ސްކޮޓްލެންޑުގެ ނޯތް އެޔޭޝަޔަރ ކައުންސިލުން ލައިބްރަރީ ތަކާއި ކޮމިއުނިޓީ ސެންޓަރުތައް އަދި ސަރުކާރުގެ އޮފީސް އިމާރާތްތަކަށް ހިލޭ ޕެޑް ފޯރުކޮށްދޭން ނިންމައިފިއެވެ. އެ އިމާރާތްތަކުން ސެނިޓަރީ ޕެޑުގެ އުފެއްދުންތައް ލިބޭނީ އިމާރާތްތަކުގެ ފާޚާނާތަކުގައި ބަހައްޓާފައި ހުރި ވެންޑިން މެޝިންތަކުންނެވެ.
ލައިބްރަރީ ތަކާއި އޮފިސްތަކަށް ޕެޑުގެ ޚިދްމަތް ފުޅާކުރި ނޯތް އެޔޭޝަޔަރ އަކީ ސެނިޓަރީ ޕެޑުގެ އުފެއްދުންތައް ސެކަންޑްރީ ސްކޫލްތަކުން ހިލޭ ލިބޭނޭ އިންތިޒާމް ހަމަޖެއްސި އިނގިރޭސިވިލާތުގެ ފުރަތަމަ ކައުންސިލް އެވެ. ސެނިޓަރީ ޕެޑުގެ އުފެއްދުންތައް އޮފީސް އިމާރާތްތަކާއި، ލައިބްރަރީ ތަކުން ލިބޭނެ އިންތިޒާމަކީ "މަސްވަރު ފަގީރުކަމަށް (ޕީރިއަޑް ޕަވަރޓީ) ހައްލެއް ހޯދައިދިނުމުގެ ބޭނުމުގައި ފެށި މަޝްރޫއެކެވެ.
'މަސްވަރު ފަގީރުކަމަށް ނިމުމެއް ގެނައުމުގެ ގޮތުން ސެނިޓަރީ އުފެއްދުންތައް ފޯރުކޮށްދިނުމުގެ މަޝްރޫއު ފަށާފައިވަނީ މިދިޔަ އަހަރުގެ އޯގަސްޓު މަހުއެވެ. މަޝްރޫއު ލޯންޗުކޮށް ސެނިޓަރީ އުފެއްދުންތައް ފޯރުކޮށްދޭން ފުރަތަމަ ފެށީ ސެކަންޑްރީ ސްކޫލްތަކުގައެވެ. ސްކޫލްތަކުން ޕެޑު ފޯރުކޮށްދޭން ފެށި ފަހުން މިހައިތަނަށް 13،000 ވުރެ ގިނަ ކުދީން ސްކޫލްގައި ޕެޑާއި ޓެމްޕޯން ބޭނުންކޮށްފައިވެއެވެ.
އެޔޭޝަޔަރ ކައުންސިލްގެ ލީޑަރު ޖޯއި ކަލިން ސީއެންއެން އަށް ދެއްވި ބަސްދީގަތުމެއްގައި ވިދާޅުވިގޮތުގައި ސެނިޓަރީ އުފެއްދުންތަކަކީ އަންހެނުންނަށް ބޭނުންވާ އަސާސީ އުފެއްދުމެކެވެ. ސެނިޓަރީ އުފެއްދުންތައް ގަނެވޭނޭ ތަނަވަސްކަން ނެތުމުގެ ސަބަބުން ނޯތު އެޔޭޝަޔަރ އަށް ނިސްބަތްވާ އެއްވެސް އަންހެނަކު ލަދުގަންނަން ޖެހޭ ފަދަ ހާލަތަކަށް ދާނެ ނުޖެހުމަކީ ކަލިންގެ އުއްމީދެކެވެ. މަސްވަރުކަމަކީ ވެސް ފަގީރުކަމަށް މީހާ ހުށަހެޅޭ ކަމެެއް ކަމަށް ކަލީ ދެކެވަޑައިގަންނަވައެވެ. މި އިސްނެގުމަކީ މިންތީގެ ނަހަމަކަމަށް ހައްލު ހޯދައިދިނުމުގެ ގޮތުން ފެށީ މަޝްރޫއެކެވެ.
ސްކޮޓްލެންޑުގެ ރޭޑިއޯ ޕްރޮގްރާމަކަށް މައުލޫމާތު ދިން ބައެއް އަންހެނުން ބުނެފައިވަނީ ޕެޑު ގަންނާނެ ތަނަވަސްކަމެއް އެމީހުންނަށް ލިބިގެނެެް ނުވެއެވެ. އަދި އެމީހުންނަށް ޕެޑު ފޯރުކޮށްދެނީ އާއިލާ މީހުން ގާތް ރައްޓެހިންނެވެ.
ފަގީރުކަން ނައްތާލުމަށް މަސައްކަތް ކުރާ ފަރާތަކުން ބުނި ގޮތުގައި ވިހެއުމަށް ފަހު ޕެޑުގެ ދަތިކަން ތަޖްރިބާ ކުރަން ޖެހޭ އަންހެނުންގެ އަދަދު ނިސްބަތުން ގިނައެވެ. އެހެންކަމުން އެފަދަ ފަރާތްތަކަށް ސެނިޓަރީ އުފެއްދުންތައް ފޯރުކޮށްދިނުމަކީ ކޮންމެހެން ކުރަންޖެހޭ ކަމެކެވެ. އެފަރާތުން ދެކޭ ގޮތުގައި ނޯތް އެޝަޔަރ ކައުންސިލުން ހިލޭ ޕެޑް ފޯރުކޮށްދޭން ފެށުމަކީ 'މަސްވަރު 'ފަގީރުކަން' ނައްތާލުމަށް އެޅުނު މުހިއްމު ފިޔަވަޅެކެވެ. ސްކޮޓްލެންޑުގެ 32 ލޯކަލް އޮތޯރިޓީ އިން ނޯތް އެޔޭޝަޔަރ ކައުންސިލު ނަމޫނާއަކަށް ބަލައި އެސަރަހައްދުތަކުގައި މި މަޝްރޫއު ފެށުމަކީ އެފަރާތުގެ އުއްމީދެވެ.
ސްކޮޓްލެންޑުގައި ދާދިފަހުން ކުރެވުނު ދިރާސާއަކުން ދައްކާގޮތުގައި ކޮލުެޖް/ޔުނިވަރސިޓީ ތަކުގައި ކިޔަވާ ގިނަ ދަރިވަރުންނަކީ ސެނިޓަރީ އުފެއްދުންތަކުގެ ދަތިކަން އިހުސާސް ކުރާ ކުދީންނެވެ. 2000 އަށްވުރެ ގިނަ ދަރިވަރުން ބައިވެރިވި މި ދިރާސާގައި ކޮންމެ ހަތަރު ދަރިވަރުންގެ ތެރެއިން އެއް ދަރިވަރަކީ ސެނިޓަރީ އުފެއްދުންތަކުގެ ބަދަލުގައި އިސްޓާކީނާއި ނޫސް ކަރުދާސް ފަދަ ތަކެތި ބޭނުކުރާ ދަރިވަރުންނެވެ. އެހެންކަމުން މިއަހަރުގެ ދިރާސީ އަހަރު ފެށުމާއެކު ސްކޮޓްލެންޑުގެ ސަރުކާރުންވަނީ ސްކޫލާއި ޔނިވަރސިޓީތަކުން ހިލޭ ޕެޑު ލިބޭނޭ އިންތިޒާމު ހަމަޖައްސައި އެކަމަށް ފަންޑުކޮށްފައެވެ. ޕެޑުގެ މަޝްރޫއު ފުރަތަމަ ޕައިލެޓް ކޮށްފައިވަނީ ސްކޮޓްލެންޑުގެ އެބަރޑީންގައި ގައެވެ. އެއާއެކު އެކަށީގެންވާ އާމްދަނީ އެއް ނުލިބޭ މީހުން ދިރިއުޅޭ ސަރަހައްދުތަކުން ވެސް ހިލޭ ޕެޑު ލިބޭނޭ އިންތިޒާމް ހަމަޖެއްސިއެވެ.
ލޭަބަރ އެމްއެސްޕީގެ މެންބަރު މޮނިކާ ލެނަން މިހާރު ގެންދަވަނީ ސެނިޓަރީ އުފެއްދުންތައް ފޯރު ކޮށްދިނުން ދައުލަތުގެ މައްޗަށް ލާޒިމުވާ ގޮތަށް ބިލެއް ފަރުމާ ކުރައްވަމުންނެވެ. މި ބިލް ގާނޫނަކަށް ހެދުމަށް މިހާރުވެސް 96 އިންސައްތަ މެންބަރުންގެ ތާއީދުވަނީ ލިބިފައެވެ. މި ބިލް ގާނޫނަކަށް ވެއްޖެނަމަ ހިލޭ ޕެޑު ފޯރުކޮށްދިނުން ދައުލަތުގެ މައްޗަށް ގާނޫނުން ލާޒިމްވާނެއެވެ.
