އެމްޑީޕީގެ ނާއިބު ރައީސް ކަމުގެ އިތުރު ދައުރަކަށް ކުރިމަތިލައްވާނެ ކަމަށް އެންމެފަހުން އެމަގާމުގައި ހުންނެވި މުޙައްމަދު ޝިފާޒު ވިދާޅުވެއްޖެއެވެ.
ޝިފާޒަކީ ރައީސް އޮފީހުގެ މިނިސްޓަރެއްގެ ވަޒީފާ ވެސް އަދާކުރައްވަމުން ގެންދަވާ އެމްޑީޕީގެ އެންމެ އިސްމެމްބަރެކެވެ. އެޕާޓީ ރައީސްކަމަށް ކުރިމަތި ލައްވާނެ ކަމަށް ރައީސް ނަޝީދު ވެސް ވަނީ އިއުލާން ކުރައްވައިފިއެވެ. އެޕާޓީގެ ރައީސާއި ނާއިބު ރައީސްގެ މަގާމުގައި އެންމެފަހު ތިއްބެވީ ވެސް އެދެބޭފުޅުންނެވެ.
އެ ދެ މަގާމު މިހާރުވަނީ ހުސްވެފައެވެ. އަލުން ރައީސާއި ނާއިބު ރައީސް އިންތިޚާބު ކުރުމަށް ބާއްވާ ވޯޓު ނެގުން އޮންނާނީ ނޮވެމްބަރު 22 ގައެވެ. އެމްޑީޕީގެ ރައީސް އާއި ނައިބު ރައީސް ކަމުގެ މަގާމު ހުސްވެފައިވާއިރު، އެ ދެ މަގާމަށް ކުރިމަތިލުމުގެ ފުރުސަތު މި މަހުގެ 19 ވަނަ ދުވަހާ ހަމައަށް ވަނީ ހުޅުވާލައިފައެވެ.
