ކޮމިއުނިސްޓް ގައުމުތަކުގައި ރައްޔިތުންގެ އެއްޗިއްސެއް ނުހުރެއެވެ. ހުންނާނީ ހައްތަހާވެސް ސަރުކާރުގެ އެއްޗިއްސެވެ. ރައްޔިތުން ކުރަން ޖެހޭ ކަމަކީ މަސައްކަތް ކުރުމެވެ. މަސައްކަތުގެ ބަދަލުގައި ރައްޔިތުން ބޭނުންވާ ހުރިހައި ކަމެއް ސަރުކާރުން ކޮށްދޭނެއެވެ. ކާން ބޯން ދޭނީ ސަރުކާރުންނެވެ. އަންނައުނު ދޭނީ ސަރުކާރުންނެވެ. ހުރިހައި ރައްޔިތުންނަށް ވެސް ލިބޭނީ އެއް މިންވަރަކަށެވެ. މާނައަކީ އެ މީހަކު ބުރަކޮށް މަސައްކަތް ކޮށްގެން އެހެން މީހުންނަށް ވުރެ އަރާމު ދިރިއުޅުމެއް އުޅުމަކީ ކުރެވޭނޭ ކަމެއް ނޫނެވެ. ކޮމިއުނިސްޓް ނަޒަރިއްޔާގައިވާ ގޮތުގައި އެންމެން ހަމަޖެހިގެން އެއްވެސް ތުރާލެއް ނެތި އުޅޭ ދުވަހެއް އަންނާނެއެވެ. ކޮމިއުނިސްޓުން މި ހުވަފެން ދެކޭތާ އެތައް އަހަރެއް ވެއްޖެއެވެ. އެ ދުވަހެއް އަންނަ ގޮތެއް ނުވެއެވެ.
ރުމޭނިއާ އަކީ އިހަށް ކޮމިއުނިސްޓް ގައުމެކެވެ. އެއީ ޔޫރަޕްގެ އެންމެ ފަޤީރު ގައުމެވެ. ސަރުކާރުގެ ގަވައިދު އޮންނަ ގޮތުން ހެނދުނު ތެދުވެގެން ގޮސް ކޮންމެ ގެއަކުން މީހަކު ކިޔޫގައި ޖެހިގެން އެ ދުވަހުގެ ހެނދުނުގެ ނާސްތާ ހޯދަން ޖެހެއެވެ. މިއީ ހަމައެކަނި ނާސްތާއަކަށް އޮންނަ ގަވައިދެއް ނޫނެވެ. ކޮންމެ އެއްޗެއް ބޭނުން ވިޔަސް ޖެހޭނީ ކިޔޫއެއްގައި ހުންނާށެވެ. ބޭނުންވާ މީހުން ގިނަވީމާ ވާނީވެސް އެހެން ނޫންތޯއެވެ؟
އެއް ދުވަހަކު މީހަކު ހެނދުނު ހަތެއް ޖެހި އިރު ތެދުވެގެން ގޮސް ޕާނެއް ހޯދަން ކިޔޫގައި ހުއްޓިއްޖެއެވެ. އޭނާ އެހެން ހުއްޓާ އެގާރަ ޖަހައިފިއެވެ. އޭރު ބަނޑުހައި ވެގެން ގޮސް އަނބުރައިގަންނަ ހިސާބަށް ހިނގައްޖެއެވެ. އޭނާ ރުޅި އައިސްގެން ބުންޏެވެ. "އަހަރެން މި ދަނީ ކާނާއާ ބެހޭ ވަޒީރު މަރާލަން-"
މިހެން ބުނެފައި ހިނގައްޖެއެވެ. ކިޔޫގައި ތިބި މީހުން އޭނާއަކަށް މާ ބޮޑު ސަމާލު ކަމެއް ނުދެއެވެ.
އޭގެ ބައި ގަޑި އިރު ފަހެވެ. އެއްކަލަ މީހާ އެނބުރި އައިސް އަނެއްކާވެސް ކިޔޫގައި ހުއްޓި އިސް ޖަހައިލައިގެން ހުރެއްޖެއެވެ. އޭނާ ދަމުން މި ދަނީ ކާނާއާ ބެހޭ ވަޒީރު މަރައިލާށޭ ބުނި އަޑު އެހި މީހަކަށް މި މަންޒަރު ފެނިގެން ކައިރިއަށް އަތުވެއްޖެއެވެ.
"ބަލަ ތިޔަ އައީ ކާނާއާ ބެހޭ ވަޒީރު މަރާލާފައިތަ-؟" އެ މީހާ އަހައިލިއެވެ.
އޭނާ އަނގަޔަކުން ނުބުންޏެވެ. ހަމަ އިސް ޖަހައިލައިގެން ހުރީއެވެ.
"ކިހިނެއްވީ-؟ ކަލޭ ދިޔައީ ވަރަށް ފުއްޕާފައި- އެނބުރި އައީ ހިކި މިރުހަކަށް ވެގެން- އަނެއްކާ ކިހިނެއްވީ-؟ ކާނާއާ ބެހޭ ވަޒީރު މަރާލީތަ-؟" އެ މީހާ ހީނލިއެވެ.
އޭނާ ވަރަށް ދެރަ ވެފައި ޖަވާބު ދިނެވެ. "ވަޒީރުގެ ގޭ ދޮށުގައިވެސް ކިޔޫއެއް އެބައޮތް-"
