ރައްޔިތުންގެ މަޖިލިހުގެ އިއްޔެގެ ޖަލްސާގައި ބައެއް މެމްބަރު ކުރިމިނަލް ކޯޓުގެ ގާޒީ އަހުމަދު ހައިލަމްގެ މައްޗަށް ތުހުމަތުކޮށް ދެއްކި ވާހަކަތަކަކީ ފަނޑިޔާރެއްގެ ހައިސިއްޔަތުން އޭނާ ކުރައްވަމުން ގެންދަވާ މަސައްކަތަށް ހުރަސް އެޅުން ކަމަށް ހައިލް ވިދާޅުވެއްޖެއެވެ.ު
ނަސްރުގެ ދުވަހުގެ ތަހުނިޔާ ވިދާޅުވެ ކުރިމިނަލް ކޯޓުގެ މުވައްޒަފުން އުޅޭ ވައިބަރ ގުރޫޕަށް ފޮނުވި މެސެޖާއެކު، ރައީސް އިބްރާހީމް މުހައްމަދު ސާލިހާއި، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ ކަރުގައި ޗޭނު ޖަހައި ގަން ހިންގާ މަންޒަރު ދައްކުވައިދޭ ކުރެހުމެއް ހައިލަމް ޕޯސްޓު ކުރުމުން ރައްޔިތުންގެ މަޖިލީހުގެ އިއްޔެގެ ޖަލްސާގައި އެމްޑީޕީގެ މެމްބަރުން ވަނީ ވަރަށް ބޮޑަށް އޭނާއަށް ފާޑު ވިދާޅުވެފައެވެ.
އެހެންނަމަވެސް ހައިލަމް ރޭ ވަނީ އެކަން ކުރެވުނީ އެ ކުރެހުމުގައ ރައީސް އިބްރާހީމް މުހައްމަދު ސާލިހާއި ރައްޔިތުންގެ މަޖިލީހުގެ ރައީސްގެ ފޮޓޯ ހުރިކަން ނޭނގި ކަމަށެވެ. އެ ކުރެހުން ޕޯސްޓުކުރެއްވީ އޭގައި ހ. ހާޖަރާގެ ޢަބްދުﷲ ލުތުފީ ހުރުމުން ކަމަށްވެސް ހައިލަމް ވަނީ ވިދާޅުވެފައެވެ. ލުތުފީގެ އިތުރަށް އޭގައި ތިބީ ކޮންބައެއްތޯ ބައްލަވާ ނުލައްވާ ކަމަށްވެސް އޭނާ ވިދާޅުވެފައިވެއެވެ. ނޭނގި ކުރެވުނު ޢަމަލުގެ ސަބަބުން އޭނާ ވަނީ މަޢާފަށް ވެސް އެދިވަޑައިގެންފައެވެ.
މަޢާފަށް އެދިވަޑައިގެން ހައިލަމް ރޭ ނެރުއްވާފައިވާ ބަޔާނުގައި ވިދާޅުވެފައިވަނީ އޭނާ އެފޮޓޯ ޝެއާކޮށްފައިވަނީ ކުރިމިނަލް ކޯޓުގެ މުވައްޒަފުންގެ ޕްރައިވެޓު ވައިބާ ގުރޫޕެއްގައި ކަމަށެވެ. އެހެންނަމަވެސް އެ ފޮޓޯ ޝެއާކޮށްފައިވަނީ ސޯޝަލް މީޑިއާގައި ކަމަށް ބުނެ ސިޔާސީ ބައެއް ފަރާތްތަކުން ވާހަކަ ދެއްކި ކަމަށެވެ. "ވަކީން ޚާއްސަކޮށް ރައްޔިތުންގެ މަޖިލީހުގެ ބައެއް މެމްބަރުން އަޅުގަނޑު ބަލަމުންދާ މައްސަލައަކަށް ނުފޫޒު ފޯރުވުމުގެ ގޮތުން އަޅުގަނޑު އެ މައްސަލައިގައި ރިޝްވަތުނަގާފައިވާ ކަމަށް ތުހުމަތުކޮށް މަޖިލީހުގެ ތަޅުމުގައި ވާހަކަ ދައްކާފައިވާތީ އެފަރާތްތަކުގެ ޢަމަލަކީ ކޯޓުގައި ކުރިއަށްދާ މައްސަލައަށާއި، ފަނޑިޔާރެއްގެ ހައިސިއްޔަތުން އަޅުގަނޑު ކުރަމުންދާ މަސައްކަތަކަށް ނުފޫޒު ފޯރުވުމުގެ ގޮތުން ކޮށްފައިވާ އަމަލުތަކެއް،" ކަމަށްވެސް ވިދާޅުވެފައިވެއެވެ.
އެފަދަ ތުހުމަތު ތަކެއް މަޖިލީހުގެ ބައެއް މެމްބަރުން ކުރެއްވިޔަސް އޭނާގެ މަގާމުގެ ހައިސިއްޔަތު ބޭނުންކޮށްގެން އެއްވެސް ފަރާތަކަށް ނާޖާއިޒު މަންފާއެއް ހޯދައި ދިނުމަށް އެއްވެސް އިރެއްގައި އެއްވެސް ސިފައެއްގައި މަސައްކަތް ކޮށްފައިނުވާނެ ކަމަށް ހައިލަމް ވިދާޅުވެފައިވެއެވެ. އެފަދަ ކަމެއްގައި ބައިވެރިވެފައި ނުވާނެކަމުގެ ޔަގީންކަން ދިވެހި އެންމެހާ ރައްޔިތުންނަށް ދެއްވާ ކަމަށް ވެސް އޭނާ ވިދާޅުވެފައިވެއެވެ.
ހައިލަމްގެ ތަހުނިޔާގެ މެސެޖާއެކު ރައީސް އިބްރާހީމާއި، ނަޝީދާ ދެބޭފުޅުންގެ ކަރުގައި ޗޭނުޖަހައި ދަމާފައި ގެންދާ މަންޒަރު ދައްކުވައިދޭ ފޮޓޯއެއް ޕޯސްޓު ކުރި މައްސަލަ ތަހުގީގުކޮށްދިނުމަށް އެދި އެމްޑީޕީން ވަނީ ފުލުހުންގެ އިދާރާއަށް ގޮވާލައްވައިފައެވެ.
