ބޭރު ޤައުމުތަކުން ރާއްޖެއަށް އެތެރެވާ ދިވެހިން ކަރަންޓީން ކުރަން ނިންމައިފިއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނެރެފައިވާ ބަޔާނެއްގައި ބުނެފައިވަނީ ޤާނޫނޫގެ ދަށުން ޑިރެކްޓަރ ޖެނެރަލް އޮފް ޕަބަލިކް ހެލްތު ކުރައްވައިފައިވާ މިއަމުރު ތަންފީޒު ކުރައްވަން ފަށްޓަވާނީ މިރޭ މެންދަމު 12 އިން ފެށިގެން ކަމަށެވެ.
މިރޭ 12 އިން ފެށިގެން އެ އެޖެންސީން ވަކި ގޮތެއް އަންގަންދެން އެމެރިކާއިން ރާއްޖެއަށް އަންނަ ދިވެހިން 14 ދުވަހުގެ މުއްދަތަކަށް ސަރުކާރުން ކަނޑައަޅާ ތަނެއްގައި ކަރަންޓީން ކުރުމަށް ނިންމާފައިވާ ކަމަށެވެ. އެނޫން ޤައުމުތަކުން އަންނަ ދިވެހިން 14 ދުވަހަށް ގޭގައި އެކަހެރި ކުރުމަށް ނިންމާފައިވާކަމަށް ވެސް އެޗްޕީއޭގެ ބަޔާނުގައި ވެއެވެ.
ކޮވިޑް-19 އާ ގުޅިގެ މިހާތަނަށް ރާއްޖެ އައުން މަނާކޮށްފައިވާ ޤައުމުތަކުން ރާއްޖެއަށް އަންނަ ދިވެހިން ގޭގައި އެކަހެރި ކުރާ ފަރާތްތަކުގެ ތެރޭގައި ނުހިމެނެއެވެ. އެފަދަ ފަރާތްތައް ކުރިން ވެސް ދިޔައީ އެކަހެރި ކުރަމުންނެވެ.
މިހާތަނަށް ކޮވިޑް-19 އަށް ރާއްޖެއިން ޕޮސިޓިވް ވެފައިވަނީ 13 މީހުންނެވެ. އޭގެތެރޭގައި ދިވެއްސަކު ނުހިމެނެވެ.
