ރާއްޖެއިން ކޮރޯނާ ވައިރަސް ނުވަތަ ކޮވިޑް 19 ފެނުމުން ސަލާމަތީ ފިޔަވަޅެއްގެ ގޮތުގައި އެމްޑީޕީން ކެމްޕޭން ހަރަކާތްތައް ވަގުތީ ގޮތުން މަޑު ޖައްސާލައިފިއެވެ. ކެމްޕޭން ޙަރަކާތްތައް އެޕާޓީން މަޑުޖައްސާލިއިރު މާލެއާއި ރަށްރަށުގައި އެންމެ ފޯރީގައި ގެންދިޔައީ ކެމްޕޭން ކުރައްވަމުންނެވެ. އެގޮތުން އެޕާޓީގެ ރައީސް، ރައީސް މުޙައްމަދު ނަޝީދާއި ޕާޓީގެ ޗެއާޕާސަން ޙަސަން ލަތިފާއި، ރައީސް އިބްރާހީމް މުޙައްމަދު ސާލިޙު އިސްކޮށް ތިއްބަވައިގެން ގެންދެވީ ކެމްޕޭނާ ގުޅޭ ތަފާތު ޙަރަކާތްއްތައް ބާއްވަމުންނެވެ.
އެމްޑީޕީގެ ކެމްޕޭން ޙަރަކާތްތައް މަޑުޖައްސާލީ ރެއިން ފެށިގެންނެވެ. އެޕާޓީގެ ޗެއާޕާސަން ބައިވެރިވާ ގޮތަށް ރޭ ރާވާފައި އޮތް ޕްރޮގްރާމެއް ވެސް ރޭ ވަނީ ކެންސަލް ކޮށްފައެވެ.
"ކޮވިޑް 19 ގެ ސަލާމަތީ ފިޔަވަޅެއްގެ ގޮތުން މިރެއިން ފެށިގެން (ރެއިން) އެމްޑީޕީގެ ލޯކަލްކައުންސިލް އިންތިޚާބަށް ރަށްވެހި ފަތިސްގެ ކެމްޕޭން ޙަރަކާތައް މަޑުޖައްސާލި ވާހަކަ ދަންނަވަން،" އެޕާޓީން ވިދާޅުވެފައިވެއެވެ.
ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިޚާބު ބާއްވާ ގޮތަށް ހަމަޖެހިފައިވަނީ އެޕްރީލް 4 ގައެވެ. އެހެންނަމަވެސް ބައެއް ފަރާތްތަކުން އިލެކްޝަންސް ކޮމިޝަނަށް ގޮވާލަމުން ގެންދަނީ އިންތިޚާބު ފަސް ކުރުމަށެވެ. އެހެންނަމަވެސް އިލެކްޝަންސް ކޮމިޝަނުން ވިދާޅުވެފައިވަނީ އިންތިޚާބު ފަސްކުރަންޖެހޭ ކަމުގެ މާހައުލެއް އޮތްކަމަށް ދައުލަތުގެ އެއްވެސް މުއައްސަސާއަކުން އަންގާފައި ނުވާ ކަމަށެވެ. އެކިމިޝަނުން މިހެން ވިދާޅުވިއިރު ރާއްޖެއިން އެއްވެސް މީހަކު ކޮވިޑް 19 އަށް ޕޮޒިޓިވް ވެފައެއް ނުވެއެވެ. އެހެންނަމަވެސް މިހާރުވަނީ ދެ މީހަކު އެބައްޔަސް ޕޮޒިޓިވްވެ އޮރެންޖު ލެވެލްއަށް ހާލަތު ބަދަލުކޮށްފައެވެ.
އެމްޑީޕީގެ އިތުރުން ޕީޕީއެމްއިން އިއްޔެވަނީ އެޕާޓީގެ ކެމްޕޭންތައް ވެސް ވަގުތީ ގޮތުން ހުއްޓާލައިފައެވެ.
