ޤާނޫނީ ވަކީލުންގެ ތެރެއިން ޖޭއެސްސީއަށް އައްޔަން ކުރާ ވަކީލަކު ކަނޑައެޅުމަށް ބާއްވާ އިންތިޚާބުގެ ވޯޓާސް ލިސްޓު ޢާއްމުކޮށް އެއަށް ޝަކުވާ ހުށަހެޅުމުގެ ފުރުސަތު އިލެކްޝަންސް ކޮމިޝަނުން ހުޅުވާލައިފިއެވެ. އެ ލިސްޓަށް ޝަކުވާ ހުށަހެޅުމުގެ ފުރުސަތު އޮންނާނީ ޖުލައި 22 ގެ ނިޔަލަށް ކޮންމެ ދުވަހަކު ހެނދުނު 9:00 އިން ހަވީރު 5:00 އަށެވެ.
މީގެ އިތުރަށް އެކޮމިޝަނުން ވަނީ މި އިންތިޚާބަށް ރީ ރަޖިސްޓްރީ ކުރުމުގެ ފުރުސަތު ވެސް ހުޅުވާލައިފައެވެ. ރީރަޖިސްޓްރީ ކުރުމުގެ ފުރުސަތު އެކޮމިޝަނުން ހުޅުވަލައިފައިވަނީ 20 ޖުލައިގައެވެ. ރީރަޖިސްޓްރީ ކުރުމަށް ދީފައިވާ މުއްދަތު ހަމަވާނީ 23 ޖުލައިގައެވެ. މި މުއްދަތުގައި ރަޖިސްޓްރީވުމަށް އަދި ހުށަހަޅާނީ މާލެ ފިޔަވައި އެހެންތަނަކަށް ވޯޓުލާން ބޭނުންވާ ފަރާތްތަކުންނެވެ. ރީރަޖިސްޓްރީ ވުމަށްއެދޭ ފޯމު ދޫކުރުމާއި ބަލައިގަތުން އޮންނާނީ ބައު ޖަމާލުއްދީން ސްކޫލުގައި ހުންނަ އިންތިޚާބާ ބެހޭ މަރުކަޒުގައެވެ. ރަޖިސްޓްރީ ކުރުން އޮންނާނީ ޖުލައި 23 ވާ އަންގާރަ ދުވަހުގެ ނިޔަލަށް ކޮންމެ ދުވަހަކު ހެނދުނު 9:00 އިން ހަވީރު 5:00 އަށެވެ.
އިންތިޚާބު އޮބްޒާވް ކުރުމާއި މޮނިޓަރ ކުރުމަށް އެދި ހުށަހެޅުމުގެ ފުރުސަތު ވެސް ކޮމިޝަނުން ވަނީ ހުޅުވާލައިފައެވެ. އޮބްޒާވް ކުރަން ބޭނުންވާ ފަރާތްތަކުން އެކަމަށް އެދި ހުށަހަޅަން ދީފައިވާ މުއްދަތަކީ ޖުލައި 21 ވަނަ ދުވަހު ހެނދުނު 9:00 އިން ފެށިގެން ޖުލައި 23 ވަނަ ދުވަހުގެ 2:00 އާ ހަމައަށެވެ.
އިންތިޚާބު މޮނިޓަރ ކުރުމަށް ބޭނުންވާ ނޫސްމަޖައްލާ ތަކާއި ޚަބަރު ފަތުރާ ވަސީލަތްތަކަށް ވެސް ވަނީ އެކަމަށް އެދި ހުށަހެޅުމަށް ޖުލައި 21 ވަނަ ދުވަހު ހެނދުނު 9:00 އިން ފެށިގެން ޖުލައި 23 ވަނަ ދުވަހުގެ 2:00 އާ ހަމައަށް ފުރުސަތު ދީފައެވެ. މިކަންކަމަށް އެދޭ ފޯމު ދޫކުރުމާއި ބަލައިގަތުން އޮންނާނީ ބައު ޖަމާލުއްދީން ސްކޫލުގައި ހުންނަ އިންތިޚާބާބެހޭ މަރުކަޒުގައެވެ.
މިއިންތިޚާބު ބާއްވާނީ ޖުލައި 27 ވާ ހޮނިހިރު ދުވަހުއެވެ.
