އަންނަ އަހަރަށް ލަފާކުރާ ދައުލަތުގެ ބަޖެޓު ފިނޭންސް މިނިސްޓްރީން ރައްޔިތުންގެ މަޖިލީހަށް މިއަދު ފޮނުވައިފިއެވެ.
ފިނޭންސް މިނިސްޓްރީގެ މީޑިއާ އެގްޒެކެޓިވް މުޙައްމަދު ޝަނޫން ވިދާޅުވީ 2020 ވަނަ އަހަރަށް ލަފާކުރާ ދައުލަތުގެ ބަޖެޓު ރައްޔިތުންގެ މަޖިލީހަށް ފިނޭންސް މިނިސްޓަރ ފޮނުއްވީ މިއަދު މެންދުރު ފަހުގެ ވަގުތެއްގައި ކަމަށެވެ.
މާލިއްޔަތު ޤާނޫނުގައި ބުނެފައިވަނީ ކުރިއަށް އޮންނަ އަހަރު ފެށުމުގެ ލަސް ވެގެން ދެ މަސްކުރިން އެއަހަރުގެ ބަޖެޓު މަޖިލީހަށް ފޮނުވަންވާނެ ކަމަށެވެ.
ޝަނޫން ވިދާޅުވީ ބެޖެޓާބެހޭ އިތުރު ތަފްސީލް އަދި ދެވެންނެތް ކަމަށެވެ. އަންނަ ހަފްތާގައި މަޖިލީހުގެ ތަޅުމަށް ބަޖެޓު ހުށަހަޅައި ބަހުސްކުރާނެ ކަމަށެވެ. ބަހުސް މަރުހަލާގައި ބަޖެޓުގެ ތަފްސީލް އެނގިގެންދާނެ ކަމަށް ވިދާޅުވިއެވެ.
މިހިނގާ 2019 ވަނަ އަހަރަށް ރައްޔިތުންގެ މަޖިލީހުން ފާސްކޮށްދީފައިވަނީ 30 ބިލިއަން ރުފިޔާގެ ބަޖެޓެކެވެ.
