ކޮވިޑް 19 ރާއްޖެއަށް އަތުވެދާނޭ ކަމުގެ ބޮރު ހީވެފައިވާ މި ދަނޑިވަޅުގައި ރާއްޖޭގެ މަޝްހޫރު ކުންފުންޏެއް ކަމުގައިވާ ހެޕީ މާކެޓުން ރާއްޖެއަށް އެތެރެކުރާ ކާބޯތަކެތީގެ ބާވަތްތައް ހުސްނުވެ ލިބޭން ހުންނާނޭ ފަދަ ގޮތަކަށް އެތެރެ ކުރެވޭނޭ ކަމުގެ ޔަގީންކަން ލިބިފައިވާ ކަމަށް އެ ކުންފުނިން ބުނެފިއެވެ. ހެޕީ މާކެޓުން ނެރުނު ނޫސް ބަޔާނެއްގައި ބުނެފައިވާ ގޮތުގައި ކާބޯތަކެތީގެ އަގު ބޮޑު ނުކޮށް ރޯދަމަސް ނިމޭންދެން ހިފަހައްޓާނެއެވެ.
ހެޕީ މާކެޓުން އެތެރެކުރާ މުހިއްމު ތަކެތީގެ ތެރޭގައި ކުކުޅާއި ކުކުޅުގެ ބައިތަކާއި ކުކުޅު ބިސް ހިމެނެއެވެ. ހެޕީ މާކެޓުން ވަނީ ފިނި ކުރި ކުކުޅުގެ އަގު މިއަދުން ފެށީގެން ހެޔޮ ކޮށްފައެވެ.
ހެޕީ މާކެޓަކީ ރާއްޖޭގައި ކާނޯތަކެތި އެތެރެކޮށް ވިއްކާ އެންމެ ބޮޑު އެއް ކުންފުންޏެވެ. އަދި އެންމެ ދުވަސްވީއެއް ކުންފުނިވެސްމެއެވެ. މީގެ ކުރީންވެސް އެކި ކަހަލަ ދަތިތަކާ ގުޅިގެން ރައްޔިތުންނަށް ފަސޭހަ މަގުން ކާބޯ ތަކެއްޗާއި ފެން ލިބޭނޭ މަގު ފަހި ކޮށް ދިނުމަށްޓަކައި ހެޕީ މާކެޓުން ވަނީ ފިޔަވަޅު އަޅައިފައެވެ.
ރާއްޖޭގެ އެންމެ މަޝްހޫރު "ލައިފް" ފެން އުފައްދައި ވިއްކަނީ ހެޕީ މާކެޓުގެ ވަކި ކުންފުންޏަކުންނެވެ.
މިއަދު ނެރުނު ނޫސް ބަޔާނުގައި ފާހަގަ ކޮށްފައިވާ ގޮތުގައި ހެޕީމާކެޓުން ވިއްކާ ކާބޯތަކެތީގެ އަގު ބާޒާރުގައި ބޮޑު ވިޔަ ނުދިނުމަށް ކުރެވޭން ހުރި ހުރިހައި މަސައްކަތެއް ކުރާން ކުންފުނީގެ މެނޭޖްމަންޓުން ވަނީ ނިންމައިފައެވެ.
