އިސްރާއީލުގައި އިއްޔެ ބޭއްވި އާއްމު އިންތިޚާބުގެ ވޯޓުލުން ނިމިފައިވާއިރު، އެކްޒިޓް ޕޯލް (ވޯޓުލާފައި ނުކުންނަ މީހުންގެ ޚިޔާލު ހޯދައިގެން ނަގާ ޕޯލް) އިން ދައްކާ ގޮތުގައި ބޮޑުވަޒީރު ނަތަންޔާހޫއަށް ގާނޫނުހަދާ މަޖިލިސް، ކްނެސެތުގެ އަޣުލަބިއްޔަތު ނުލިބުނެވެ. އަދި އޭނާގެ ޕާޓީ ލިކޫޑް ވަނީ ދެވަނައަށް ވެއްޓިފައެވެ.
އެކްޒިޓް ޕޯލް ނެގި އިސްރާއީލުގެން ތިން ޓީވީ ސްޓޭޝަންގެ ޕޯލްތަކުން ވެސް ދައްކަނީ އިސްރާއީލު ސިފައިންގެ ކުރީގެ ވެރިޔާ ބެނީ ގަންޓްޒްގެ ބްލޫ އެންޑް ވައިޓް ޕާޓީ ކުރީގައި އޮތްތަނެވެ. 120 ގޮނޑި ހިމެނޭ ކްނެސެތުގައި ލިކޫޑް ޕާޓީއަށް 31 ގޮނޑި ލިބޭނެކަމަށް އެކްޒިޓް ޕޯލްއިން ދައްކާއިރު، އިދިކޮޅު ބްލޫ އެންޑް ވައިޓް ޕާޓީއަށް 33 ގޮނޑި ލިބޭނެކަމަށް ދައްކައެވެ.
އިސްރާއީލުގައި އެންމެ ގިނަ ދުވަހު ބޮޑުވަޒީރުކަން ކުރުމުގެ ރިކޯޑު އޮތް ނަތަންޔާހޫ މިފަހަރު ނުކުތީ ފަސްވަނަ ދައުރަކަށް ހޮވުމުގެ މަގްސަދުގައެވެ. އެހެންނަމަވެސް، މިފަހަރު އޭނާގެ ހުވަފެން ހަގީގަތަކަށް ނުވުން ގާތްކަމަށް ބެލެވެއެވެ.
އިދިކޮޅު ލީޑަރު ބެނީ ގަންޓްޒް އޭނާއަށް ކާމިޔާބު ލިބިއްޖެކަމަށް ސީދާ ނުބުނި ނަމަވެސް، އޭނާ ރޭ ދެއްކި ވާހަކަގައި ބުނެފައި ވަނީ "އަހަރުމެން ކުރަން ނުކުން ކަމުގައި ކާމިޔާބީ ލިބިއްޖެ" ކަމަށާއި ނަތަންޔާހޫ ފެއިލްވެއްޖެ ކަމަށެވެ.
އެގްޒިޓް ޕޯލްގެ ނަތީޖާ ނުކުތް ގޮތުން މޫނުމައްޗަށް މާޔޫސްކަން ވެރިވެފައި ހުރި ނަތަންޔާހޫ ބުނީ އެއްޗެއް ބުނުމުގެ ކުރިން ރަސްމީ ނަތީޖާއަށް އިންތިޒާރުކުރަމުން ދާކަމުގައެވެ. އަދި އޭނާ ބުނި ގޮތުގައި އޭނާ ހުރީ "ވަރުގަދަ ޞަހްޔޫނީ ސަރުކާރެއް އެކުލަވާލުމަށް" ކޯލިޝަނެއް ހެދުމަށް ތައްޔާރަށެވެ.
އެއްވެސް ޕާޓީއަކަށް 61 ގޮނޑި ނުލިބުނު ނަމަ، ކޯލިޝަން ސަރުކާރެއް އެކުލަވާލުމުގެ ފުރުސަތު އެންމެ ބޮޑު ޕާޓީއަކާ ކޯލިޝަން ސަރުކާރެއް އެކުލަވާލުމުގެ މަސައްކަތް، ރަސްމީ ނަތީޖާ ލިބޭތާ އެއް ހަފުތާ ތެރޭގައި އިސްރާއީލުގެ ރައީސު ހަވާލުކުރާނެއެވެ. އަދި އެޕާޓީއަކުން 28 ދުވަހުގެ ތެރޭގައި ކޯލިޝަން ސަރުކާރެއް އެކުލަވާލަން ޖެހެއެވެ.
އިސްރާއީލުގެ ތާރީޚުގައި ފަލަސްޠީނު މީހުންނާމެދު އެންމެ ހަރުކަށި ސިޔާސަތެއް ގެންގުޅުނު އެއް ބޮޑުވަޒީރު، ބެންޖަމިން ނަތަންޔާހޫ، ފުރަތަމަ ބޮޑުވަޒީރުކަން ކުރީ 1996 އިން 1999 އަށެވެ. އެއަށްފަހު 2009 ވަނަ އަހަރު ބޮޑުވަޒީރުކަމަށް ހޮވުނު ގޮތަށް އޭނާ ވަނީ މެދުނުކެނޑި 10 އަހަރު ބޮޑުވަޒީރުކަން ކޮށްފައެވެ.
