ރަށްރަށުން ކާށިގަންނަން މާލެއަށް އަންނަން ޖެހޭ ހިސާބުން އެވެވެނީ ގައުމަށް އިހުމާލު ކަމަށް ރައްޔިތުންގެ މަޖިލީހުގެ މެމްބަރ ހުސައިން ޝަމީމު ވިދާޅުވެއްޖެއެވެ.
އޭނާ މިހެން ވިދާޅުވީ ރާއްޖެއިން ރުއްގަސް ނަގާ މައްސަލާގައި ކެންދޫ ދާއިރާގެ މެމްބަރު ޢަލީ ޙުސައިން ހުށަހެޅުއްވި ގަރާރަށް ބަހުސް ކުރައްވަމުންނެވެ. އޭނާ ވިދާޅުވީ ނަގަ ރުކަކަށް ނުވަތަ ކަނޑާ ރުކަކަށް 10 ރުއް ނުއިންދާ ކަމަށްވާނަމަ ރަށްރަށުން ވެސް ކާށި ގަންނަން މާލެ އަންނަޖެހިދާނެ ކަމަށެވެ. އެހިސާބުން އެއޮތީ ގައުމަށް އިހުމާލެ ވެވިފައި ކަމަށް އޭނާ ވިދާޅުވިއެވެ.
ރުއްތައް ނަގައިގެން ގޮސް މިއިންދަނީ "ސޭޓުން" ހިއްކައިގެން ހަދާ ރިސޯޓު ފަދަ ތަންތަނުގައި ކަމަށް އޭނާ ވިދާޅުވިއެވެ. ފަޅު ހިއްކައިގެން ރިސޯޓު ހަދާއިރު އެނެއްކޮޅުން ބޮޑު ވިލެއް ހެދިގެންދާ ކަމަށް އޭނާ ވިދާޅުވިއެވެ. އެއީ ވެސް ހައްލު ކުރެވެންޖެހޭ ކަމެއް ކަމަށް އޭނާ ވިދާޅުވިއެވެ. ރާއްޖެ ރާއްޖޭގެ ގޮތުގައި ދެމި އޮންނާނީ ފުރަތަމަ ރާއްޖޭގެ ހިކިފަސް ތަންތަން ސަލާމަތް ކުރެވިގެން ކަމަށެވެ.
