އެމްއެމްޕީއާރުސީ ޚިޔާނާތުން ދައުލަތަށް 600 މިލިއަން ލިބެންޖެހޭ 30 މައްސަލައެއް ރައީސް ޔާމީންގެ މައްސަލައިގެ ކުރިން ކޯޓްތަކަށް ހުށަހެޅި ކުރިއަށް ނުގޮސް އޮތްކަމަށް ކްރިމިނަލް ކޯރޓްގެ ކުރީގެ އިސްޤާޒީ އަޙްމަދު ޙައިލަމް ވިދާޅުވެއްޖެއެވެ.
ހައިލަމް މިކަން ހާމަކުރައްވައިފައި ވަނީ މި މައްސަލަތަށް ލަސްވާ ސަބަބު ބެއްލެވުމަކީ ރައީސް ނަޝީދު އިންނަވާ ޖޭއެސްސީގެ މަސްއޫލިއްޔަތެއް ނޫންތޯ ސުވާލު އުފައްދަވައި ކުރެއްވި ޓްވީޓެއްގައެވެ. ރައީސް ޔާމީންގެ މައްސަލައިގެ ޙުކުމާ ހަމައަށް ލައިވްކޮށް ޝަރިޢަތްކުރިއަށް ގެންދެވި ކުރީގެ އިސްޤާޒީ މިސުވާލު އުފައްދަވައި ޓްވީޓް ކުރައްވައިފައި މިވަނީ ސިޔާސީ މީހުންގެ ތެރެއިން ކުރީގެ ރައީސް ނަޝީދަށް ވުރެ ބޮޑަށް އެމްއެމްޕީއާރްސީގެ މައްސަލަތައް ބެލުމަށް މަސައްކަތް ކުރާ ބޭފުޅެއް ފެނިވަޑައިނުގަންނަވާ ކަމަށް މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވުމާ ގުޅިގެންނެވެ.
އެމްއެމްޕީއާރުސީގެ މައްސަލައިގައި ރައީސް ޔާމީނަށް ޙުކުމް އިއްވަން އޮތް ދުވަހުގެ ހެދުނު، ސްލޫކީ މައްސަލައެއް ޖޭއެސްސީން ބަލަމުންދާކަމަށް ބުނެ ޖޭއެސްސީން ވަނީ ހައިލަމް ސަސްޕެންޑްކޮށްފައެވެ. މިކަމާ ގުޅިހެން ހައިލަމް ވަނީ މަޤާމުން އިސްތިއުފާ ދެއްވައިފައެވެ.
އެމްއެމްޕީއާރުސީގެ ޚިޔާނާތުގެ މައްސަލައިގައި ރައީސް ޔާމީން އެކަނި ޖަލަށް ލުމަކީ އިންސާފު ކަމަށް ދެކެވަޑައި ނުގަންނަވާކަމަށް ރައީސް ނަޝީދު ލިޔުއްވައިފައިވާ ނޯޓެއްގެ ޚަބަރު އިއްޔެވަނީ މީޑއާތަކުން ފެންމަތިކޮށްފައެވެ. މިކަމާ ގުޅިގެން އެމްއެމްޕީއާރްސީ ޚިޔާނާތުގެ މައްސަލައިގެ ބަހުސްތައް އަނެއްކާވެސް މިވަނީ އިތުރުވެގެން ގޮސްފައެވެ.
ރައީސް ޔާމީން ފިޔަވައި އެހެން މީހަކު މިމައްސަލައިގައި މިވަގުތު ޖަލަކު ނެތެވެ. ރައީސް ޔާމީން ޖަލުން ދޫކޮށްލުމަށް އެމަނިކުފާނުގެ ޕާޓީ ހިމެނޭ ޕީއެމްޕީއެންސީގެ ކޯލިޝަނުންނާއި އެމަނިކުފާނުގެ ސަޕޯރޓަރުން ކެނޑި ނޭޅި ދަނީ ގޮވާލަމުންނެވެ.
އެމްއެމްޕީއާރްސީ ކޮރަޕްޝަން ހިންގުމުގައި އެންމެ އިސްކޮށް ތިބި ކަމަށް ތުހުމަތު ކުރެވޭ ކުރީގެ ނައިބު ރައީސް އަޙްމަދު އަދީބާއި، އެމްއެމްޕީއާރްސީގެ ކުރީގެ މެނޭޖިން ޑިރެކްޓަރ ޢަބްދުﷲ ޒިޔަތު ވެސް ހުރީ ގޭބަންދަށް ބަދަލު ކޮށްފައެވެ. އެމްއެމްޕީއާރުގެ މައްސަލައިގައި އަދީބުގެ މައްޗަށް ހުރި ހުރިހާ ޙުކުމެއް ވެސް ވަނީ ބާތިލް ކޮށްފައެވެ. އަދީބުގެ މައްޗަށް ދައުވާ އުފުލައިފައިވާ އިތުރު އެމައްސަލަތަކުގެ ޝަރީޢަތްތައް ވެސް ވަނީ މަޑުޖެހިފައެވެ.
