންޑިޔާގެ މީސްމީޑިޔާގައި އަދިވެސް ބައެއް ފަރާތްތަކުން ދަނީ މުސްލިމުންނާ ގުޅުން ކަނޑާލައި، ބައިކޮޓް ކުރުމަށް ގޮވާލަމުންނެވެ. އަދި ޚަބަރުފަތުރާ ބައެއް ވަސީލަތްތަކުން ދަނީ ނިއުދިއްލީގައި ހިނގި ހަމަނުޖެމަކީ އާދައިގެ ކަމެއްގެ ގޮތަށް ސިފަކުރުމަށް މަސައްކަތްކުރަމުންނެވެ.
އިންޑިޔާ ސަރުކާރުން އެމީހުންނަށް އެއްވެސް އެހީއެއް ނުވާކަމަށް މުސްލިމުން ދަނީ ބުނަމުންނެވެ. އެހެންނަމަވެސް، ނިއުދިއްލީގެ މުސްލިމުންނަށް ލިބޭ އުއްމީދަކީ މުސްލިމް ބައެއް ފަރާތްތަކުން ފަންޑު ގާއިމުކޮށް އެމީހުންނަށް އެހީވަމުން ދިއުމެވެ. އިންޑިޔާގެ އެންމެ މަޝްހޫރު އުރްދޫ އެއް ނޫސް ކަމުގައިވާ 'ސިޔާސަތު' ނޫހުން ގާއިމްކުރި މިއްލަތު ރިލީފް ފަންޑަށް މިހާތަނަށް 4.2 މިލިއަން ރުފީސް ލިބިފައިވާއިރު، އެ ފަންޑުން ވަނީ ހާލުގައި ޖެހިފައިވާ މުސްލިމް އާއިލާތަކަށް ހުކުރު ދުވަހު އެހީގެ ތަކެތި ބަހާފައެވެ.
