އައު ބޮޑުވަޒީރު ޢިމްރާން ޚާނަށް
ބޮޑު އަޣުލަބިއްޔަތަކުން މަނިކުފާނަށް ވެރިކަން މިންވަރު ކުރެއްވިޔަސް، މަނިކުފާނަކީ ވެރިކަމުގެ ތަޖުރިބާއެއް ނެތް ބޭފުޅެކެވެ. ކަން އެހެން އޮތުމުން ޚުދުމުޚްތާރު އުސޫލުތައް ކުރިއަށް ނުނެރުއްވައި، އަރިހުގައި ތިއްބެވި ކޮރަޕްޓު ބޭފުޅުންގެ ބަސް ގަބޫލުނުކުރައްވައި، މަޝްވަރާގެ ރިވެތި އުސޫލުތަކުގައި ހިއްޕަވާށެވެ.
ބުއްޓޫ އާއިލާއިން ހެއްދެވިހެން، ނަވާޒުޝަރީފާއި ޝަހެބާޒް ޝަރީފް ހެއްދެވިހެން ވެރިކަމަކީ އާއިލީ ވެރިކަމަކަށް ނަހައްދަވާށެވެ. އަދި ވެރިކަމަކީ އާއިލީ ވިޔަފާރިއަކަށް ވެސް ނަހައްދަވާށެވެ.
ކޮރަޕްޝަން އުފައްދަނީ ރައްޔިތުންނެވެ. ކޮރަޕްޝަން އުފައްދާ މީހުންގެ އަތްދަށުނުވާށެވެ. ވިޔަފާރިވެރިން އުނގަށް ލައްވަން ނޫޅުއްވާށެވެ.
ޖަރީމާ ނުހިންގަވާށެވެ. މަނިކުފާނު ޖަރީމާ ހިންގަވާނަމަ މަނިކުފާނާ ދެކޮޅަށް ވެސް ނިކަން އަވަހަށް ޖަރީމާ ހިންގަންފަށާނެއެވެ.
އަސްލެއް، އިންސާފެއް ނެތް ޝަރީޢަތްތައް ހިންގަވަން ނޫޅުއްވާށެވެ. އެފަދަ ކަންތައް ކުރައްވާނަމަ، މަނިކުފާނާ ދެކޮޅަށް ވެސް މާލަހެއްނުވެ ޝަރީޢަތްތައް ހިންގަން ފަށާފާނެއެވެ.
ރޭގަނޑުގެ ކަނު އަނދިރީގައި ބައްދަލުވުންތައް ނުބާއްވަވާށެވެ. އެހެން ހައްދަވަން ފައްޓަވައިފިނަމަ، މަނިކުފާނާ ދެކޮޅަށް ވެސް ރޭގަނޑުގެ ކަނު އަނދިރީގައި ރޭވުންތައް ހިންގަން ފަށާފާނެއެވެ.
ހަމައެކަނި އިދިކޮޅުފަރާތްތަކާ ދެކޮޅަށް، މީޑިއާގެ ގުނަވަންތައް ބޭނުންނުކުރައްވާށެވެ. އެކަން ކުރައްވަން ފައްޓަވައިފިނަމަ، އިދިކޮޅުފަރާތްތަކުން ވެސް މަނިކުފާނާ ދެކޮޅަށް ނިކަން ކެރިގެން މީޑިއާގެ ބޭނުން ކުރަންފަށާނެއެވެ.
ދީނީކަންތަކަށް ފާޑުވިދާޅުވެ، ދީނީ ޢިލްމުވެރިންނާ ޖަދަލު ނުކުރައްވާށެވެ. މަނިކުފާނަކީ ދީނީ ޢިލްމުވެރިއެއްނޫނެވެ. "ދީނީ ޢިލްމުވެރިން" ބަހުގެ ހަމަލާތަކުން މަނިކުފާނުގެ ހަންވެސް ނޮޅާލަފާނެއެވެ.
ބުރުގާ ނައަޅައި އުޅޭ ބައިގަނޑުގައި ހިމެނޭ ޖިންސުއްލަތީފުންނަށް ބަހުގެ ހަމަލާނުދެއްވާށެވެ. އެފަދަކަމެއް ކުރައްވައިފިނަމަ، އެ ބޭކަނބަލުން މަނިކުފާނުގެ ގޭގައި ތިއްބެވި ބޭކަނބަލުންގެ ބުރުގާތައް ވީދައި ކުދިކުދިކޮށްފާނެއެވެ.
ގައުމުގެ ދަރަނި އިތުރަށް ބޮޑު ކުރައްވައި، ޚަޒާނާގެ ފޫ އިތުރަށް ވެއްޓުނަ ނުދެއްވާށެވެ. ރައްޔިތުން ވެސް މިހާރު ވަރަށް ރަނގަޅަށް ހިސާބުކިތާބު ބަލަމުންގެންދެއެވެ.
މަނިކުފާނު ކުރެއްވި ވައުދުތައް ހަނދުމަފުޅު ބަހައްޓަވާށެވެ. ރައްޔިތުން ތިބީ، ނިކަން ރަނގަޅަށް ހޭލައެވެ.
ކުރީގެ ބޮޑުވަޒީރަށްވުރެ މަނިކުފާނުގެ "ހިނިތުންވުން" މާ ރީއްޗެވެ. އެކަމަކު ހަނދުމަފުޅު ކުރައްވާށެވެ! ރައްޔިތުން ގައުމުގެ ވެރިކަމަށް މަނިކުފާނު ގެންނެވީ، ރީތި ހިނިތުންވުންތަކެއް ދެކޭކަށް ނޫނެވެ. ރަނގަޅު އަދި އިންސާފުވެރި ވެރިކަމެއް މަނިކުފާނު ކުރައްވާނޭކަމުގެ ޔަގީންކަމުގައެވެ.
