ނޫސްވެރިޔާ ރިޟްވާންގެ މަރާ ގުޅޭގޮތުން، ގެއްލުވާލައިފައިވާ މީހުންނާއި ވާނުވާނެގޭ މަރުތަކުގެ މައްސަލަ ބަލާ ކޮމިޝަނުން ނޫސްވެރިންނާ ޙިއްޞާކޮށް އާއްމުކުރައްވައިފައި ވާ ޑްރާފްޓް ރިޕޯރޓް މޯލްޑިވްސް ޕޮލިސް ސާރވިސްއާ ޙިއްޞާ ކުރައްވައިފައި ނުވާކަމަށް އެމުއައްސަސާއިން ހާމަކުރައްވައިފިއެވެ. ފުލުހުންގެ އިދާރާއިން ނެރުއްވި ނޫސް ބަޔާނެއްގައި ބުނެފައި ވަނީ އެރިޕޯޓް އެ އިދާރާ އާ ޙިއްޞާކުރެއްވުމުން ރިޕޯރޓްގައި ފާހާގަކުރައްވައިފައިވާ އެސާރވިސްއާ ގުޅޭ ކަންކަމުގައި އަޅަންޖެހޭ އެންމެހާ ފިޔަވަޅުތައް އަޅަމުންދާނެކަމަށެވެ.
އަދި ފުލިހުންގެ މުއައްސަސާއިން އިތުރަށް ތަޙްޤީޤްކުރުމަށް، އެކޮޝަނުން ލަފާ ދެއްވައިފައިވާ، ތުޙުމަތު ކުރެވޭ ފަރާތްތަކުގެ ޖިނާޢީ ތަޙްޤީޤްތައް ހިންގޭނީވެސް އެ ކޮމިޝަނުން ނެރުނު، އެ މައްސަލައިގެ ޑްރާފްޓް ރިޕޯރޓް ލިބުމުން ކަމަށް ވެސް ފުލުހުންގެ ނޫސް ބަޔާނުގައި ވެއެވެ.
ފުލުހުންގެ އިންޓެލިޖެންސް ދެ އޮފިސަރުންކަމަށްވާ މުޙައްމަދު ޖިނާހާއި އިބްރާހީމް ރިއްފަތުގެ އިތުރުން، މުޙައްމަދު ފަޔާޟް އިސްމާޢީލް، އެކޮމިޝަނަށް ދިން ބަޔާނެއްގައި ފުށު އެރުން ތަކެއް ހުރުމުން އެކަން އިތުރަށް ތަޙްޤީޤްކުރުމަށް އެކޮމިޝަނުން އެދިފައިވާކަމަށް ނޫސް ބަޔާނުގައި ވެއެވެ.
މިމައްސަލައާ ގުޅިގެން މޯލްޑިވްސް ނޭޝަނަލް ޑިފެންސް ފޯސްގެ ކާނަލް ޢަބްދުއްރައޫފު، ގެ މައްސަލަވެސް ތަޙްޤީޤްކުރުމަށް އެކޮމިޝަނުން ލަފާދެއްވައިފައިވާކަމަށް ނޫސް ބަޔާނުގައި ވެއެވެ. އެނާގެ މައްސަލަ ތަޙްޤީޤްކުރުމަށް ލަފާ ދެއްވައިފައިވަނީ، ރިޟްވާނާ ޢަބަދުﷲގެ ޕާސްޕޯރޓް ހޯދުމާ ގުޅޭ ގޮތުން، ކުރީގެ ނާއިބް ރައީސް އަޙްމަދު އަދީބާ މުޢާމަލާތު ކޮށްފައިވާތީއެވެ.
މިމައްސަލަތައް އިތުރަށް ތަޙްޤީޤްކުރުމަށް ކޮމިޝަނުން ތައްޔާރުކޮށްފައިވާ ޑްރާފްޓް ރިޕޯރޓާއި އެކޮމިޝަނުން ހޯދައިފައިވާ މަޢުލޫމާތުތައް ފުލުހުންގެ އިދާރާއާ ޙިއްސާކޮށްދެއްވުމަށް އެކޮމިޝަންގައި އެދިވަޑައިގެންފައިވާކަމަށް ވެސް ފުލުހުންގެ ބަޔާނުގައި ވެއެވެ.
ރިޟްވާން ޢަބްދުﷲ އާ ގުޅޭގޮތުން ފުލުހުންގެ އިންޓެލިޖެންސް އިން ކުރިން ހިންގައިފައިވާ އޮޕަރޭޝަންތަކާއި ގުޅޭ ކަންކަން އިތުރަށް ބަލާ ތަޙްޤީޤް ކުރައްވަމުންދާކަމަށް ވެސް ފުލުހުގެ ބަޔާނުގައި ބުނެފައިވެއެވެ.
ފުލުހުންގެ ބަޔާނުގައި ބުނެފައިވަނީ ރިޟްވާންގެ މަރާގުޅޭ ރިޕޯރޓްގައި ފާހަގަކޮށްފައިވާ އިތުރު ދެފުލުހުންކަމަށްވާ އިބްރާޙިމް ޚަލީލާއި އަޙްމަދު ޙަމީދު ޢަބްދުއްރަޙީމްގެ ނަން އެ ރިޕޯރޓްގައި ވަނީ ބަޔާން ދިން ދެ ފުލުހުން ކަމަށް ވާތީކަމަށް އެކޮމިޝަނުން ބުނެފައިވާ ކަމަށެވެ. އަދި މި ދެފުލުހުންގެ އެއްމައްސަލައެއް އޮތްކަމަށް ކޮމިޝަނަށް ފާހަގަ ނުކުރެވޭކަމަށް އެ ކޮމިޝަނާ ޙަވާލާދީ ފުލުހުންގެ ބަޔާނުގައި ބުނެފައި ވެއެވެ.
ރިލަވާން މަރާ ގްޅޭ ޑްރާފްޓް ރިޕޯރޓް ފުލުހުންނާ ހިއްސާކޮށްފައި ނުވި ނަމަވެސް ނޫސްވެރިންނާއި ރައްޔިތުންގެ މަޖިލީހުގެ ރައީސާއި އެމަޖިލީހުގެ ޕޖީ ލީޑަރުނާ ވަނީ އެރި ޕޯރޓް ޙިއްޞާ ކުރައްވައިފައެވެ. އަދި ރައްޔިތުންގެ މަޖިލީހުގެ ވެބްސައިޓްގައި އެ ރިޕޯރޓް ވަނީ އާއްމުކުރައްވައިފައެވެ.
