އިދިކޮޅު ރިޔާސީ ކެންޑިޑޭޓް އިބްރާހީމް މުހައްމަދު ސާލިހު (އިބޫ) ރިޔާސީ ކޭމްޕޭން ދަތުރުފުޅެއްގައި އެމަނިކުފާނުގެ އަމިއްލަ ރަށް ޅ. ހިންނަވަރަށް ވަޑައިގެންފިއެވެ.
އެމަނިކުފާނު ހިންނަވަރަށް ވަޑައިގެންނެވުމުން އެރަށުގެ ވަރަށްގިނަ މީހުންވަނީ ބަނދަރު މައްޗަށް ނުކުމެ ވަރަށްހޫނު މަރުހަބާއެއް ދަންނަވައިފައިވެއެވެ.
އިބޫއަށް މަރުހަބާ ދެންނެވުމަށްޓަކައި އެރަށުގެ ވަރަށްގިނަ މީހުންނަވަނީ ރަށް ޒީނަތް ކުރެއްވުމުގެ މަސައްކަތުގައި ހަރަކާތްތެރިވެފައެވެ. އިބޫ އެރަށަށް ވަޑައިގަތުން އެރަށުގައި ފާހަގަކޮށްފައިވަނީ އީދެއް އައިސްގެން އުޅޭ ގޮތަށެވެ.
މިދަތުރުފުޅުގައި މިހާތަނަށް ހިންނަވަރުގައި ބާއްވާފައި ނުވާވަރުގެ ބޮޑުޖަލްސާއެއް ވެސް ބޭއްވުމަށް ހަމަޖެހިފައިވެއެވެ. މި ޖަލްސާ ބޭއްވުމަށް ހަމަޖެހިފައިވަނީ އެރަށު ހިއްކި ބިމުގައެވެ. ޖަލްސާ ބާއްވާ ސަރަހައްދުވެސް މިހާރުވަނީ ތައްޔާރުކޮށް ނިމިފައެވެ.
