ފަހަކަށް އައިސް މާލޭސިޓީގައި ނުރައްކާތެރި އެކްސިޑެންޓް ހިނގައި މީހުންގެ ފުރާނައަށް ގެއްލުންވަމުންދާތީ އެފަދަ އެކްސިޑެންޓްތައް ހުއްޓުވުމަށް ރަނގަޅު އިންތިޒާމެއްގެ ދަށުން ރަނގަޅު ނިޒާމެއް ގާއިމްކޮށް ދެއްވުމަށް ޓްރާންސްޕޯޓު އޮތޯރިޓީއަށާއި، މޯލްޑިވްސް ޕޮލިސް ސާވިސްއަށް މާލޭ ސިޓީ ކައުންސިލުން ގޮވާލައިފިއެވެ.
މާލޭ ސިޓީ ކައުންސިލުން ނެރެފައިވާ ބަޔާނެއްގައި ބުނެފައިވަނީ މިފަދަ އެކްސިޑެންޓުތައްވެ ކަމާ ނުބެހޭ މައުސޫމް ފަރާތްތަކަށް ވެސް ބޮޑެތި ގެއްލުންތަކެއް ލިބި އާއިލާއަށް ފޫނުބެއްދޭ ވަރުގެ ހިތާމަތައް މެދުވެރި ވަމުންދާ ކަމަށެވެ. މިއީ ދައުލަތުން އަޅައިނުލައި ދޫކޮށްލަންޖެހޭ ވަރުގެ ކަމެއްނޫން ކަމަށްވެސް އެބަޔާނުގައި ވިދާޅުވެފައިވެއެވެ.
ބާރު ސްޕީޑުގައި އެއްގަމު އުޅަނދު ދުއްވާ މީހުންނަކީ ކޮބައިކަން ދައުލަތުގެ ކަމާބެހޭ އެއްވެސް ފަރާތަކުން ހާމަކުރައްވާފައި ނުވާކަމަށް ވެސް މާލޭ ސިޓީ ކައުންސިލުން ވިދާޅުވެފައިވެއެވެ. ބާރަށް ދުއްވާ ފަރާތްތަކާމެދު އެކަށީގެންވާ ފިޔަވަޅުއެޅޭތޯ ރައްޔިތުން ކަށަވަރު ކުރުމަށް ބޭނުންވާ ކަމަށްވެސް ވިދާޅުވެފައިވެއެވެ.
ހިނގާ މީހުންނާއި ދުއްވާ މީހުން ހޭލުންތެރި ކުރުމަށާއި މަގުތަކުގެ ރައްކާތެރިކަން ކަށަވަރު ކޮށްދިނުމަކީ ކޮންމެހެން ކުރަންޖެހޭ ކަމެއް ކަމަށާއި، "ދުނިޔޭގެ ހުރިހާ ގައުމެއްގައި އަމަލުކުރަމުންދާ ފަދައިން ލައިސަންސް ދޫކުރުމުގައި ސަމާލުވެ، ޒިންމާދާރު ކަމާއެކު ލައިސަންސް ދޫކުރުމުގައި ސަމާލުވެ، ޒިންމާދާރު ކަމަމާއެކު އެކަން ކުރުމަށާއި، މަގުތައް ބޭނުންކުރާ ފަރާތްތަކުގެ ރައްކާތެރި ކަމަށްޓަކައި އަޅަންޖެހޭ ފިޔަވަޅު އެޅުމަކީ ދައުލަތުން ކޮންމެހެން ކުރަންޖެހޭ ކަމެއް ކަމަށްވެސް ދެކެމެވެ." އެބަޔާނުގައި ވެއެވެ.
ފާއިތުވި ހަފްތާގައިވެސް މާލޭގައި ނުރައްކާތެރި ގިނަ އެކްސިޑެންޓް ހިނގާފައިވާ ކަމަށާއި، ބައެއް އެކްސިޑެންޓުތަކުގައި މީހުންގެ ފުރާނަ ދިޔުމާއި، ބައެއް މީހުން މިހާރުވެސް ހޮސްޕީޓަލްތަކުގެ އައިސީޔޫގައި ފަރުވާދެމުންދާކަމަށް ވެސް މާލެސިޓީ ކައުންސިލުން ވިދާޅުވެފައިވެއެވެ.
