ގއ. ވިލިގިލީގައި ގާއިމް ކޮށްފައިވާ ބީއެމްއެލްގެ ބާރާންޗު ފަޅާލައި ގިނަ ޢަދަދެއްގެ ފައިސާތަކެއް ވަގަށް ނެގި މައްސަލައިގައި މިހާތަނަށް 13 މީހުން ބަންދު ކޮށްފި ކަމަށް ފުލުހުން ވިދާޅުވެއްޖެއެވެ.
އެންމެ ފަހުން ބަޔަކު ބަންދުކޮށްފައިވަނީ ރޭގެ ވަގުތެއްގައެވެ. ރޭ ބަންދުކޮށްފައިވަނީ 2 މީހުންނެވެ. މި ދެމީހުން ވެސް ބަންދުކޮށްފައިވަނީ ކޯޓު އަމުރެއްގެ ދަށުންނެވެ. މި މީހުންގެ ބަންދާ ބެހޭ ގޮތުން ގޮތެއް ނިންމަން ކޯޓަށް ހާޒިރު ކުރުމުން ކޯޓުންވަނީ ކޮންމެ މީހެއްގެ ބަންދަށް 7 ދުވަސް ޖަހައިދީފިއެވެ.
މި މައްސަލާގައި އިއްޔެ ބަންދު ކުރި 4 މީހުންގެ ތެރެއިން ކޮންމެ މީހެއްގެ ބަންދަށް ކޯޓުންވަނީ 10 ދުވަސް ޖަހައިދީފައެވެ. އޭގެ ކުރިން ބަންދު ކުރި 7 މީހުންގެ ތެރެއިން 5 މީހަކަށްވަނީ 15 ދުވަސް ޖަހައިދީފައެވެ. 2 މީހަކަށް ވަނީ 7 ދުވަސް ޖަހައިދީފައެވެ.
ބީއެމްއެލްގެ ވިލިގިލި ބްރާންޗުގެ ފުރާޅު ހަލާކުކޮށްގެން އެތެރެއަށް ވަދެ ގިނަ ޢަދަދެއްގެ ފައިސާ ވަނީ ނަގައިގައިފައެވެ. އޭގެ ތެރެއިން ފުލުހުންވަނީ ގިނަ ޢަދަދެއްގެ ފައިސާ ހޯދައިފައެވެ. ވަގަށް ނަގައިފައިވާ ފައިސާގެ ތެރެއިން ފުލުހުންނަށް ނުފެނި ވަނީ ގާތްގަނޑަކަށް ތިން މިލިއަން ރުފިޔާއެވެ. އެފައިސާ ހޯދުމުގެ މަސައްކަތް ފުލުހުން ގެންދަނީ ކުރަމުންނެވެ.
ފުލުހުންނަށް ފެނުނު ފައިސާ ހޯދައިފައިވަނީ ސުނާމީގެއެއްގެ ކޮޓަރިންނެވެ.
