ސިއްރު ފެންފުށީގައި ނުވަތަ ށ. ގާކޮށީގައި ހަދައިފައިވާ ކޮރަލޭރިއަމްގައި ބަހައްޓިފައިވާ ބުދުތައް ނެގުމަށް ކުރަންޖެހޭ ގާނޫނީ ހުރިހައި މަސައްކަތްތަކެއް ކުރައްވަމުން ގެންދަވާ ކަމަށް ފުލުހުން މިއަދު ވިދާޅުވެއްޖެއެވެ.
ނޫސްވެރިންނަށް މައުލޫމާތު ދެއްވަމުން ޗީފް ސްޕްރިންޓެންޑެންޓް އޮފް ޕޮލިސް އަހުމަދު ޝިފާން ވިދާޅުވީ އެ މައްސަލަ ޓޫރިޒަމް މިނިސްޓްރީން މިހާރުވަނީ ފުލުހުންނަށް ހުށަހަޅައިފައި ކަމަށެވެ. "މިއީ އިންސާނުންނާއި ކަނޑުގެ ދިރުން ދައްކުވައި ދިނުމުގެ ގޮތުން އިސްލާމްދީނުގެ އެއްވެސް އަސާސާސަކަށް ބުރޫ ނާރާ ގޮތަށް އެކަންކަން ކުރުމަށް ޓޫރިޒަމް މިނިސްޓްރީން އެފަރާތަށް (ރިސޯޓު ހެދި ފަރާތަށް) ހުއްދަ ދެވިގެން ކޮށްފައިވާ ކަމެއް. އެހެންނަމަވެސް މިނިސްޓްރީ އޮފް ޓޫރިޒަމާއި އެރިސޯޓާ ނުވަތަ އެކަން ކުރެއްވި ފަރާތާ ދެއްކެވި ވާހަކަތަކުން އެކަން ހައްލު ނުވުމުގެ ސަބަބުން މިނިސްޓްރީ އޮފް ޓޫރިޒަމުން އެ ސްކަލްޕްޗާތައް ނެގުމަށް ފުލުހުންނަށް ހުށަހަޅާފައިވޭ،" ޝިފާން ވިދާޅުވިއެވެ.
"އެތަނުގައި އިންސާނުންގެ ސިފަ ދޭހަވާ ގޮތަށް ބެހެއްޓިފައިވާ ބުދުތައް ނެގުމަށްޓަކައި ކުރަންޖެހޭ ގާނޫނީ އެންމެހާ މަސައްކަތްތަކެއް ފުލުހުން މިވަގުތު ކުރަމުންދާ ވާހަކަ ދަންނަވާލަން،" އޭނާ ވިދާޅުވިއެވެ.
އެ ބުދުތައް ނެގުމަށްފަހު ޓޫރިޒަމް މިނިސްޓްރީއާއި އެ ރިސޯޓާ ދެމެދު އެއްބަސްވެފައިވާ އެއްބަސްވުމާ އެއްގޮތަށް އެންމެހާ ކަންކަން ކުރުމަށް ފުލުހުން މަސައްކަތް ކުރައްވަމުން ގެންދަވާ ކަމަށް ވެސް ޝިފާން ވިދާޅުވިއެވެ.
