މިއަހަރުގެ މަސްވެރިންގެ ދުވަހުގެ ޙަރަކާތްތައް މާދަމާ ފަށާނެ ކަމަށް ފިޝަރީޒް މިނިސްޓްރީން ވިދާޅުވެއްޖެއެވެ.
މިއަހަރުގެ މަސްވެރިންގެ ދުވަހުގެ ޙަރަކާތްތައް ކުރިއަށް ގެންދަނީ ހުޅުމާލޭގައެވެ. މިއަހަރުގެ ޙަރަކާތްތައް މާދަމާއިން ފެށިގެން 10 އަށް ކުރިއަށްދާނެއެވެ. މަސްވެރިމްގެ ދުވަހުގެ ޙަރަކާތްތަކުގައި ހުރިހާ އަތޮޅުތަކުން މަސްވެރިންނާއި މަސްވެރިކަމުގެ ސިނާޢަތުގެ ގިނަ ޢަދަދެއްގެ ކުންފުނިތައް ބައިވެރިވެއެވެ. އަދި އަމިއްލަ ފަރާތްތަކުންވެސް ބައިވެރިވެއެވެ.
ޒުވާނުންގެ މަސްދަތުރު
މާދަމާ އޮންނަ އެންމެ މުހިންމު ޙަރަކާތަކީ ޒުވާނުންނަށް ބާއްވާ ދޮށީގެ މަސްވެރިކަމެވެ. މި ދަތުރު އޮންނާނީ 6 އިން 7 އަށެވެ. މިއީ ދޮށީގެ މަސްވެރިކަމުގައި ޒުވާނުންގެ ބައިވެރިވުން އިތުރުކުރުމަށާއި ދޮށީގެ މަސްވެރިކަމަށް ޒުވާނުން އަހުލުވެރިކޮށް ޒުވާން މަސްވެރިންތަކެއް އުފެއްދުމުގެ ބޭނުމުގައި ބާއްވާ ދަތުރެކެވެ. މިދަތުރު ބާއްވަނީ ބޭންކް އޮފް މޯލްޑިވްސްއާ ގުޅިގެންނެވެ. މިދަތުރުގައި ޖުމްލަ 30 ޒުވާނުން ބައިވެރިވާނެއެވެ. އެމީހުން ދާނީ ދެ ދޯންޏެއްގައެވެ. ދޯންޏެއްގައި ދާނީ 15 މީހުންނެވެ. މިމަސްދަތުރުގައި އެންވެރިކަންކުރާ ގޮތާއި މާކަނޑުގައި ދޮށީގެ މަސްވެރިކަން ކުރާނެ ގޮތް އަމަލީ ގޮތުން ތަޖުރިބާކުރުމުގެ ފުރުޞަތު ލިބިގެންދާނެއެވެ.
ފިޝަރީޒް އެކްސްޕޯ
ފިޝަރީޒް އެކްސްޕޯ ކުރިއަށްދާނީ މިމަހު 6 އިން 8 އަށެވެ. މިއީ މަސްވެރިކަމުގެ ދާއިރާގެ އެކިއެކި ވަޞީލަތްތަކާއި މަސްވެރިކަމުގައި ބޭނުންކުރާ އާލާތްތައް އަދި އެސިނާޢަތްތަކުގެ އުފެއްދުންތަކާއި މަޢުލޫމާތު ފުޅާ ދާއިރާއެއްގައި އެއް ފުރާޅެއްގެ ދަށުން ފޯރުކޮށްދިނުމުގެ މަޤްޞަދުގައި ބާއްވާ އެކްސްޕޯއެއް ކަމަށް ފިޝަރީޒް މިނިސްޓްރީން ވިދާޅުވެފައިވެއެވެ. މިއެކްސްޕޯގައި މަސްވެރިކަމާއި ގުޅުންހުރި ތަކެތި އިޝްތިހާރުކުރުމާއި ވިޔަފާރި އުޞޫލުން ވިއްކުމަށް ބައިވެރިންނަށް ފުރުޞަތު ލިބިގެންދާނެއެވެ. އަދި މަހުގެ އުފެއްދުން އުފައްދާ ފަރާތްތަކަށް އެފަރާތްތަކުގެ އުފެއްދުން މާކެޓްކުރުމުގެ ފުރުޞަތު ލިބިގެންދާނެއެވެ.
މިއެކްސްޕޯ އޮންނާނީ ހުޅުމާލޭ ހުރަވީ ސްކޫލް ހޯލުގައެވެ. އެކްސްޕޯ ހުޅުވުމުގެ ރަސްމިއްޔާތު އޮންނާނީ މާދަމާ ހަވީރު 16:15 ގައެވެ.
މީގައި މަސްވެރިކަމުގެ ސިނާޢަތުގައި އެކިގޮތްގޮތުން ހަރަކާތްތެރިވާ ޖުމްލަ 14 ފަރާތަކުން ބައިވެރިވެއެވެ.
މަސްވެރިންގެ ފޯރަމް
މަސްވެރިންގެ ފޯރަމް އޮންނާނީ މިމަހު 8 އިން 9 އަށެވެ. ފޯރަމަކީ މަސްވެރިކަމުގެ ސިނާޢަތުގައި ހަރަކާތްތެރިވާ ފަރާތްތަކަށް މިސިނާޢަތާއި ގުޅުންހުރި އެކިއެކި މަޢުލޫމާތު ފޯރުކޮށްދީ، މަސްވެރިކަމާއި ގުޅުންހުރި ސިޔާސަތުތައް ބައްޓަންކުރާނެ ގޮތާއިބެހޭ ގޮތުން މަޢުލޫމާތު ބަދަލުކުރުމާއި، މިސިނާޢަތު ތަރައްޤީކޮށް ކުރިއެރުވުމާއި ގުޅޭގޮތުން މަޝްވަރާކުރުމުގެ މަޤްޞަދުގައި ބާއްބާ ފޯރަމެކެވެ. މިފޯރަމުގައި މަސްވެރިކަމުގެ ސިނާޢަތުގައި ހަރަކާތްތަކުގެ އިތުރުން، ރާއްޖޭގެ ހުރިހާ އަތޮޅަކުން މަސްވެރިންނާއި، ކެޔޮޅުން އަދި އޮޑިވެރިން ހިމެނޭ ގޮތަށް ޖުމްލަ 50 ފަރާތެއް ބައިވެރިވާނެއެވެ.
މިފޯރަމް އޮންނާނީ ހުޅުމާލޭ ބްރައިޓްވޭ އިންޓަރނޭޝަނަލް ސްކޫލް ހޯލުގައެވެ. ފޯރަމް ހުޅުވުމުގެ ރަސްމިއްޔާތު އޮންނާނީ 8 ޑިސެމްބަރ ވަނަ ދުވަހު ހެނދުނު 9:00 ގައެވެ.
މަސް ކެނޑުމުގެ މުބާރާތާއި އެންސިސް ފިޝަރީޒްގެ ފެކްޓްރީ ހުޅުވުން
ދެޖިންސަށް ހުޅުވާލައިގެން ބާއްވާ މިމިމުބާރާތް އޮންނާނީ 9 ޑިސެމްބަރ ވަނަ ދުވަހު ހަވީރު 17:00 ގައި ހުޅުމާލޭގައި އެންސިސްއިން ޤާއިމުކޮށްފައިވާ ދަޅުމަސް ބަންދުކުރާ ފެކްޓްރީގައެވެ. މިމުބާރާތުގެ އަންހެން އަދި ފިރިހެން ބައިންވެސް 1 ވަނަ، 2 ވަނަ، އަދި 3 ވަނަ ހޮވޭނެއެވެ.
މީގެ އިތުރަށް އެންސިސް ފިޝަރީޒް ޕްރައިވެޓް ލިމިޓެޑުން ހުޅުމާލޭގައި ޤާއިމް ކޮށްފައިވާ ދަޅުމަސް ބަނދުކުރާ ފެކްޓްރީ ހުޅުވުން ވެސް އެދުވަހު އޮންނާނެއެވެ. އެތަން ހުޅުވުމަށް ހަމަޖެހިފައިވަނީ އެދުވަހު ހަވީރު 16:15 ގައެވެ. ހުޅުމާލޭގައި އެންސިސްއިން ޤާއިމުކޮށްފައިވާ މިފެކްޓްރީ ހުޅުވުމުން 400 ވަޒީފާ އިތުރުވެގެން ދާނެކަމަށް އެންސިސްއިން މަޢުލޫމާތު ދެއެވެ. އަދި އެންސިސްއިން އަލަށް ޤާޢިމް ކޮށްފައިވާ 95 ޓަނުގެ އައިސް ޕްލާންޓުވެސް ހުޅުވުމަށް ވަނީ ހަމަޖެހިފައެވެ. މިއައިސްޕްލާންޓް ޤާއިމްކުރުމުން މާލޭ ސަރަހައްދުން މަސްވެރިންނަށް ބޭނުންވާ އައިސް ހޯދުމުގައި ގިނަ ފަސޭހަތަކެއް ވެގެންދާނެއެވެ.
މަސްވެރިންގެ ޚާއްސަ ދުޢާ
މަސްވެރިންގެ ދުވަހު ފަތިސް ނަމާދަށްފަހު ޚާއްސަ ދުޢާއެއް ކުރުން އޮންނާނެއެވެ. ދުޢާކުރުން އޮންނާނީ ޑިސެމްބަރު ދިހަވަނަދުވަހު ފަތިސް ނަމާދަށްފަހެއެވެ.
މިޚާއްސަ ދުޢާ ރާއްޖޭގެ މީހުން ދިރިއުޅޭ ހުރިހާ ރަށެއްގައި ކުރާގޮތަށް ވަނީ ހަމަޖެހިފައެވެ. މާލޭގައި މިދުޢާ ކުރުމަށް ހަމަޖެހިފައިވަނީ އިސްލާމީ މަރުކަޒު އަދި ހުޅުމާލޭ މަސްޖިދް ޙަމަދު ބިން ޚަލީފާ އައްޘާނީގައެވެ.
ޚާއްސަ ޙަފްލާ
މަސްވެރިންގެ ދުވަހުގެ މުނާސަބަތުގައި ފާހަގަކުރާ ރަސްމީ ހަފްލާ ބޭއްވުމަށް ހަމަޖެހިފައިވަނީ ހުޅުމާލޭގެ ސެންޓްރަލް ފާކް ސަރަޙައްދުގައި 10 ޑިސެމްބަރު 2019 ވަނަ ދުވަހުގެރޭ 20:10 ގައެވެ.
މިޙަފްލާގައި މަސްވެރިކަމުގެ ސިނާޢަތަށް ކޮށްދެއްވާފައިވާ ޚިދުމަތްތަކުގެ އަގުވަޒަންކޮށް ޝަރަފްވެރި އިނާމުތަކެއް ދިނުމަށްވަނީ ހަމަޖެހިފައެވެ. އަދި މީގެ އިތުރުން، 2018 ވަނަ އަހަރުގެ މަސްވެރިކަމުގައި ޙަރަކާތްތެރިވި ކުންފުނިތަކުގެ އަދި ދޯނިފަހަރުގެ ތެރެއިން އެންމެ ރަނގަޅަށް މަސައްކަތްކޮށްފައިވާ ފަރާތްތަކުގެ އަގުވަޒަންކުރެވޭނެއެވެ.
މިއަހަރުގެ މަސްވެރިންގެ ދުވަހުގެ ޕްލެޓިނަމް ސްޕޮންސަރުންނަކީ މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އަދި އެންސިސް ފިޝަރީޒް ޕްރައިވެޓް ލިމިޓެޑެވެ. ގޯލްޑް ސްޕޮންސަރުންނަކީ އުރީދޫ މޯލްޑިވެސް، ބޭންކް އޮފް މޯލްޑިވްސް އަދި ހޮރައިޒަން ފިޝަރީޒް ޕްރައިވެޓް ލިމިޓެޑެވެ. ސިލްވަރ ސްޕޮންސަރަކަށް ހަމަޖެހިފައިވަނީ ސީގަލް ގްރޫޕް ޕްރައިވެޓް ލިމިޓެޑެވެ.
