ފެނަކޯޕަރޭޝަންގެ މުވައްޒަފުންނާއި މުވައްޒަފުންގެ ޢާއިލާތަކަށް ހުޅުވާލައިގެން ބާއްވާ "ފެނަކަ މުވައްޒަފުންގެ ޢާއިލީ ޤުރުއާން މުބާރާތް 1440" ގެ ނަމުގައި ކުރިއަށް ގެންދާ ޤުރުއާން މުބާރާތުގެ މާލެއާއި އޭދަފުށީގައި ބޭއްވި މުބާރާތުގެ ނަތީޖާ ފާޅުކޮށްފިއެވެ.
މާލޭގައި ކުރިއަށް ދިޔައި ބައިން މުޅި މުބާރާތުން އެއްވަނަ ހޯދީ ހދ. ނޮޅިވަރަން، ސީނިއާގޭ، ޢާއިޝަތު ރާޔާއެވެ. ދެވަނަ ހޯދީ ށ. މިލަންދޫ، ކެނެރީގޭ ޢާއިޝަތު ނަބާހަތު ވަހީދެވެ. ތިންވަނަ ހޯދީ ގއ. ދެއްވަދޫ، ބުލްބުލާގޭ، ޢައިޝަތު އިކާ މުޖުތަބާއެވެ. އޭދަފުށީގައި ބޭއްވި މުބާރާތުން އެއްވަނަ ހޯދީ އެރަށު ހަޒާރުމާގޭ ހަޒާރުމާގެ، ޙުސައިން ފަޒާލް މުހައްމަދު ހަމީދެވެ. ދެވަނަ ހޯދީ ގަނދަކޯޅިމާގޭ އަޙުމަދު ޒައިނޫން ޢަބްދުލް ޙަލީމެވެ. ތިންވަނަ ހޯދީ ހަޒާރުމާގޭ، މަރިޔަމް މަލްސާއު އެވެ.
މުޅި މުބާރާތުން އެއްވަނައަށް ލިބުނީ ފަސް ހާސް ރުފިޔާއެވެ. ދެވަނައަށް 2500 ރުފިޔާއެވެ. ތިންވަނައަށް 1500 ރުފިޔާއެވެ. އޭގެ އިތުރަށް ހަނދާނީ ލިޔުންވެސް ވަނީ ދީފައެވެ.
މިމުބާރާތް ކުރިއަށް ދަނީ ރާއްޖޭގެ 6 ސަރަޙައްދެއްގައެވެ. މާލޭގައި ބޭއްވި މުބާރާތަކީ ހެޑު އޮފީހުން ބައިވެރިވި މީހުންގެ ކިޔެވުމެވެ. މީގެ އިތުރަށް، ހދ. ކުޅުދުއްފުއްޓާއި، ގދ. ތިނަދުއާއި، ފުވައްމުލަކު ސިޓީއާއި، ދ. ކުޑަ ހުވަދޫގައި މުބާރާތުގެ ކިޔެވުން ކުރިއަށް ދާނެވެ. ކޮންމެ ސަރަޙައްދެއްގައި ވެސް ނަތީޖާ ފާޅުކޮށް އިނާމުދޭނީ ވަކިމުބާރާތެއްގެ ގޮތުގައެވެ. މިހާރު ކިޔެވުން ކުރިއަށްދަނީ ފުވައްމުލަކު ސިޓީގައެވެ. އެސިޓީގެ ނަތީޖާފާޅުކުރުން މިރޭ އޮންނާނެ ކަމަށް ފެނަކައިން ވިދާޅުވިއެވެ.
މިއީ ދެ ގޮތްޕަށް ބަހާލައިގެން ކުރިއަށް ގެންދާ މުބާރާތެކެވެ. އެއީ ބަލައިގެން ކިޔެވުމާއި ނުބަލައި ކިޔެވުމުގެ ގޮތްޕެވެ. މި މުބާރާތުގައި ބައިވެރިވެފައިވަނީ ފެނަކަ ކުންފުނީގެ މުވައްޒަފުންނާއި، އެމީހުންގެ ދަރިންނާއި، މުވައްޒަފުންގެ ދަރީންގެ ދަރީންނާއި، މުވައްޒަފުންގެ އެއްބަނޑު އެއްބަފާ، އެއްބަޑު ނުވަތަ އެއްބަފާ މީހުންނާއި، މުވައްޒަފުންގެ އެއްބަނޑު އެއްބަފާ، އެއްބަޑު ނުވަތަ އެއްބަފާ މީހުންގެ ދަރީންނެވެ.
މުބާރާތުގެ ޢުމުރުފުރާތައް ބަހާލެވިފައިވަނީ 6 އަހަރުން ދަށް، 9 އަހަރުން ދަށް، 11 އަހަރުން ދަށް، 13 އަހަރުންދަށް، އަދި ފެނަކަ މުވައްޒަފުންނަށެވެ. ކޮންމެ ޢުމުރުފުރާއަކުން ދެގޮފި ވަކީން އެއްވަނަ ދެވަނަ ތިންވަނާ ހޮވާނެއެވެ. ދެގޮފި ވަކިން ވަނަތައް ހޯދާ މީހުންނަށް އިނާމަކަށް ޓްރޮފީއާއި ސެޓުފިކެޓު ލިބޭނެއެވެ. އަދި ދެ ގޮފި އެއްކޮށް އެއްވަނަ ދެވަނަ ތިންވަނާ ހޮވާނެއެވެ. ވަނަތައް ޙާސިލްކުރާ ފަރާތްތަކަށް ޓްރޮފީއާއި ސެޓުފިކެޓާއި ފައިސާގެ އިނާމް ލިބޭނެއެވެ.
މުޅި މުބާރާތުން އެއްވަނަ ހޯދާ ފަރާތަކަށް ފަސް ހާސް ރުފިޔާ، ދެވަނައަށް ދެހާސް ފަސް ސަތޭކަ ރުފިޔާ، ތިން ވަނައަށް ފަނަރަ ސަތޭކަ ރުފުޔާ ހުށަހަޅާފައި ވެއެވެ.
