މިއަދު ހެނދުނު ކަޝްމީރުގެ ޕާކިސްތާނު ސަރަހައްދަށް ވަން އިންޑިޔާގެ އަސްކަރީ ދެ މަތިންދާބޯޓު ވައްޓާލައި އެތަނުން އެއް ބޯޓުގެ ޕައިލެޓް ހައްޔަރުކޮށްފައިވާ ކަމަށް ޕާކިސްތާނު އަސްކަރިއްޔާއިން ބުނެފިއެވެ. އެއް ބޯޓު ވެއްޓިފައިވަނީ ޕާކިސްތާނު ފަޅިއަށް ކަމަށާ، އަނެއް ބޯޓު ވެއްޓުނީ އިންޑިޔާ ފަޅިއަށް ކަމަށްވެސް ޕާކިސްތާނުން ބުނެއެވެ. ޕާކިސްތާނުގެ އަސްކަރިއްޔާގެ ތަރުޖަމާނު މޭޖާ ޖެނެރަލް އާސިފު ޣަފޫރު ބުނި ގޮތުގައި ދެ ބޯޓު ވައްޓާލުމުގެ އިތުރަށް ޕާކިސްތާނު އަސްކަރިއްޔާއިން ކަޝްމީރުގެ އިންޑިޔާ ފަޅީގެ ހަ ތަނަކަށް ހަމަލާދީފައި ވެއެވެ.
ޕާކިސްތާނު ފަޅިއަށް ވެއްޓުނު ބޯޓު އަނދާ މަންޒަރު ފެންނަ ވީޑިއޯއެއް ޕާކިސްތާނު އަސްކަރިއްޔާއިން ދައްކާފައި ވެއެވެ. އަދި ޕައިލެޓާއި އޭނާގެ އަތުން ފެނުނު ބައެއް ތަކެތީގެ ފޮޓޯވެސް އާއްމުކޮށްފައި ވެއެވެ.
ޕާކިސްތާނުން ދެ ބޯޓު ވައްޓާލާފައިވާ ކަމަށް ބުނާ ބުނުން އިންޑިޔާއިން ދޮގު ކުރެއެވެ. އިންޑިޔާއިން ބުނެފައި ވަނީ އެ ގައުމުގެ ވައިގެ އަސްކަރިއްޔާގެ މިގް-21 މަރުކާގެ ބޯޓެއް ގެއްލި އެ ބޯޓުގެ ޕައިލެޓަށް ވީގޮތެއް އެނގިފައި ނުވާ ކަމަށެވެ.
އަނެއްކޮޅުން އިންޑިޔާއިން ބުނެފައި ވަނީ ކަޝްމީރުގެ އިންޑިޔާ ފަޅިއަށް ހަމަލާދޭން ވަން ޕާކިސްތާނު ވައިގެ ސިފައިންގެ އެފް-16 މަރުކާގެ މަތިންދާބޯޓެއް ވައްޓާލާފައިވާ ކަމަށެވެ. އެ ބޯޓުގެ ޕައިލެޓަށް ވީގޮތުގެ ތަފްސީލެއް އިންޑިޔާއިން ދީފައި ނުވެއެވެ.
މިއީ، މި ފެބްރުއަރީ މަހުގެ މެދުތެރޭގައި ކަޝްމީރުގެ އިންޑިޔާ ފަޅީގައި ފުލުހުންގެ ބަޔަކަށް ދިން ހަމަލާއެއްގައި 44 މީހުން މަރާލުމާ ގުޅިގެން، ކަޝްމީރުގެ ދެފަޅި ކޮންޓުރޯލުކުރާ އިންޑިޔާއާ ޕާކިސްތާނާ ދެމެދު ހޫނުވާން ފެށި އަރައިރުން މަޑުމަޑުން އަސްކަރީ ކުރިމަތިލުމަކަށް ބަދަލުވެދާނެ ފަދަ އަސްކަރީ ހަރަކާތްތަކެވެ.
އިއްޔެ އިންޑިޔާގެ އަސްކަރީ މަތިންދާބޯޓަކުން ވަނީ ކަޝްމީރުގެ ޕާކިސްތާނު ފަޅީގައި އޮންނަ ބާލާކޯޓު ސަރަހައްދަށް ހަމަލާއެއް ދީފައެވެ. އިންޑިޔާއިން ބުނީ އެގައުމުގެ މަތިންދާބޯޓުން ހަމަލާދިނީ ޖައިޝެ މުޙައްމަދުގެ ހަނގުރާމަވެރިންގެ ކޭންޕަކަށް ކަމަށެވެ. ނަމަވެސް ޕާކިސްތާނުން ބުނީ އިންޑިޔާގެ މަތިންދާބޯޓު ޕާކިސްތާނު ފަޅިއަށް ވަނުމުން، ޕާކިސްތާނު މަތިންދާބޯޓުތައް އެ ބޯޓު ފައްސާލީކަމަށެވެ. އަދި އެ ބޯޓު ދަމުން އޭގައި ހުރި ބޮން އެއްވެސް އަމާޒެއް ނެތި ވައްޓާލީކަމަށެވެ.
ދެގައުމުގެ ދެމެދުގައި ވައިގެ ތެރޭގައި ހިނގި އަސްކަރީ ކުރިމަތިލުންތަކަށް ފަހު، ޕާކިސްތާނުން ވަނީ އެގައުމުގެ ވައިގެ ސަރަހައްދު މަދަނީ އުދުހުންތަކަށް މުޅިން ބަންދުކޮފައެވެ. އަދި އިންޑިޔާއިން އެގައުމުގެ 9 ވައިގެ ބަނދަރެއް މިއަދު ހެނދުނު ބަންދުކުރިއެވެ. ނަމަވެސް މިހާރު އެހުރިހާ ވައިގެ ބަނދަރެއް ވަނީ ހުޅުވާފައެވެ.
އަދި މި ކުރިމަތިލުންތަކަށް ފަހު ޕާކިސްތާނުގެ ބޮޑުވަޒީރު އިމްރާން ޚާން ގައުމާއި މުޚާޠަބުކުރައްވަމުން ވިދާޅުވެފައި ވަނީ، ޕާކިސްތާން އަދިވެސް އޮތީ އިންޑިޔާއާއެކު ވާހަކަދައްކައިގެން މައްސަލަ ހައްލުކުރަން ތައްޔާރަށް ކަމަށެވެ. އަދި ދެގައުމުގެ އަސްކަރީ ގާބިލުކަމަށް ބަލާއިރު، "ނުބައިކޮށް ހިސާބުޖެހުމުގެ" ފުރުސަތެއް ދެގައުމަށްވެސް ނެތް ކަމަށެވެ.
