ރާއްޖޭގެ ވެރިކަމަށް ވަޑައިގަންނަވާ ކޮންމެ ބޭފުޅަކު ވެސް އެބޭފުޅެއްގެ ވެރިކަމުގެ ދައުރު ނިމުމުން، ސިޔާސީ ޙަސަދަވެރިކަމުގައި، އެބޭފުޅުން ޖަލަށްލުމުގެ ސަޤާފަތް ނިމޭނީ ކޮން އިރަކުންތޯ ވިދާޅުވެ ކުރީގެ ނާއިބު ރައީސް ޑރ. މުޙައްމަދު ޖަމީލް އަޙުމަދު ސުވާލު ކުރައްވައިފިއެވެ.
އޭނާ މިސުވާލު ކުރެއްވީ ދަރުމަވަންތަ ހޮސްޕިޓަލުގެ ހައިޑްރޯތެރަޕީގެ ޚިދުމަތް ފެށިވާހަކަ ލިޔެފައިވާ ޚަބަރެއްގެ ސުރުޚީހިމެނޭ ފޮޓޯއަކާއި ސިނަމާލެ ބުރިޖުގެ ފޮޓޯއަކާއެކު ކުރައްވާފައިވާ ޓުވީޓެއްގައެވެ. އެޓުވީޓުގައި އޭނާ ވިދާޅުވެފައިވަނީ ދަރުމަވަންތަ ހޮސްޕިޓަލާއި ސިނަމާލެ ބުރިޖަކީ ހަގީގީ ތަރައްގީކަން ހާމަވެގެން ގޮސްފައިވާ ކަމަށެވެ. "މިއަދު ހާމަވެގެން މިދަނީ މި ތަރައްޤީއަކީ ހަޤީގަތެއްކަން،" އޭނާ ވިދާޅުވެފައިވެއެވެ. " ވެރިކަން ނިމުމުން، ސިޔާސީ ހަސަދަވެރިކަމުގައި، ލީޑަރުން ޖަލަށްލުމުގެ ސަޤާފަތް ނިމޭނީ ކޮން އިރަކުންބާ؟ ނޫނީ މި އުޅެނީ އެކަކު ގެނައި ތަރައްޤީ އަނެކަކަށް ހަޖަމް ނުވުމުގެ މައްސަލައެއްބާ؟" ޖަމީލް ސުވާލު ކުރެއްވިއެވެ.
ދަރުމަވަންތަ ހޮސްޕިޓަލަކީ ރައީސް އަބްދުﷲ ޔާމީން ސަރުކާރުން އިމާރާތްކޮށްފައިވާ 25 ބުރީގެ އިމާރާތެކެވެ. ރައީސް ޔާމީންގެ ސަރުކާރުން ވަނީ އެތަން އެންމެޒަމާނީ ޚިދުމަތްލިބޭ ސަރަހައްދީ ފެންވަރުގެ ހޮސްޕިޓަލަކަށް ހެދުމަށެވެ. ބުރިޖަކީ ޔާމީން ސަރުކާރުގައި ހަދައިދީފައިވާ ބުރިޖެކެވެ.
އެހެންނަމަވެސް ރައީސް ޔާމީންގެ ވެރިކަން ނިމުމާއެކު މަނީލޯންޑަރިންގެ ދައުވާ އެމަނިކުފާނުގެ މައްޗަށް އުފުލައި ކޯޓުގައި އެދައުވާ ސާބިތުވުމުން މިހާރުވަނީ 5 އަރަށް ޖަލަށް ލައިފިއެވެ.
ޑރ. ޖަމީލަކީ ރައީސް ޔާމީނާ ދެކޮޅަށް މަސައްކަތް ކުރެއްވުމަށްފަހު އެމަނިކުފާނު ޖަލަށް ލެއްވުމުން ދިފާޢީ ވަކީލެއްގެ ގޮތުގައި ނުކުމެ ވަޑައިގެން މަސައްކަތް ކުރައްވަމުން ގެންދަވާ ބޭފުޅެވެ.
