ހުސްވި ނޮވެމްބަރު މަހު 22 ވަނަ ދުވަހުގެރޭ އއ. މާޅޮހު ފަރުބޭރުގައި އަޅާފައި އޮތް ދޯންޏެއްގައި ހިނގި މާރާމާރީއެއްގައި ޒަޚަމްވި އިސްމާޢީލް ޙައްމާދަށް ފަރުވާ ދިނުމަށްފަހު މިހާރުވަނީ ފުލުހުންގެ ބެލުމުގެ ދަށުގައި ކަމަށް ފުލުހުން ވިދާޅުވެއްޖެއެވެ. އޭނާއަށް އައިޖީއެމްއެޗުގައި ފަރުވާ ދިނުމަށްފަހު ދޫކޮށްލާފައިވަނީ ނޮވެމްބަރު މަހު 30 ވަނަ ދުވަހުއެވެ.
ހޮސްޕިޓަލުން ދޫކޮށްލުމުން އޭނާ ފުލުހުންގެ ބެލުމުގެ ދަށަށް ގެންދިޔައީ ފެމިލީ އެންޑް ޗައިލްޑް ޕްރޮޓެކްޝަން ޑިޕާޓުމަންޓުން ބަލަމުންދާ މައްސަލައަކާ ގުޅިގެން ކަމަށް ފުލުހުން ވިދާޅުވިއެވެ. އެ މައްސަލައަކީ އޭނާ، ޢުމުރުން 13 އަހަރުގެ ކުޑަކުއްޖަކާ ކޯޓުން ބޭރުގައި ކައިވެނިކޮށްގެން އުޅޭމައްސަލައެއް ކަމަށް މަޢުލޫމާތުވަނީ ލިބިފައެވެ. އަދި އެކުއްޖާ އިނީ ބަލިވެ ކަމަށްވެސް މަޢުލޫމާތު ލިބިފައިވެއެވެ.
ނޮވެމްބަރު 22 ވަނަ ދުވަހުގެރޭ ދަންވަރުގެ ވަގުތެއްގައި އއ. މާޅޮހު ފަރުބޭރުގައި އަޅައިފައިއޮތް "ޖަރީ" ނަމަކަށް ކިޔާ ދޯނީގައި މަރާމާރީ ހިންގަން ދިމާވީ ސަބަބަކީ ދީނީ ޚިޔާލުތަފާތުވުން ކަމަށްފުލުހުންގެ ތަހުގީގަށް އެނގިފައިވާ ކަމަށް ފުލުހުން ވިދާޅުވިއެވެ.
ޚިޔާލުތަފާތުވުމުގެ ތެރޭގައި މާރާމާރީ ހިނގާފައިވަނީ ރ. މަޑުއްވަރީ ފެހިއަލި އިސްމާޢީލް ހައްމާދާއި، އެރަށު، ބީޗުހައުސް އިސްމާޢީލް ޢާސިފާ ދެމީހުންގެ މެދުގައެވެ. އެ މާރާމާރީގައި އިސްމާޢީލް ޢާސިފް ވަނީ ހައްމާދަށް ވަޅިން ހަމަލާދީ ޒަޚަމް ކޮށްފައެވެ. ޙަމަލާ ދެމުންދިޔައިރު ދޯނީގައި ހުރި ތިންވަނަ މީހާ އޮތީ ނިދާފައި ކަމަށާއި ފަހުން ހޭލެވިގެން އެކަން ހުއްޓުވަން އުޅުމުން އެ ދެމެދަށް އޭނާ ނުވަނުމަށް ޢާސިފް ބުނި ކަމަށް ތަޙުގީގަށް އެމީހާ ކިޔައިދީފައި ކަމަށް ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ވިދާޅުވިއެވެ.
ޢުމުރުން 26 އަހަރުގެ ޙައްމާދަށް ޙަމަލާދިނުމުން އޭނާވަނީ މޫދަށް ފުންމާލައި ފަތާފައި ގޮސް މާޅޮހަށް އަރައިފައެވެ. އަދި އެރަށުން ދިމާވި ބައެއްގެ އެހީތެރިކަމާއެކު އޭނާ ވަނީ އެރަށު ހެލްތު ސެންޓަރަށް ގޮސް ފަރުވާ ހޯދަން ފަށައިފައެވެ. އޭނާއަށް އެހީވި މީހުން ގާތުބުނެފައިވަނީ ދޯނީގައި ތިބި މީހުންނާ ހިނގި ދެބަސްވުމެއްގައި "ކޮށައިލީ" ކަމަށެވެ. ޙައްމާދު އެރަށަށް ދިޔުމުން އޭނާއަށްވީގޮތެއް ބަލަންދާން ޢާސިފު ބުނުމުން ދޯނި ފަޅުތެރެއަށް ވައްދައި އެރަށުތެރެއަށް އަރައި އެވަގުތު ހޭލައިތިބި މީހުންނާ ސުވާލުކޮށް އޭނާއަށް ވީގޮތެއް ނޭނގުމުން ދެންގޮސްތިބީ ޖޯއްޔެއްގައި ކަމަށާއި ފަހު ޢާސިފްވަނީ އެރަށުގައި އޭނާ ހުންނަށް ގެއަށް ގޮސްފައި ކަމަށް ދޯނީގައި ތިންވަނައަށްހުރި މީހާވަނީ ތަޙުޤީޤަށް ކިޔައިދީފައެވެ.
ފުލުހުންނަށް މިކަމުގެ މަޢުލޫމާތު ލިބިފައިވަނީ އެރޭ ދަންވަރު 3:06 އެހައިކަންހާއިރު މާޅޮހު ސިއްޙީ މަރުކަޒުން ގުޅާފައި އެ ޚަބަރު ދިނުމުންނެވެ. އެހިސާބުން ފުލުހުން އެރަށަށް ގޮސް މައްސަލަ ތަހުގީގު ކުރަން ފެށީ ކަމަށް ފުލުހުން ވިދާޅުވިއެވެ. ހައްމާދަށް އެރަށު ސިއްޙީ މަރުކަޒުން ފަރުވާ ދިނުމަށްފަހު އިތުރުފަރުވާއަށް މާލެ ފޮނުވީ އަނެއްދުވަހު ހެނދުނު 7:30 އެހައިކަންހާއިރު އެމްއެންޑީއެފްގެ ލޯންޗެއްގައެވެ.
އޭނާއަށް ދީފައިވާ ޙަމަލާއަށް ބަލާއިރު، ބޮލުގެ މެދަކާ ހިސާބުން ފަހަތުން ގާތްގަނޑަކަށް 10 ސެންޓީމީޓަރުގެ ޒަޚަމަކާއި، ބުރިކަށީން ތިން ސެންޓިމީޓަރުގެ ޒަޚަމެއްހުރިކަމަށާއި، ވާތްފަރާތު ކަންފަތާ ދިމާއިން ގާތްގަޑަކަށް 7 ސެންޓިމީޓަރުގެ ޒަޚަމަކާއި، އަނގައިގެ ތިރީ ތުންފަތުން ފެށިގެން ދަތްދޮޅީގެ ވާތްފަރާތާ ހަމައަށް ގާތްގަނޑަކަށް 4 ސެންޓިމީޓަރުގެ ޒަޚަމެއްހުރި ކަމަށް ފުލުހުން މިއަދު ވިދާޅުވިއެވެ. އޭގެ އިތުރުން ވާތުގެ ދެ އިނގިއްޔާއި އެ އަތްތިލަވެސް ޒަޚަމްވެފައިވާ ކަމަށް ފުލުހުން ވިދާޅުވިއެވެ. ވާތު އަތްތިލައާއި އިނގިލި ޒަޚަމްވެފައިވަނީ ދިފާޢުވުމަށް ހައްމާދުކުރި މަސައްކަތުގެ ތެރޭގައި ކަމަށް ފުލުހުންގެ ތަޙުގީގަށް ސާފުވެފައިވާ ކަމަށް ވެސް ފުލުހުބް މިއަދު ވިދާޅވިއެވެ.
ހައްމާދާއި އޭނާއަށް ހަމަލާދިން ޢާސިފަކީ ދީނީ ހަރުކަށި ފިކުރުގެ ބައެއް ކަމަށާއި އެމީހުންގެ ކުށުގެ ރެކޯޑުތައް ވެސް އެބަހުރި ކަމަށް ފުލުހުން މިއަދު ވިދާޅުވިއެވެ. ފުލުހުން ވިދާޅުވީ ހައްމާދަށް ޙަމަލާ ދިނުމަށްފަހު ޢާސިފްވަނީ އޭނާ ބޭނުންކުރި ވަޅި ދޯނިއޮތްދިމާއަށް އެއްލާލައިފައި ކަމަށެވެ. އެހެންނަމަވެސް ފުލުހުން މިހާރުވަނީ އެސަރަޙައްދަށް ޑައިވްކޮށްގެން ވަޅިނަގައިފައި ކަމަށް ވެސް ފުލުހުން ވިދާޅުވިއެވެ.
