ސްރީލަންކާގެ މަސްބޯޓެއް ހާލުގައި ޖެހިފައިވަނިކޮށް ގއ.ވިލިނގިލީގެ އިރު އުތުރުން 43 ނޯޓިކަލް މޭލު ބޭރުން ފެނިއްޖެ ކަމަށް އެމްއެންޑީއެފުން ވިދާޅުވެއްޖެއެވެ.
ހާލުގައި ޖެހިފައިވާ ސްރީލަންކާގެ "ސިންދޫރު- 2" ނަމަކަށް ކިޔާ މަސްބޯޓު ފެމިގެން ސިފައިންވަނީ އެބޯޓަށް އެހީތެރިކަން ފޯރުކޮށްދީފައެވެ.
މި ހާދިސާގެ މަޢުލޫމާތު މިއަދު ހެނދުނު 11:30 ހާއިރު އެމްއެންޑީއެފް ކޯސްޓްގާޑްގެ މެރިޓައިމް ރެސްކިއު ކޯޑިނޭޝަން ސެންޓަރަށް ރިޕޯޓްކޮށްފައިވަނީ އެސަރަޙައްދުގައި މަސްވެރިކަން ކުރަން އުޅުނު "ދިރުން" ނަމަކަށް ކިޔާ މަސް ދޯންޏަކުންނެވެ. އަދި "ދިރުން" ދޯނިން ވަނީ ހާލުގައި ޖެހިފައިވާ މަސްބޯޓުގައި ތިބި މީހުނަށް ފެނާއި ކާބޯތަކެތި ފޯރުކޮށްދީފައި ކަމަށްވެސް އެމްއެންޑީއެފުން ވިދާޅުވިއެވެ.
މިއަދުގެ 17:25 ހާއިރު އެމްއެންޑީއެފް ކޯސްޓްގާޑްގެ ލޯންޗު، އެފްއައިސީ "ހަކުރާ" ވަނީ ހާލުގައި ޖެހިފައިވާ މަސް ބޯޓު އޮތް ސަރަޙައްދަށް ގޮސް އެހީތެރިކަން ފޯރުކޮށްދީފައެވެ.
އެބޯޓު ހާލުގައި ޖެހުނީ އިންޖީނުގެ ބެޓެރީ ފެއިލްވެގެން ކަމަށް އެބޯޓުންވަނީ އެމްއެންޑީއެފަށް މައުލޫމާތު ދީފައެވެ. އެމްއެންޑީއެފް ކޯސްޓުގާޑުން މިހާރު މަސައްކަތް ކުރައްވަމުން ގެންދަވަނީ އެ ބޯޓު ގދ.ތިނަދޫއަށް ގެންދިއުމަށެވެ.
މި ބޯޓުގައި 7 މީހުން ތިބިއިރު މި އެންމެންގެ ހާލުވެސް ރަނގަޅު ކަމަށް އެމްއެންޑީއެފުން ވިދާޅުވިއެވެ.
