އަންނަ ސެޕްޓެމްބަރު 23 ގައި ރާއްޖޭގައި ބޭއްވުމަށް ހަމަޖެހިފައިވާ ރިޔާސީ އިންތިޚާބުގެ ވޯޓަރސް ލިސްޓު އަންނަ އާދީއްތަދުވަހު އިއުލާން ކުރައްވާނެ ކަމަށް އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވެއްޖެއެވެ.
ވޯޓަރސް ލިސްޓް އިއުލާން ކުރައްވާ ދުވަސް( 10 ޖޫން) އިން ފެށިގެން 20 ޖޫންގެ ނިޔަލަށް އެ ލިސްޓަށް ޝަކުވާ ހުށަހެޅުމުގެ ފުރުސަތު އޮންނާނެ ކަމަށްވެސް ޝަރީފް ވިދާޅުވިއެވެ.
ޝަކުވާ ހުށަހެޅުމަށްޓަކައި ރަށްރަށުގެ ކައުންސިލްތައް މެދުވެރިކޮށްނާއި، އިލެކްޝަނުން ރަށްރަށުގައި ގާއިމްކޮށްފައިވާ ފޯކަލް ޕޮއިންޓުތައް މެދުވެރިކޮށް ވެސް ޝަކުވާ ހުށަހެޅުމުގެ ފުރުސަތު އޮންނާނެއެވެ. އަދި މާލޭގައި 1414 ކޯލް ސެންޓަރު މެދުވެރިކޮށްވެސް ޝަކުވާ ހުށަހެޅުމުގެ ފުރުސަތު އޮންނާނެ ކަމަށް ޝަރީފް ވިދާޅުވިއެވެ.
ޝަކުވާ ހުށަހެޅުމުގެ ފޯމްވެސް އަންނަ އާދީއްތަ ދުވަހުން ފެށިގެން އިލެކްޝަންސް ކޮމިޝަނުން ލިބެން ހުންނާނެއެވެ. އަދި ކޮމިޝަންގެ ވެބްސައިޓުން ޑައުންލޯޑު ކުރެވެން ވެސް ހުންނާނެއެވެ.
އޭގެ އިތުރަށް ރިޔާސީ އިންތިޚާބަށް ކުރިމަތި ލުމުގެ ފުރުސަތު ހުޅުވާލާނީ 15 ޖުލައި 2018 ގައި ކަމަށް ވެސް އޭނާ ވިދާޅުވިއެވެ. "އެއީ ގާނޫނީ ގޮތުން އެކަމަށް ކަނޑައެޅިފައި އޮންނަ މުއްދަތު ތެރެއިން އެންމެފަހު ޑެޑުލައިނެއްނޫން. އެހެންނަމަވެސް އެ މުއްދަތު ހަމަވުމުގެ ކުރިން. 15 ޖުލައި ގައި އިންތިޚާބަށް ކުރިމަތި ލުމުގެ ފުރުސަތު ހުޅުވާލުމާއެކީގައި ދިހަދުވަހުގެ މުއްދަތު އިންތިޚާބަށް ކުރިމަތި ލުމަށްޓަކައި އަޅުގަނޑުމެންދޭނަން،" ޝަރީފް ވިދާޅުވިއެވެ. އޭގެ އިތުރަށް އިންތިޚާބަށް ކުރިމަތިލާ ފަރާތްތަކާ ބެހޭ ގޮތުން ޝަކުވާ ހުށަހެޅުމުގެ މުއްދަތުވެސް ދެއްވާނެ ކަމަށް ވިދާޅުވިއެވެ.
އޭނާ ވިދާޅުވީ ރަށްވެހިވެފައިވާ ރަށްނޫން އެހެން ރަށެއްގައި ވޯޓުލާދުވަހު ހުންނާނެ ކަމަށް ގަބޫލު ކުރެވޭ މީހުން ރީރަޖިސްޓްރީ ކުރުމުގެ ފުރުސަތު ޖުލައިމަހު 17 އިން އޮގަސްޓް 19 އަށް އޮންނާނެ ކަމަށެވެ.
އޭގެ އިތުރަށް ކެންޑިޑޭޓުންގެ ނަން ތަރުތީބުކޮށް ކެންޑީޑޭޓު ނަމްބަރު ދިނުމާ އެކަންކަން އޮންނާނީ އޮގަސްޓް 9 ވަނަ ދުވަހުއެވެ. އެހިސާބުން ކެންޕޭން ކުރުމަށް ފުރުސަތު ހުޅުވައިލައްވާނެ ކަމަށްވެސް ޝަރީފް ވިދާޅުވިއެވެ. އަދި އޮގަސްޓް 31 ގައި ކެންޑިޑޭޓުންގެ މަންދޫބުން ވޯޓަރސް ލިސްޓުގައި ސޮއިކުރުމަށް ފުރުސަތު ދެއްވާނެ ކަމަށް އީސީގެ ރައީސް ވިދާޅުވިއެވެ.
